Losui laloo fei Humuu mei Haidaa Poroporo Yeni Malagufu
9
Fei rawarawa fiꞌugaia na paꞌi warea ba batanai fei mau losuia ma fei humuu mei Haidaa yeni malagufu. 2 Rona bigiꞌaa hepalo humuu mei Haidaa poroporo. I lalona na paꞌi guapalo lalomu. Laloo fei rawarawa lalomu rona augaa fei udeꞌudee weꞌai ma fei tawaa fei faraa pidaua na apunai. Ma rona roroinia ba Fawelei Apunaia. 3 I petoo fei rawarawa lalomu na paꞌi rapirapia ma nenena na ude hepalodiai pusuꞌo lalomu rona roroinia ba Fawelei Paꞌaa Apunaia 4 ma i lalona na paꞌi fei tawaa fei dufaa hagu paꞌafina gold mawe fei bao fei fiꞌugaia. Fei hawaa fei bao, gold. Fei bao, nofina fei baraa manna, paꞌafina gold ma fei o Aaron, fei na nusu mawe guapaloei mugoo fiꞌugaia. 5 I palalaa fei bao na paꞌi laguei cherubim, laguei faꞌaꞌarewaa fei Haweraa mei Haidaa. Ei pau lagua na fagiogioaa fei hawaa fei ponoponoo ei hafeloꞌa i pafoo fei hawaa fei bao.b Maꞌuaa abaa o fiwarewareinaa ei manumanu ei eꞌeni.6 Ena rona aufarawanidigaa minaa ei manumanu laloo fei humuu mei Haidaa, ei bauaniaa humuu mei Haidaa, ronaꞌaida waduꞌainaa fei rawarawa lalomu ba roꞌaa bigibigi. 7 Maꞌuaa uniaa mei paꞌaa bauaniaa humuu mei Haidaa i waduꞌainaa fei faguapaloaa lalomu ma hepoa ua laloo heai igisimasi ma ranimai nei paꞌi namo, fei hia, i fani fana uaa ei hafeloꞌaa anaia mawe hafeloꞌaa ei ramaꞌa, ei rona bigiꞌuaia ma lomi rona aida ba rona tata. 8 Wagii eꞌei manumanu eꞌei, fei Spiriti Apuna na foiginia ba fei rapirapii Fawelei Paꞌaa Apunaia atawe gigi nabaa ana fi ude fei rawarawa humuu mei Haidaa poroporo. 9 Fei manumanu fei, aleꞌei hanunu aꞌa feni au feni ba i famaꞌaia ba ei fana ma ei foꞌafamaꞌeiaa roꞌou, lomi i fawanewanepaꞌaa ei marapuaa naranara ei losuia. 10 Ei manumanu ei, manumanuu augu aleꞌei duꞌua ma numa mawe ei mau fesufesu—aleꞌei ei auguu unuu roꞌou nopaꞌaloo fei au ei manufau maumau.
Fei Namoo Christ
11 Ei i nomai Christ aleꞌei mei paꞌaa bauaniaa humuu mei Haidaa wagii ei rawaniꞌa manumanu na udedii yeni,c ina waduꞌaiꞌasiꞌaa aꞌa fei humuu mei Haidaa poroporo, fei na fafaꞌarai ma na mua laraa fei famaꞌa, abaa bigiꞌaa ramaꞌa ma abaa manumanuu famamaraia. 12 Lomi na waduꞌai fininaa namoo ei memee mawe ei budumaꞌao; maꞌuaa ina waduꞌainaa Fawelei Paꞌaa Apunaia hepoa ua fininaa fei ana namona. Ma wagii fei namona na ponoꞌaa oꞌou aꞌa fei ponopono lomi i pedutoo. 13 Fei namoo ei memee, ei wawane budumaꞌao mawe ei maduu ei pifine budumaꞌao, rona tafuginaa pafoo ei rona loloa aleꞌei fei mau losuu roꞌou ba nei fafaꞌarai fei auguu unuu roꞌou. 14 Faꞌua ba ei manumanu ei, ana ina rawani, maꞌuaa fininaa fei Spiriti lomi i pedutoo, fei namoo Christ, mei lomi hepalo hafeloꞌana, mei na fanaa anaia aꞌa mei Haidaa, fei namona na onaꞌonaidiai ma i fafafaꞌarainaa ei naranaraa oꞌou aꞌa ei mau bigiꞌa,d ei i noduginaa oꞌou maꞌea ba oꞌaa bigiꞌaa ei bigiꞌaa mei Haidaa, mei fi oalao!
