HEBREWS
Mei Naꞌu na Pafeainaa ei Aloꞌalo
1
Aꞌa ei mamamaꞌa mina, mei Haidaa na warenaa aꞌa ei amaa oꞌou watauda au ma wagii hefiꞌa tala; 2 maꞌuaa laloo eni aꞌapoo arewaa eni, ina warenaa aꞌa oꞌou aꞌa mei Naꞌuna, mei ba ipowe tonaa minaa ei manumanu, mei i aꞌana na bigiꞌaa minaa ei manumanu haroo pafea. 3 Mei Naꞌu, hia aleꞌei fei haweraa mei Haidaa ma hia paꞌaa maumau fei maumauna ma ba i fani haduma aꞌa minaa ei manumanu wagii fei wareana, fei na faufau. Nenee fei fafafaꞌaraiana ei hafeloꞌaa ei ramaꞌa, inawe guta pepei maꞌau mei Hapara pafea. 4 Siꞌei, hia napaꞌaa pafeai laraa ei aloꞌalo ana aleꞌei fei hara i tonia, na muainaa ei haraa roꞌou.5 Hamatee, aꞌa hini aloꞌalo mei Haidaa na ware aleꞌei ba,
“Yoi, Naꞌuu;
wagieni, una oanaa Amamu”?a
O, ba,
“Yau, awe oanaa Amana,
ma hia, iwe oanaa Naꞌuu”?b
6 Ma hepalodiai, mei Haidaa, ei i fatoroaa mei umaꞌua naꞌuna yeni malagufu ina ware ba,
“Minaa ei aloꞌaloo mei Haidaa, ronei uduginia.”c
7 Mei Haidaa na uꞌugaa ei aloꞌalo aleꞌei ba,
“Na bigiꞌaa ei aloꞌalona aleꞌei lalarena,
ma ei nafina aleꞌei fei weguweguaa hafi.”
8 Maꞌuaa ina uꞌugaa mei Naꞌuna aleꞌei ba,
“Mena Haidaa, fena gutanamu, gutanaa hapara,
imina udelao ranimai, ranimai,
ma o haparai fininaa wanewanea.
9 Yoi, ona haguaa fei wanewanea ma fabidinaa unumu ei hafeloꞌa;
siꞌei, yau, meni Haidaniamu, una fapafeainio aꞌa ei tafimu,
ei a ipiaa fei pao niꞌeniꞌea aꞌamu.”
10 Ana ina ware ba,
“Aꞌa fei rawarawa, mena Fasu, ona augaa fei fasuꞌufufugoi feni malagufu,
ma ei manumanu haroo pafea, bigiꞌaa panimu.
11 Roꞌapowe apaꞌai, maꞌuaa yoi, o oalao;
minaa ei manumanu ei, roꞌaa madige aleꞌei lawalawa.
12 Oꞌaa duꞌumaa roꞌou aleꞌei hawaa ugu;
ana aleꞌei lawalawa roꞌaa filogii.
Maꞌuaa yoi, ana minaa aleꞌei,
ma ei igisimasimu, lomi i pedutoo.”
13 Mei Haidaa, lomi na ware aꞌa hemea aloꞌalo aleꞌei ba,
“Guta i pepei maꞌauu
nopaꞌaloo fei ba unawe aunaa ei bidibidii unumu
lalabeni pinemu”?
14 Haa, aꞌa ba minaa ei aloꞌalo aleꞌei spiritii omaꞌamaꞌaa ma ina aloaa roꞌou ba ronei hadumaa ei ba roꞌaa tonaa fei telaꞌana?