5
Minaa ei paꞌaa bauaniaa humuu mei Haidaa, rafeiaa roꞌou dupuaa ramaꞌa ma roꞌou aleꞌei umuiaa ei ramaꞌa aꞌa ei manumanuu mei Haidaa ba ronei fani fanaa roꞌou ma foꞌafamaꞌeaa ei manulelele, o manufidufidu ba ponoꞌaa ei hafeloꞌaa roꞌou. 2 Ina hawia ba i hadufagiginaa ei polataba ma ei rona pasipaꞌai, uaa hia ana na faꞌasisiaa fei naranarana. 3 Sifei fei paꞌafina ba inei fani fana aꞌa ei hafeloꞌana ma ei hafeloꞌaa ei ramaꞌa.4 Lomi nemea ana unaia ba i tonaa fei bigiꞌa fei; mei Haidaa nei rafeinia ana aleꞌei i rafeinaa Aaron. 5 Ma Christ, ana lomi na tonaa fei hawera anaia ba hia paꞌaa bauaniaa humuu mei Haidaa, maꞌuaa mei Haidaa na warenaa aꞌana,
“Yoi, Naꞌuu;
wagieni, una oanaa Amamu.”a
6 Ma ana ina ware ba,
“Yoi paꞌaa bauaniaa humuu mei Haidaa ranimai ranimai,
ana aleꞌei fei mau paꞌaa bauaniaa humuu mei Haidaa
aleꞌei fei mau na paꞌi Melchizedek.”
7 Ei i tatalai yeni malagufu Jesus, ina lafulafunaa pafea ma iꞌigai fininaa baua aiꞌaiga ma ranu pudana aꞌa mei i fatelapaꞌia aꞌa fei maꞌea ma siꞌei ba ina fafefe fininaa maꞌaua, mei Haidaa na guainia. 8 Faꞌua ba hia naꞌu, maꞌuaa aꞌa fei fiꞌiana, ina tonaa fei mau guaiawarea wagina 9 ma ei i fapedudigaa minaa ei bigiꞌana, ina oa aleꞌei fasuu fei telaꞌana, fei i fanaa fei harenua lomi i pedutoo aꞌa ei rona guainaa wareana, 10 ma mei Haidaa na rafeinia ba hia paꞌaa bauaniaa fei humuna ana aleꞌei fei mau na paꞌi Melchizedek.
Warefaꞌaia ba Oneiꞌaa Pasi
11 Haiꞌouna paꞌi watauda warea wagina, maꞌuaa na hafafalaꞌai uaa na waiwai tabaa hamuꞌou. 12 Ma hepalodiai—eꞌeni hamona hawidigia ba hamoꞌaa feroi, maꞌuaa agia, hamonei paꞌi hemeadiai ba i feroidinaa hamuꞌou aꞌa ei madutaa wareaa mei Haidaa ei na faꞌuai. Hamoꞌei hunu pao susu abaa weꞌia duꞌua! 13 Hini i hunu pao susu aleꞌei ei baduu, lomi ina aida fei feroia aꞌa tamanu ina wanewane. 14 Maꞌuaa fei weꞌia duꞌua, manumanuu ei rona aꞌu, ei rona feroinaa ana roꞌou aꞌa tamanu na rawani ma tamanu na hafelo.