Mei Paꞌaa Bauaniaa fei Humuu mei Haidaniaa fei Manufau Fiꞌugaia
8
Fei paꞌaa paꞌafii fei warewarea, fei oi wareia, sifeni: Ona paꞌi hemea paꞌaa bauaniaa humuu mei Haidaa aleꞌei, mei na guta fipepei maꞌau fei gutanaa mei Hapara pafea 2 ma fi bigi laloo fei paꞌaa humuu mei Haidaa, fei faduaa mei Fasu ma abaa fei faduaa ramaꞌa.3 Minaa ei paꞌaa bauaniaa humuu mei Haidaa, bigiꞌaa roꞌou ba roꞌaa fani fana ma foꞌafamaꞌeaa ei ponoponoo hafeloꞌa ma mei ramaꞌa mei, ana nei paꞌi manumanu ba i fani. 4 Nabaa hia yeni malagufu, lomi ba i oa aleꞌei bauaniaa humuu mei Haidaa, uaa na paꞌidii ramaꞌa ba roꞌaa fanaa ei fana aleꞌei i wareia fei law. 5 Rona bigi laloo fei humuu mei Haidaa poroporo, fei haduo ma hanunuu fei humuu mei Haidaa pafea. Siꞌei, i warefaꞌaiaa Moses mei Haidaa aleꞌei ba: “Nenegimaꞌaiaa tamanu una famaꞌaio i pafoo fei maugen.” 6 Maꞌuaa fei bigiꞌa na tonia Jesus, na muainaa fei bigiꞌaa roꞌou, ana aleꞌei fei fiꞌugaia, fei hia fi umuinia na muainaa fei fiꞌugaia famaꞌa. Ma ei faꞌunaia wagii fei fafasuii fei bigiꞌana na mua laraa famaꞌa.
7 Uaa nabaa lomi na paꞌi tataa fei rawarawa fiꞌugaia, lomi roꞌaa labaginaa hepalodiai fiꞌugaia. 8 Maꞌuaa mei Haidaa na fanunupaꞌaa ei tataa ei ramaꞌa ma na ware:a
“Ifi nomai fei au ba yau,
a bigiꞌaa hepalo manufau fiꞌugaia
aꞌa ei Israel
mawe ei Judah.”
9 Aleꞌei fei wareaa mei Fasu,
“Abaa aleꞌei fei fiꞌugaia
una bigiꞌia aꞌa ei upuu roꞌou
ei a taudugaa roꞌou,
diꞌininaa Egypt,
uaa lomi rona oafagugu aꞌa fei fiꞌugaiau,
ma una ofadugaa roꞌou.”
10 Na ware mei Fasu ba,
“Sifeni, feni fiꞌugaia yau ba a bigiꞌia aꞌa ei Israel nenee fei au fei.
A augaa ei law una paꞌi i naranaraa roꞌou
ma neꞌinia i laloo iaa roꞌou.
Awe oanaa Haidaniaa roꞌou,
ma rowe oanaa ramaꞌaa gufuu.
11 Lomidiai ba nemea i feroinaa
mei gufuna o lofuna
ma ware ba, ‘Onei apaꞌaa mei Fasu,’
uaa minaa roꞌou, ropowe apaꞌau,
ei ramaꞌa ua mawe ei baua ramaꞌa.
12 Uaa a futoaa ei hafeloꞌaa roꞌou
ma fai lomi a nonominia.”
13 Ei i ware ba “manufau” fiꞌugaia, ina fapedugaa fei famaꞌa, fei fai lomi i bigipaꞌi; ma tamanu na pedu ma watanai, ipowe paꞌai.