6
Siꞌei, oneidii rawaiaa ei madutaa feroia aꞌa ei manumanuu Christ ma tonaa ei manumanuu ei rona aꞌu. Oneiꞌaa bigidinaa fei fasuꞌufufugoi fei filogiaa naranara aꞌa ei mau bigiꞌa,a ei i susuninaa oꞌou maꞌea, fei narafaweꞌia aꞌa mei Haidaa, 2 fei feroiaa pudugufaia, fei augaa pani pafoo hemea, fei asiꞌanaa ei maꞌea ma fei dududua lomi i pedutoo. 3 Ma nabaa i rawani aꞌa mei Haidaa, te owe diꞌininaa eꞌei madutaa manumanu eꞌei.4 Aꞌa ei ronadoꞌo todigaa fei apaꞌa ma fei fana pafea ma oa fininaa fei Spiriti Apuna 5 ma fanunuꞌapaꞌidigaa fei rawaniꞌa wareaa mei Haidaa ma ei faufau wagii fei au ipowe nomai, 6 aꞌa roꞌou, nabaa rona pasi, na paꞌaa waiwai ba roꞌaa filoginaa naranaraa roꞌou, uaa na fanunu aleꞌei ba roꞌaab fatawadinaa mei Naꞌuu mei Haidaa ma famamafaia pudaa ei ramaꞌa.
7 Mei Haidaa na haweginaa fei peꞌihape, fei na aida ropa pafona maunu ma na fani duꞌua aꞌa ei ro peꞌihapeia. 8 Maꞌuaa fei peꞌihape na habe ei wowoꞌii na hogia ma ei guana, lomi na rawani ma aleꞌei ba na oadiginaa fei guꞌua. Nefarani iwe guꞌa.
9 Ena paꞌaa tafii haiꞌou, haiꞌouna ware aleꞌei, na? Maꞌuaa napaꞌaa oꞌonai unuu haiꞌou ba hamowe tonaa ei rawaniꞌa, aleꞌei ei manumanu i nofipuimai aꞌa fei telaꞌana. 10 Fei dududuaa mei Haidaa na wanewane ua; lomi ba i madiꞌinaa fei bigiꞌaa hamuꞌou ma fei hagua, fei hamona famaꞌaia ei hamoꞌaa hadumaa ei apunaiana ma ana hamoꞌei hadumaa roꞌou eꞌeni. 11 Haiꞌouna nunuminaa hememea hamuꞌou ba nei famaꞌaiaa fei weweaa mau bigiꞌa nopaꞌaloo fei aꞌapoo, ba neimina weꞌi fei oꞌonaia unuu hamuꞌou. 12 Lomi haiꞌouna nunuminia ba hamonei tamafoi, maꞌuaa hamonei neneraa fei maumau ei rona tonaa tamanu mei Haidaa na faꞌunainia, uaa na weꞌi naranaraa roꞌou ma rona ofasiꞌia.
I Paꞌaa Nomai fei Warefaꞌunaiaa mei Haidaa
13 Mei Haidaa, ei i faꞌunai aꞌa Abraham, siꞌei ba lomi hemeadiai na muainaa mei Haidaa, ina faꞌunainaa anaia 14 ma na ware, “Apaꞌaa haweginio ma fani watauda paimu.” 15 Ma siꞌei ba Abraham na gutafawiwiꞌai, inawe tonaa tamanu mei Haidaa na faꞌunainia aꞌana.
16 Ei ramaꞌa, roꞌaa faꞌunainaa fei hara na raraba aꞌa roꞌou ma ei faꞌunaia ei, i faꞌarewaia ba faꞌua ma na fapedugaa ei fihareia. 17 Siꞌei ba mei Haidaa i faꞌarewaiaa fei nunumiana, fei lomi ba i filoginia, aꞌa ei ba roꞌaa tonaa fei faꞌunaia, ina faꞌunai aꞌa fei harana. 18 Mei Haidaa na bigiꞌaa guapaloei manumanu gupaloei ma siꞌei ba lomi na hawia ba mei Haidaa i warefasifi, ina bigiꞌia aꞌa oꞌou ena oꞌaa panarofaa fei oꞌonaia unu ba i faweꞌiaa fei oꞌonaia unuu oꞌou. 19 Fei oꞌonaia unuu oꞌou, aleꞌei hepalo rarabaa hipo ba fei naranaraa oꞌou neiꞌaa lafe. Ma fei oꞌonaia unu na ude laloo fei pusuꞌo humu i laloo fei humuu mei Haidaa, petoo fei rapirapi, 20 fei na waduꞌia Jesus mei nadoꞌo nolao maꞌaa oꞌou ba i fawanewaneaa oꞌou. Inawe noꞌoanaloo hemea paꞌaa bauaniaa humuu mei Haidaa aleꞌei fei mau Melchizedek.