Wagii fei Narafaweꞌia
11
Fei narafaweꞌia sifei ba onapaꞌaa aida ba fei oꞌonaia unuu oꞌou ba o paꞌi, opaꞌaa paꞌi ma onapaꞌaa aidadii ba tamanu lomi ona fanunupaꞌia, inapaꞌaa faꞌuai. 2 Aꞌa fei, mei Haidaa na niꞌeniꞌe aꞌa ei ramaꞌaa mina. 3 Aꞌa fei narafaweꞌia, ona aida ba minaa ei manumanu haroo pafea mamaraiamii roꞌou aꞌa fei wareaa mei Haidaa ma tamanu ona fanunuia eꞌeni, famamarana aꞌa tamanu lomi ona fanunupaꞌia.
4 Aꞌa fei narafaweꞌia, Abel na fanaa mei Haidaa hefaa rawaniꞌaa fanana laraa fei fanaa Cain. Aꞌa fei narafaweꞌia, hia hemea wanewanea ramaꞌa ei i ware mei Haidaa ba fei fanana na rawani. Ma faꞌua ba ina maꞌedii, maꞌuaa aꞌa fei narafaweꞌia, ana ifi wareware eꞌeni.
5 Aꞌa fei narafaweꞌia, mei Haidaa na nodugaa Enoch diꞌininaa yeni ma lomi ina maꞌe; lomi rona labagipaꞌia, uaa ei itawe dugia, mei Haidaa na tenia ba hia rawaniꞌa ramaꞌa. 6 Ma nabaa lomi fei narafaweꞌia, paꞌaa lomi ba i niꞌeniꞌe mei Haidaa, uaa hini ba i nomai aꞌana, inei aida ba mei Haidaa fi oa ma ba ana ifi farawaninaa ei roꞌamina lalabaginia.
7 Aꞌa fei narafaweꞌia, Noah, ei i guainaa fei warefaꞌaia wagii ei manumanu ataa nomai ma atawe fanunu ba tamanu, ina maꞌauaa fei warefaꞌaia aleꞌei manumanu apuna ma na faduaa fei baua wa ba roꞌaa tela ei maroana. Aꞌa fei narafaweꞌiana, ina warenaa umuna ba na hafelo feni ano ma na tonaa fei wanewanea, fei i nofininamii fei narafaweꞌia.
8 Aꞌa fei narafaweꞌia, Abraham, ei i tonaa fei warea ba inei dinaa aꞌa fei gufu, fei nene nawe tonia ba manu-manuna, ina neneraa fei warea ma na dii, maꞌuaa lomi na aida ba i dinaia. 9 Aꞌa fei narafaweꞌia, ina faꞌu humuna i malalaa fei faꞌunaia gufu aleꞌei hemea ramaꞌa abaa gufuna yei; ina maꞌigu laloo ei pale poroporo ana aleꞌei Isaac ma Jacob, laguei ana aleꞌei hia aꞌa fei faꞌunaia fei. 10 Uaa ifi lalabaginaa fei gufu na paꞌi fasuꞌufufugoina, fei pagipagia ma faduaa mei Haidaa.
11 Aꞌa fei narafaweꞌia, Abraham, hia napaꞌaa bau ma Sarah, hia paꞌabeu, maꞌuaa inawe oanaa ama uaa inaa nara ba na faꞌuai mei i faꞌunai aꞌana. 12 Ma siꞌei, aꞌa mei hemea ua ramaꞌa, mei aleꞌei ba na maꞌedii, namina watauda ei paina aleꞌei ei piꞌu pafea ma aleꞌei piyee didipisii, ei lomi o wareipaꞌia.
13 Minaa ei ramaꞌa ei, ana roifi guta aꞌa fei narafaweꞌia ei roꞌaa maꞌe; lomi rona tonaa ei manumanu wagii fei faꞌunaia; rona hafoꞌuaiamai rauaa ma rona nunuminia, maꞌuaa na raua. Ma rona aida ba roꞌou, ramaꞌaa hepapa gufu ma abaa paꞌaa ramaꞌaa feni ano. 14 Fei mau naranara aleꞌei, na unia ba ei ramaꞌa ei, roifi lalabaginaa hepalo paꞌaa gufuu roꞌou. 15 Nabaa fei naranaraa roꞌou ana fi ude aꞌa fei gufu rona diꞌininia, na hawia ba roꞌaa hadiweꞌai. 16 Maꞌuaa rona nunuminaa hepalo gufu, fei gufu pafea, fei na rawani laraa fei. Siꞌei, mei Haidaa lomi na mamafa ba hia Haidaniaa roꞌou, uaa ina pagidigaa hepalo gufuu roꞌou.