15 Siꞌei ba ina maꞌedii aleꞌei ponopono ba ronei ala aꞌa ei hafeloꞌa, ei rona bigiꞌia laloo fei rawarawa fiꞌugaia, Christ, hia mei fawanewaneaa watola wagii fei manufau fiꞌugaia ba ei rafeiana, ronei tonaa fei faꞌunaia, fei lomi i pedutoo ba wagii fei maꞌeana i ponoꞌalaraa ei ramaꞌa aꞌa ei hafeloꞌa rona bigiꞌia wagii fei rawarawa fiꞌugaia.
16 Fei neꞌiaa hemea ba i fiꞌalagibata ei manumanuna nabaa i maꞌe,e oneidoꞌo aida ba inapaꞌaa maꞌe, te, owe alaginaa ei manumanuna, 17 uaa fei neꞌia na paꞌi hanuna nabaa ina maꞌe; lomi ba o neneraa fei neꞌiana nabaa ana fi guta. 18 Sifei fei paꞌafina ba fei rawarawa fiꞌugaia, lomi hanuna nabaa lomi namo. 19 Moses, ei i warefanaa ei ramaꞌa minaa ei neꞌia laloo fei law, ina tonaa fei namoo ei budumaꞌao fininaa ranu, fei roa lawalawa mawe ei raraa haihai hyssop ma tafuginaa pafoo fei holobenaa mawe minaa ei ramaꞌa. 20 Ina ware, “Sifeni feni namo wagii fei fiꞌugaia, fei mei Haidaa na ware ba hamonei nenegia.” 21 Ana aleꞌei, ina tafuginaa fei namo i laloo fei humuu mei Haidaa poroporo mawe minaa ei manumanu lalona wagii fei mau losuu roꞌou. 22 Ma ana paꞌaa faꞌua ba fei law na ware ba minaa ei manumanu, ronei fafaꞌarainaa namo ma nabaa lomi namo, ana lomi ba i futo ei hafeloꞌa.
23 Siꞌei, hepalo baua manumanu ba ronei fafaꞌarainaa namo ei manumanu yeni malagufu, maꞌuaa aꞌa ei paꞌaa manumanu pafea, inei paꞌi namo i muainaa eꞌei. 24 Uaa Christ, lomi na waduꞌainaa fei humuu mei Haidaa poroporo, fei bigiꞌaa ramaꞌa. Fei, hanunuu fei paꞌaa faꞌua. Hamatee hia na waduꞌainaa ana fei gufu pafea ma umuinaa oꞌou inamoaa mei Haidaa. 25 Ana abaa ina waduꞌainaa fei gufu pafea ba i fanidinaa anaia aleꞌei fei maumau mei paꞌaa bauaniaa humuu mei Haidaa, mei naꞌaida waduꞌainaa Fawelei Paꞌaa Apunaia hepapalo igisimasi fininaa fei namo, fei abaa namona. 26 Nabaa aleꞌei, hanuna ba Christ nei tonaa fiꞌina watauda au wagii fei mamaraiamii feni ano nopaꞌamii eꞌeni. Maꞌuaa eꞌeni ina famaua hepoa ua laloo eni aꞌapoo arewaa ba i fapedugaa ei hafeloꞌa, uaa ina rawaꞌaꞌafainaa anaia. 27 Ei ramaꞌa, ronei maꞌe hepoa ua ma nenee fei, ronei tonaa dududuaa roꞌou 28 ma ana aleꞌei, Christ na rawaꞌaꞌafainaa anaia hepoa ua ba i fapedugaa ei hafeloꞌaa watauda ramaꞌa; ma iwe hadiweꞌimai ma fei faguapoaa noramiana, aꞌa ba i harenaa ei hafeloꞌa, maꞌuaa ba imii fanaa fei telaꞌana aꞌa ei rona omaꞌaia.