Fei Hepoa ua Maꞌeaa Christ na Hawiaa Minaa ei Ramaꞌa
10
Fei law aleꞌei haduoo ei rawaniꞌa manumanu ba ro nomai—abaa aleꞌei paꞌaa manumanu. Siꞌei ba aleꞌei, ei foꞌamaꞌea, ei ronaꞌaida bigiꞌia hepapalo igisimasi, lomi na hawia ba i fafafaꞌarainaa ei rona nofarafiꞌimai ba roꞌaa losui. 2 Nabaa na hawiaa ei foꞌafamaꞌea ei, lomi ba roꞌu bigiꞌuaia. Uaa nabaa na hawia ba i fafafaꞌarainaa ei losuia aꞌa ei hafeloꞌaa roꞌou, hepalo foꞌafamaꞌea ua na hawidigia ma lomidiai ba roꞌaa nanamuinia ba rona hafelo. 3 Maꞌuaa hepapalo igisimasi, ei foꞌafamaꞌea ei, naꞌaida fanonominaa oꞌou ba ona hafelo, 4 uaa ei namoo budumaꞌao ma memee, paꞌaa lomi ba iwe fapedupaꞌaa ei hafeloꞌa.5 Siꞌei, i nomai Christ aꞌa feni ano, na ware:
“Lomi ona nunuminaa ei foꞌafamaꞌea ma ei fana,
maꞌuaa ona fanau feni hudi unu ba unei rawaꞌaꞌafainia;
6 lomi ona niꞌeniꞌe
aꞌa ei fana rona guꞌa
ma ei fana ba i fapedugaa ei hafeloꞌa.
7 Ma una ware, ‘Yau meni—ina paꞌi uꞌugau aꞌa fei neꞌia—
fei paꞌafii fei noramiau ba a bigiꞌaa ei nunumiamu, mena Haidaa.’”
8 Famaꞌa ina ware ba, “Lomi ona nunuminaa ei foꞌafamaꞌea ma ei fana, ei rona guꞌa ma ei fana ba i fapedugaa ei hafeloꞌa. Ma lomi ona niꞌeniꞌe aꞌa eꞌei” (faꞌua ba fei law na ware ba ronei bigiꞌia). 9 Ma hinene ina ware, “Yau, meni; ei a nomai ba a bigiꞌaa ei nunumiamu, mena Haidaa.” Ina auꞌuꞌuginaa fei rawarawa ba i faꞌasiꞌanaa fei faguapaloana. 10 Ma aꞌa fei nunumiana, minaa oꞌou na fafaꞌarai aꞌa fei foꞌafamaꞌeaa fei hudi unuu Jesus Christ—ma hepoa ua na hawiaa minaa ei ramaꞌa.
11 Hepapalo arewaa hememea ei paꞌaa bauaniaa humuu mei Haidaa, na ufalarai ma bigiꞌaa fei bigiꞌana aꞌa fei losuia; inaꞌaida bigiꞌaa ana minaa fei foꞌafamaꞌea ranimai, fei ba paꞌaa lomi i fapedugaa ei hafeloꞌa. 12 Maꞌuaa meni bauaniaa humuu mei Haidaa meni, na rawaꞌaꞌafainaa anaia—hepoa ua na hawia ba i fapedugaa ei hafeloꞌa ranimai ranimai. Ei i bigiꞌaa fei, inawe guta pepei maꞌau mei Haidaa. 13 Aꞌa fei au fei ma nolao, ifi omaꞌaa fei arewaa ba ei bidibidii ununa, rowe oanaa labenaa pinena, 14 hamatee, aꞌa hepalo ua famaꞌeaa roꞌou hia, ina bigiꞌia ba ranimai ranimai ronawe fafaꞌarai, ei na fafafaꞌarainaa roꞌou.
15 Fei Spiriti Apuna, ana na warefaꞌaiaa oꞌou fei manumanu fei. Fei rawarawa wareana aleꞌei:
16 “Mei Fasu na ware ba, nenee fei au fei,
a bigiꞌaa feni fiꞌugaia feni aꞌa roꞌou.
A augaa ei law una paꞌi laloo iaa roꞌou,
ma neꞌinia laloo naranaraa roꞌou.”
17 Ma ana ina ware ba:
“Ei hafeloꞌaa roꞌou mawe ei barafeaa roꞌou fei law,
lomi a fai nonomidinia.”
