Hepalo Sabbath Fawenaia aꞌa ei Ramaꞌaa Gufuu mei Haidaa
4
Siꞌei, ba fei faꞌunaiaa fei gutafawenaiana ana fi ude, onei omaꞌaiaa oꞌou ba nemea oꞌou neiꞌaa tauhafo wagina. 2 Uaa oꞌou anaa, hefiꞌa na uꞌufanaa oꞌou fei rawaniꞌa warea hefiꞌa, ana aleꞌei roꞌou; maꞌuaa fei uꞌuga rona guainia, lomi hanuna aꞌa roꞌou, uaa ei roꞌaa guainia, lomi rona narafaweꞌi wagina.a 3 Ma oꞌou eꞌeni na narafaweꞌi, ona tonaa fei gutafawenaia, ana aleꞌei i ware mei Haidaa ba,“Siꞌei, una faꞌunai aꞌa fei sibau ba,
‘Lomi roꞌawe tonaa fei gutafawenaiau.’”
Maꞌuaa fei bigiꞌana na pedu aꞌa fei mamaraiamii feni ano. 4 Uaa inadii wareaa fei faꞌolorompaloaa arewaa aꞌa eni paolaa warea eni: “Ma laloo fei faꞌolorompaloaa arewaa, mei Haidaa na gutafawenai aꞌa minaa ei bigiꞌana.” 5 Ma laloo fei neꞌia fei, ina warediai ba, “Lomi roꞌawe tonaa fei gutafawenaiau.”
6 Ana fi ude ba hefiꞌa roꞌawe tonaa fei gutafawenaia ma ei ronadoꞌo guainaa fei rawaniꞌa warea, lomi rona tonia, uaa fei barafeaa roꞌou. 7 Siꞌei, mei Haidaa na bigidinaa hepalo arewaa ma roroinia ba Wagieni, ei i umuinaa umuna David mina aleꞌei:
“Wagieni nabaa hamona guainaa fei laona,
abaa fawaiwaiana ei tabaa hamuꞌou.”
8 Uaa nabaa Joshua na fani gutafawenaiaa roꞌou, mei Haidaa lomi ba iwe warewaredinaa hepalodiai arewaa. 9 Siꞌei, ifi ude hepalo Sabbath gutafawenaia aꞌa ei ramaꞌaa gufuu mei Haidaa; 10 uaa hini i tonaa fei gutafawenaiaa mei Haidaa, ana i gutafawenai aꞌa fei bigiꞌana, ana aleꞌei mei Haidaa na gutafawenai aꞌa fei bigiꞌana. 11 Siꞌei, oneiminapaꞌaa tonaa fei gutafawenaia ba lomi nemea i neneraa fei mau barafeaa roꞌodu ma pasi.
12 Uaa fei wareaa mei Haidaa na paꞌi harenuana ma ana fi bigi. Ma na wararodiai laraa fei wadu, fei na guapaloi umuna ma na motafalaraa laloo spiritii ramaꞌa ma laloo iaa roꞌou mawe ei figuguꞌui ma gui; ma ina unia ba batanai ei naranara ma maumau laloo iaa ramaꞌa. 13 Lomi hepalo manumanu aꞌa minaa ei famamaraiaa mei Haidaa ba na ude opaꞌai pudana. Minaa ei manumanu na udeꞌareꞌare ma arere ua i pudaa mei ba i dududuaa oꞌou.
Jesus, mei Paꞌaa Bauaniaa fei Humuu mei Haidaa
14 Siꞌei ba ona paꞌi hemea paꞌaa bauaniaa fei humuu mei Haidaniaa oꞌou, mei na talainaa haroo pafea,b Jesus, mei Naꞌuu mei Haidaa, onei utaufaweꞌi fininaa fei narafaweꞌia, fei ona wareia ba ona paꞌi. 15 Uaa ona paꞌi hemea paꞌaa bauaniaa humuu mei Haidaa ba i faloloaꞌihugiaa oꞌou aꞌa ei asisiaa naranaraa oꞌou, hemea na todigaa minaa ei manimania ana aleꞌei oꞌou—maꞌuaa lomi hepalo hafeloꞌana. 16 Siꞌei, onei aunu fininaa lauguꞌaa oꞌou aꞌa fei gutanaa hapara, fei i ude wagina fei rawaniꞌa ba o tonaa fei faloloaꞌiana ma fei rawaniꞌana ba i hadumaa oꞌou aꞌa fei au ona gutafafelo.