Ei Fapopoꞌii ei Warefaꞌaia
13
Fihaguinaa hememea hamuꞌou aleꞌei filofui. 2 Hamoneiꞌaa madiꞌininaa fei mau fagutanaa ei gufu raua, uaa aꞌa fei bigiꞌa aleꞌei, hefiꞌa ramaꞌa, lomi rona aida ba rona fagutanaa ei aloꞌalo. 3 Naranaraiaa ei rona guta i humuu boboꞌai aleꞌei ba ana hamuꞌou boboꞌaia mawe ei rona fafeloaa roꞌou hefiꞌa ana aleꞌei ba hamona tonaa fiꞌiaa roꞌou. 4 Minaa ei ramaꞌa nei fararabaiaa fei lalaia ma fei tawaa lalaia nei fafaꞌarai, uaa mei Haidaa i dududuaa mei fiharoharoipaꞌaia mawe minaa ei fitatafipaꞌaia. 5 Hamoneiꞌaa haguaa fei mugoo poꞌi ma hamonei oafawawanene ua aꞌa tamanu hamona paꞌi, uaa mei Haidaa na ware:
“Fai loꞌe a diꞌininio;
fai loꞌe a fapedu aꞌamu.”
6 Siꞌei, oꞌaa warefaꞌagu ua ba,
“Mei Fasu, hia hadumau; lomi a mamaꞌau.
Roꞌaa fetanainau ei ramaꞌa?”
7 Naraiaa ei bauaniaa hamuꞌou, ei rona wareaa fei wareaa mei Haidaa aꞌa hamuꞌou. Naramaꞌaiaa fei mau gutanaa roꞌou ma neneraa ei narafaweꞌiaa roꞌou. 8 Jesus Christ, ana mei na oa minoa, wagieni ma ranimai ranimai.
9 Apuna minaa atete aꞌa watauda ei mau feroia na uꞌugai. Ina rawani ba i faweꞌiaa laloo iaa oꞌou fei rawaniꞌaa mei Haidaa ma abaa ei duꞌua hamamani, ei lomi i hadumaa ei ramaꞌa rona hanaia. 10 Ona paꞌi hepalo tawahafi na apunai ba ei ramaꞌa rona bigi laloo fei humuu mei Haidaa poroporo mina, lomi ba rowe hanaiaa fei i ude wagina.
11 Mei paꞌaa bauaniaa humuu mei Haidaa naꞌaida tabeaa ei namoo manulelele aleꞌei ponoponoo ei hafeloꞌa ma waduꞌainaa Fawelei Paꞌaa Apunaia, maꞌuaa ei hudi unuu roꞌou, rona faguꞌaia auguu fei gufu. 12 Ma ana aleꞌei, Jesus na tonaa fiꞌina auguu fei poaa fanefanee fei gufu ba i fafafaꞌarainaa ei ramaꞌa aꞌa fei namona. 13 Siꞌei, oꞌaa dinaa aꞌana i auguu fei gufu fininaa fei mamafaa ina harenia. 14 Uaa yeni, lomi ona paꞌi hefaa gufu i udelao, maꞌuaa oifi lalabaginaa hefaa gufu fei ba iwe nomai.
15 Siꞌei, aꞌa Jesus, oneiꞌu fanaa fei fanaa oꞌou aꞌa mei Haidaa, fei fana ba o uduginia—hapee habaꞌumuu oꞌou, fei harana. 16 Ma apuna madiꞌinaa fei rawaniꞌa maumau ma fifaniaa manumanu aꞌa ei ramaꞌa, uaa aꞌa fei maumau fei, mei Haidaa na niꞌeniꞌe.
17 Guainaa wareaa ei bauaniaa hamuꞌou ma fafefenaa fei utonaa roꞌou fei forafora. Roꞌei omaꞌaa hamuꞌou ma rowe tonaa dududuaa roꞌou wagina. Guainaa wareaa roꞌou ba fei bigiꞌa i faniꞌeniꞌeaa roꞌou ma abaa i faꞌawatainaa roꞌou ma nabaa lomi, lomi i farawaninaa hamuꞌou.
18 Lafulafunaa haiꞌou. Haiꞌounapaꞌaa apaꞌia ba na rawani ua ei naranaraa haiꞌou ma nunumiaa haiꞌou ba minaa ei mau tatalaiaa haiꞌou neimina rawani ua. 19 Sifeni, hepalo baua iꞌigaiau ba hamonei lafulafu ba uneiꞌaa madii ma a hadiweꞌimai aꞌa hamuꞌodu.
20 Nunumiau ba mei Haidaniaa fei gutafarawania, mei aꞌa fei namoo fei fiꞌugaia lomi i pedutoo, mei na faꞌasiꞌanaa mei Fasuu oꞌou, Jesus, aꞌa fei maꞌea, mei Rawaniꞌa Omaꞌamaꞌaa ei Sipsipi, inei 21 fani waduu panii hamuꞌou minaa ei rawaniꞌa manumanu ba hamonei bigiꞌaa ei nunumiana ma ba aꞌa Jesus Christ i biginaa oꞌou tamanu i faniꞌeia. Ma onei uduginaa Christ ranimai ranimai. Amen.
22 Faꞌua ba lomi namina malaa feni neꞌiau, maꞌuaa ena lofuu, nunumiau ba hamonei guaitoꞌuaiaa eni warea aweia una fanaa hamuꞌou.
23 Nunumiau ba hamonei aida ba mei lofuu oꞌou Timothy nawe ala. Nabaa i nobatafanamii aꞌau, haiguꞌaa fai norawaua wi maꞌa hamuꞌou.
24 Famafufuoinaa minaa ei bauaniaa hamuꞌou mawe minaa ei apunaia. Ei naꞌuu Italy, rona aloawii ei famafufuoiaa roꞌou aꞌa hamuꞌou.
25 Fei rawaniꞌaa mei Haidaa i oa pafoo hamuꞌou.