Melchizedek, mei Paꞌaa Bauaniaa fei Humuu mei Haidaa
7
Meni Melchizedek, hia mei haparaa Salem ma ana paꞌaa bauaniaa humuu mei Haidaa, mei na Pafeai. Ei fi hadiweꞌimai Abraham aꞌa fei fifoꞌaia, fei hia na muainaa ei hapara, Melchizedek na bapaꞌia ma haweginia 2 ma Abraham na fania hepalo aꞌa hefua wagii minaa ei manumanuna. Hepalo hanuu fei haraa Melchizedek, “mei hapara na wanewane”; ma hepalodiai, “mei haparaa Salem”, hanuna ba “mei haparaa fei gutafarawania.” 3 Lomi na ude fei waꞌafaꞌaia ba hini laguei amana ma inana, o hia nomai aꞌa tamanu wawapuge, haiga i wanini o i maꞌe. Ma Melchizedek, hia ana aleꞌei mei Naꞌuu mei Haidaa ba na oalao hemea paꞌaa bauaniaa humuu mei Haidaa.4 Naramaꞌaia ba hia baua ramaꞌa uaa mei amaa oꞌou Abraham, ana na fania hepalo aꞌa hefua manumanu ina tonia aꞌa fei fifoꞌaia! 5 Fei law na ware ba ei pai Levi, ei roꞌou bauaniaa humuu mei Haidaa, ronei tonaa hepalo aꞌa hefua panii ei ramaꞌa—ei lofuu roꞌou. Faꞌua, ei lofuu roꞌou, pai Abraham, maꞌuaa ronei to aꞌa roꞌou. 6 Ma mei ramaꞌa mei, abaa pai Levi, maꞌuaa ina to hepalo aꞌa hefua i panii Abraham ma na haweginaa mei i tonaa ei faꞌunaia. 7 Ma paꞌaa faꞌua ba mei na paꞌi baua harana i haweginaa hemeadiai. 8 Aꞌa hepalo warea ba, fei hepalo aꞌa hefua, roꞌaa tonia ei foraimanunu; maꞌuaa aꞌa hepalodiai warea, i tonia mei fi gutalao. 9 Fei hanuna aleꞌei ba Levi, mei ba i tonaa fei hepalo aꞌa hefua, na fanaa fei aꞌa Abraham, 10 uaa ei i bapaꞌaa Abraham Melchizedek, Levi ana i laloo iaa upuna.
Jesus Aleꞌei Melchizedek
11 Fei law rona tonia ei ramaꞌa, fafasuina noranamai aꞌa ei pai Levi, ei bauaniaa humuu mei Haidaa. Ma fei maumau ba lomi hepalo tata, nabaa na hawia ba roꞌaa tonaa fei maumau fei, hamatee ei pai Levi, roꞌou bauaniaa humuu mei Haidaa, tani ei ba hemeadiai bauaniaa humuu mei Haidaa i nomai—hemea, maumauna aleꞌei fei mau Melchizedek ma abaa aleꞌei fei mau Aaron? 12 Uaa nabaa i paꞌi filogia aꞌa fei mau bauaniaa humuu mei Haidaa ana nei paꞌi filogia aꞌa fei law. 13 Mei rona warewareia ei manumanu ei, hia maroaa hepalo uꞌugai pai ma aꞌa fei pai fei, lomi hemea roꞌou na bigi aleꞌei bauaniaa humuu mei Haidaa aꞌa fei tawahafi na apunai. 14 Uaa ina arewadii ba mei Fasuu oꞌou, hia pai Judah ma aꞌa fei pai fei, Moses, lomi na ware ba roꞌou bauaniaa humuu mei Haidaa. 15 Ma tamanu ona fiwarewareidigia na arewadiai aꞌa fei noramiaa hemeadiai bauaniaa humuu mei Haidaa aleꞌei Melchizedek, 16 hemea ba fafasui fei bigiꞌana, fei ba hia bauaniaa humuu mei Haidaa, abaa manumanuu ei upuna, maꞌuaa manumanu wagii fei faufau fei harenua lomi i pedutoo. 17 Uaa ina udedii fei warea ba:
“Yoi bauaniaa humuu mei Haidaa ranimai ranimai,
aleꞌei fei mau Melchizedek.”
18 Fei mau bigiꞌa fei famaꞌa, rona madiꞌinia uaa lomi faufauna ma ana lomi bigipaꞌana 19 (uaa fei law, lomi i fanaa fei maumau ba lomi hepalo tata) ma hepalodiai oꞌonaia unu, hepalo na mua laraa fei famaꞌa, nawe nomai ma na forafarafiꞌinaa oꞌou aꞌa mei Haidaa.
20 Ma ina nofininamii fei faꞌunaia! Hefiꞌa, roꞌou bauaniaa humuu mei Haidaa ma lomi faꞌunaia, 21 maꞌuaa hia bauaniaa humuu mei Haidaa aꞌa fei faꞌunaia ei i ware aꞌana mei Haidaa ba:
“Mei Fasu na faꞌunai
ma lomi ba i filoginaa naranarana:
‘Yoi bauaniaa humuu mei Haidaa ranimai ranimai.’”
22 Siꞌei ba aꞌa fei faꞌunaia fei, Jesus, mei i faweꞌiaa fei fiꞌugaia, fei na mua laraa fei famaꞌa.
23 Ma ei bauaniaa humuu mei Haidaa ei, roꞌou watauda, uaa fei maꞌea naꞌaida fapedugaa bigiꞌaa roꞌou; 24 maꞌuaa siꞌei ba Jesus na oalao, fei bigiꞌana ba hia bauaniaa humuu mei Haidaa, lomi i pedutoo. 25 Siꞌei, na hawia ba i fatelapaꞌaa ei roꞌaa dinaa aꞌa mei Haidaaa uaa hia, hamatee fi oalao ba i umuinaa roꞌou.
26 Hia, paꞌaa bauaniaa humuu mei Haidaa aleꞌei na hawia aꞌa oꞌou—uaa na apunai, lomi tatana, na fafaꞌarai, na ude uꞌugai aꞌa ei ramaꞌa hafelo ma na pafeai aꞌa ei manumanuu haroo pafea. 27 Abaa aleꞌei ei paꞌaa bauaniaa humuu mei Haidaa famaꞌa ba minaa ei arewaa roꞌaa foꞌafamaꞌeaa ei manulelele o manufidufidu ba ponoponoo ei hafeloꞌaa ana roꞌou mawe ei hafeloꞌaa ei ramaꞌa. Hia, na ponoꞌaa ei hafeloꞌaa minaa ei ramaꞌa hepoa ua ma na hawia, ei i rawaꞌaꞌafainaa anaia. 28 Uaa fei law na rafeinaa ei ramaꞌa lomi rona faufau ba paꞌaa bauaniaa humuu mei Haidaa; maꞌuaa fei faꞌunaia, fei na nomai nenee fei law, na rafeinaa mei Naꞌu, mei i oalao ma lomi tatana.