18 Ma siꞌei ba ina futoaa eꞌei, lomi paꞌafina ba i paꞌidiai foꞌafamaꞌea ba ponoponoo hafeloꞌa.
Ufaweꞌi
19 Ena lofuu, oꞌouna paꞌi lauguꞌaa oꞌou ba oꞌaa waduꞌainaa Fawelei Paꞌaa Apunaia wagii fei namoo Jesus. 20 Ma wagii fei manufau rawaniꞌa tala na paꞌi harenua, fei na gigi aꞌa fei rapirapi, ana fei hudi ununa. 21 Siꞌei ba ona paꞌi hemea bauaniaa humuu mei Haidaa, hemea na onaꞌonai, i omaꞌaa fei humuu mei Haidaa. 22 Ma siꞌei ba ei manumanu ei napaꞌaa faꞌuai, onei nofarafiꞌilao aꞌa mei Haidaa fininaa fei paꞌaa laloo iaa oꞌou wagii fei lauguꞌaa fei narafaweꞌia ba laloo iaa oꞌou na fafaꞌarai wagii ei marapuaa naranaraa oꞌou ma ana aleꞌei ba ei unuu oꞌou na nunudii aꞌa fei malewaa ranu, fei lomi na loloa. 23 Onei panarofaweꞌinaa fei oꞌonaia unu, fei ona ware ba ona paꞌi, uaa mei i faꞌunai, ipaꞌaa bigiꞌia. 24 Ma naramaꞌaia batanai ona faꞌasiꞌanaa naranaraa hememea oꞌou ba oꞌaa bigiꞌaa fei mau hagua mawe ei rawaniꞌa bigiꞌa. 25 Oneiꞌaa fapedugaa fei mau gutafipuiaa oꞌou, aleꞌei mau bigiꞌaa hefiꞌa, maꞌuaa farefurefuaa unuu hememea oꞌou—ma faꞌapoidinalao ena ona fanunuaa fei Arewaa ba fi nomai.
26 Nabaa ominaꞌu bigiꞌuaialoo ei hafeloꞌa nene tonaa oꞌou fei apaꞌaa fei faꞌuaia, lomi na paꞌi fei namoo ponoponoo hafeloꞌa aꞌa oꞌodu, 27 maꞌuaa uniaa fei ba onei fatanoꞌunaa walai oꞌou wagina, fei dududua mawe fei nalenaleaa hafi, fei ba i guꞌapedugaa ei na bidibidi unuu roꞌou aꞌa mei Haidaa. 28 Hini na barafeaa fei law Moses, nabaa helagui o oꞌodui na fanunuaa fei barafea fei, lomi roꞌaa faloloaꞌinia; ro foꞌafamaꞌeꞌuaia. 29 Nabaa aleꞌei, poꞌo batanaidiai tonana fagianana mei i hapuninaa mei Naꞌuu mei Haidaa ma lomi na fahonuaa fei namoo fei fiꞌugaia, fei na papaditainia. Mei ramaꞌa aleꞌei, ana na warefafeloaa fei Spiritii fei rawaniꞌaa mei Haidaa. 30 Uaa ona apaꞌaa mei na ware ba, “Manumanuu fanaa fagianaa aꞌa ei ramaꞌa hafelo; awe fawanewaneia,” ma hepalodiai ba, “Mei Fasu i dududuaa ei ramaꞌaa gufuna.” 31 Paꞌaa famamaꞌau naba o tonaa fei dududuaa mei Haidaa, mei fi oalao.
32 Narahadiweꞌidinaa ei arewaa, ei hamodoꞌo tonaa fei weꞌai, ei hamoꞌaa ufaweꞌi fininaa baua fiꞌia i maꞌaa fei haperaraia. 33 Hefarani rona warefafeloaa hamuꞌou ma haperararaiaa hamuꞌou i pudaa ramaꞌa; hefaranidiai hamona ufipui aꞌa hefiꞌadiai rona tonaa fei. 34 Hamona faloloaꞌihugiaa ei boboꞌaia ma niꞌe ua ei roꞌaa tonaa manumanuu hamuꞌou, uaa hamona aida ba hamona paꞌi hefiꞌadiai manumanu na mua laraa eꞌei ma lomi i pedutoo.
35 Siꞌei, apuna faꞌasisiaa naranaraa hamuꞌou; uaa i bauanai fei rawaniꞌa ponoꞌa hamopowe tonia. 36 Hamonei ufaweꞌi, uaa ena hamona bigiꞌaa fei nunumiaa mei Haidaa, hamowe tonaa fei faꞌunaiana. 37 Lomi i madii ma,
“Mei ba i nomai, iwe nomai, aꞌa ba i famamadii.
38 Maꞌuaa ei wanewane ramaꞌaa gufuu,a roꞌaa oa fininaa fei narafaweꞌia.
Ma nabaa nemea i faꞌasisi,
lomi a niꞌeniꞌe aꞌana.”
39 Maꞌuaa abaa oꞌou aꞌa ei rona faꞌasisi ma tonaa fei fagianaa, uaa oꞌou aꞌa ei narafaweꞌia, ei rona tela.