Jesus na Pafeai Laraa Moses
3
Siꞌei, hamuꞌou ena fafaꞌarai lofu, hamuꞌou ena na oa aꞌa fei haroharofa pafea, hamonei augaa ei naranaraa hamuꞌou aꞌa Jesus, mei apostle, mei paꞌaa bauaniaa humuu mei Haidaa, mei ona ware ba ona narafaweꞌi aꞌana. 2 Hia na wewea aꞌa mei i rafeinia ana aleꞌei Moses na wewea aꞌa minaa ei manumanu laloo fei humuu mei Haidaa. 3 Ona fanunuꞌapaꞌidigia ba Jesus, na honuadiai laraa Moses, ana aleꞌei mei fadufadua na rarabadiai laraa fei faduana humu. 4 Uaa minaa ei humu na paꞌi ramaꞌa faduaa roꞌou, maꞌuaa mei Haidaa, hia mei na famamaraa minaa ei manumanu. 5 Moses hemea wewea nafi aꞌa minaa ei manumanu laloo fei humuu mei Haidaa ma nadii wareaa tamanu ba i nomai hinene. 6 Maꞌuaa Christ hemea wewea naꞌu ba i omaꞌaa fei humuu mei Haidaa. Ma oꞌou fei humuna nabaa oꞌaa utaufaweꞌiaa fei lauguꞌa ma fei oꞌonaia unu, fei ona ware ba ona paꞌi. Warefaꞌaia ba Onei Narafaweꞌi
7 Siꞌei, ana aleꞌei fei wareaa fei Spiriti Apuna ba:
“Wagieni nabaa hamoꞌaa guainaa fei laona,
8 abaa fawaiwaiana ei tabaa hamuꞌou
aleꞌei fei au fadugeaa hamuꞌou
aꞌa fei manimania fawelei lomi haihai o guana,
9 yei ei amaa hamuꞌou rona manimaniau ma fahauaa unuu
ma laloo gunaroa paꞌania igisimasi,
hamona fanunuaa tamanu una bigiꞌia.
10 Sifei, fei i fasibaiau aꞌa fei tawe i didii,
ma una ware ba, ‘Ranimai ei naranaraa roꞌou na aunu faraua
ma lomi rona apaꞌaa ei maumauu.’
11 Siꞌei, una faꞌunai aꞌa fei sibau ba,
‘Lomi roꞌawe tonaa fei gutafawenaiau.’”
12 Hamuꞌou ena lofuu, hamonei omaꞌaa hamuꞌou ba nemea neiꞌaa paꞌi fei hafeloꞌa hamamagua naranara, fei na ofadugaa mei Haidaa, mei fi oalao. 13 Maꞌuaa hamonei faweꞌiaa naranaraa hememea hamuꞌou aꞌa hepapalo arewaa, sifei ona ware ba Wagieni, siꞌei abaa fawaiwaianaa tabana nemea hamuꞌou aꞌa fei mau sifisifi ei hafeloꞌa. 14 Oꞌaa oafipui aꞌa Christ nabaa ona utaufaweꞌinaa fei lauguꞌaa oꞌou nopaꞌaloo fei aꞌapoo arewaa, fei onadoꞌo paꞌi famaꞌa. 15 Ana aleꞌei fei warea ba,
“Wagieni nabaa hamona guainaa fei laona,
abaa fawaiwaiana ei tabaa hamuꞌou
aleꞌei fei au fadugeaa hamuꞌou.”
16 Hini ei rona guai ma rona faduge? Aꞌa ba ei i talaidugamiaa roꞌou Egypt Moses? 17 Ma aꞌa hini ei ina siba aꞌa roꞌou laloo gunaroa paꞌania igisimasi? Aꞌa ba ei ramaꞌa rona bigiꞌaa ei hafeloꞌa ma ei hudi unuu roꞌou na pasi fawelei lomi haihai o guana? 18 Ma aꞌa hini ei mei Haidaa na warefaꞌuai aꞌa roꞌou ba lomi roꞌawe tonaa fei gutafawenaiana? Ina wareaa eꞌei aꞌa ei barafea.a 19 Siꞌei, ona fanunuꞌapaꞌia ba lomi rona tonia, uaa na waiwai tabaa roꞌou.