Ei Wareꞌaweia ba Onei Guai Faꞌarai
2
Oneipaꞌa fafalanaa huoo oꞌou aꞌa tamanu ona guainia ba lomi o lafepaꞌai. 2 Uaa tamanu rona wareia ei aloꞌalo, oneiꞌaa barafeia ma minaa ei barafea ma ei lomi rona guaipaꞌi warea, i paꞌi aree roꞌou. 3 Ma nabaa aleꞌei, batanai oꞌaa tela nabaa lomi ona fafalanaa huoo oꞌou fei baua telaꞌana? Fei telaꞌana fei, nadoꞌo uꞌugia mei Fasu ma ei rona guainia aꞌana, rona ware ba paꞌaa faꞌua fei. 4 Mei Haidaa ana na faꞌarewaia aꞌa ei hilala, ei fananawalaa puda ma ei mau foigia ma ana ina faꞌarewaia aꞌa ei fanaa fei Spiriti Apuna, ei i alaginia aleꞌei nunumiana. Jesus Aleꞌei ei Lofuna
5 Aꞌa ba ina augaa ei aloꞌalo ba ronei omaꞌaa fei ano ba i nomai hinene, fei ona fiwarewareinia. 6 Maꞌuaa ina paꞌi hepalo neꞌia, ba hemea na ware aleꞌei:
“Mena Haidaa, hia tamanu hemea ramaꞌa,
o hemea naꞌuna
ba omina fafalanaa huomu
ma naranaraa watauda ma omaꞌafarawaninia?
7 Ona fafafauia maꞌidaa aꞌa ei aloꞌalo;
ona taonaa hia fei hawera ma maꞌaua
8 ma ona augaa minaa ei manumanu haroo pinena.”
Ei i augaa minaa ei manumanu haroo pinena, lomi na diꞌaugaa hepalo dufu Ma eꞌeni otawe fanunupaꞌia ba minaa ei manumanu na udenaa panina. 9 Maꞌuaa ona fanunuaa Jesus, mei inadoꞌo fafafauia maꞌida laraa ei aloꞌalo ma eꞌeni na taonaa fei hawera ma honua uaa ina tonaa fiꞌina aꞌa fei maꞌea ba aꞌa fei rawaniꞌaa mei Haidaa, iwe nanamuinaa fei maꞌea uaa minaa ei ramaꞌa.
10 Ina fanoraloo watauda naꞌu aꞌa fei hawera ma napaꞌaa rawani ba mei Haidaa, mei na bigiꞌaa minaa ei manumanu ba manumanuna, ba i fafafaꞌarainaa mei fafasui fei telaꞌanaa roꞌodu aꞌa fei fiꞌia. 11 Minaa roꞌou laloo hepalo ua wawapuge—mei na fafafaꞌarainaa ei ramaꞌa ma ei rona tonaa fei fafaꞌaraia. Jesus, lomi na mamafa ba i ware ba roꞌou, lofuna. 12 Siꞌei, i ware ba,
“A wareaa fei haramu aꞌa ei lofuu;
i aꞌa fei gupuu ei losuia, a laugitenio.”
13 Ma hepalodiai,
“A augaa fei naranarau i aꞌana.”
Ma ana ina ware ba,
“Yau, yeni fipui aꞌa ei naꞌu, ei na fanau mei Haidaa.”
14 Siꞌei ba ei naꞌu, rona paꞌi pigio ma raraa, hia ana aleꞌei roꞌou ma aꞌa fei maꞌeana i foꞌafamaꞌeaa mei na panarofaa fei faufau fei maꞌea, mei haniꞌu 15 ma alaraa ei rona humuwaimai nopaꞌaloo fei ba rona ala aꞌa fei maꞌauaa roꞌou fei maꞌea. 16 Uaa aꞌa ba i hadumaa ei aloꞌalo, maꞌuaa ei pai Abraham. 17 Sifei fei paꞌafina ba hia ana aleꞌei ei lofuna aꞌa minaa ei maumau roꞌou, ba inei paꞌi faloloaꞌiana ma nei bigifarawani ua ei i tonaa fei bigiꞌa ba hia mei paꞌaa bauaniaa humuu mei Haidaa aꞌa fei bigiꞌaa mei Haidaa ma wagii fei namona i ponoꞌaab ei hafeloꞌaa ei ramaꞌa. 18 Siꞌei ba anaia, na nanamuinia ei i oa aꞌa fei manimania, ina hawia ba i hadumaa ei roꞌaa oa aꞌa fei manimania.