17 Aꞌa fei narafaweꞌia, Abraham, mei i tonaa fei faꞌunaia, mei ba ana i foꞌafamaꞌeaa mei hemea ua naꞌuna, na fanaa Isaac aleꞌei fana ei i mania mei Haidaa, 18 maꞌuaa mei Haidaa na warefanidigia ba “Ei paimu,b rowe nomai uaa Isaac.” 19 Abraham na nara aleꞌei ba mei Haidaa na paꞌi faufau ba i faꞌasiꞌanaa ei maꞌea ma fei ba ina to hadiweꞌinaa Isaac, aleꞌei hanunu ba ina hadiweꞌimai aꞌa fei maꞌea.
20 Aꞌa fei narafaweꞌia, Isaac na haweginaa Jacob ma Esau aꞌa tamanu itawe nomai aꞌa lagua.
21 Aꞌa fei narafaweꞌia, Jacob, ei ba i maꞌe, ina haweginaa hememea naꞌuu Joseph ma na losui ei ifi faduge aꞌa fei ona.
22 Aꞌa fei narafaweꞌia, Joseph, ei i rarafiꞌi fei auna, na uꞌugaa fei walaꞌanaa ei Israel yei Egypt ma na warenaa aꞌa ei maroana ba ronei bigiꞌaa tamanu aꞌa ei guina.
23 Aꞌa fei narafaweꞌia, mei ama ma inaa Moses, laguna opaꞌainia aleꞌei oduai puda nenee fei waniniana uaa laguna fanunuꞌapaꞌia ba hia, abaa baduu ua ma lomi laguna maꞌauaa fei wareaa mei hapara.
24 Aꞌa fei narafaweꞌia, Moses, ei i gipedii, lomi na nunumiai ba ro ware ba hia waniniaa mei naꞌuu Pharaoh. 25 Ina nunuminia ba i tonaa panirarataia aꞌa ei ramaꞌaa gufuu mei Haidaa laraa fei ba i tonaa ei roꞌoo ei hafeloꞌa, ei i pedu batafa ua. 26 Ina nara ba fei gutafafeloana uaa Christ, na awatadiai laraa ei watauda rawaniꞌa manumanuu Egypt, uaa ifi gutaꞌomaꞌaꞌuaiaa fei ponoꞌana, fei i nomai hinene. 27 Aꞌa fei narafaweꞌia, ina diꞌininaa Egypt ma lomi na maꞌau aꞌa fei sibaa mei hapara; ina ufaweꞌi, uaa ina fanunupaꞌaa mei na tapu aꞌa ei ramaꞌa. 28 Aꞌa fei narafaweꞌia, ina bigiꞌaa fei Talai Falogia ma fei tafugaa fei namo ba mei ba i famaꞌeaa ei umaꞌua, lomi ba i famaꞌeaa ei umaꞌua naꞌuu ei Israel.
29 Aꞌa fei narafaweꞌia, ei ramaꞌa, rona talaiꞌailao laloo fei Roa Agic aleꞌei malagufu ma ei Egypt ba ana roꞌaa bigiꞌia, maꞌuaa rona wawauꞌumaꞌe.
30 Aꞌa fei narafaweꞌia, ei nonoo Jericho na pasi nenee fei roꞌaa talaifaweloinia laloo oloromeai arewaa.
31 Aꞌa fei narafaweꞌia, Rahab, mei pifinee tala, siꞌei ba ina taufagutanaa ei farerefaia, lomi na maꞌefipui aꞌa ei barafea.d
32 Ma tamanudiai ba a uꞌugia? Lomi na paꞌi au ba a uꞌugaa Gideon, Barak, Samson, Jephthah, David, Samuel mawe ei mamamaꞌa. 33 Aꞌa fei narafaweꞌiaa roꞌou, rona muainaa ei fifoꞌaia aꞌa ei hapara, fawanewaneaa ei pidawaiaa gufu ma tonaa ei faꞌunaia; rona totominaa poaa ei lion, 34 pereaa fei nalenaleaa fei hafi ma tela aꞌa fei wadu; ei rafileleaa roꞌou na filoginaa faufaua; ma oanaa faufaua aꞌa ei fifoꞌaia ma teteaa ei foꞌaa ei gufuu raua. 35 Ei pifine, rona tohadiweꞌinaa ei maꞌeaa roꞌou, uaa rona asiꞌadiai. Hefiꞌadiai, rona nanamuinaa fei haperaraia ma rona ofasiꞌia ba lomi roꞌaa ala uaa rona nunuminia ba ineipaꞌaa rawani fei asiꞌanaa roꞌou. 36 Hefiꞌa, rona tonaa hararasia ma babu ma hefiꞌadiai rona faugaa roꞌou ma aunaa humuu boboꞌaia. 37 Rona nafanaa roꞌou mugoo;e rona walainaa roꞌou; rona foꞌafamaꞌenaa roꞌou wadu. Rona tatalai hawainaa roꞌou hudii sipsipi ma hudii memee ma lomi rona paꞌi manumanu ma rona tonaa haperaraia ma panirarataia. 38 Fei maumau roꞌou namina mua laraa fei maumau feni ano. Rona tatalai fawelei lomi haihai o guana ma fawelei na paꞌi maugeni ma i laloo ei walefoaa ei naꞌa ma ei walefoaa malagufu.