15
Oꞌou, eni na weꞌi naranaraa oꞌou nei fawiwiꞌainaa ei na adudu ei naranaraa roꞌou ma abaa faniꞌeniꞌeaa ana oꞌou. 2 Hememea oꞌou nei faniꞌeniꞌeaa mei gufuna ba i farawaninia ma faweꞌia. 3 Uaa Christ ana lomi na faniꞌeniꞌeaa anaia, maꞌuaa ana aleꞌei fei neꞌaia: “Ei warefafeloa, ei rona wareia aꞌamu, na pasinaa pafou.” 4 Uaa minaa ei manumanu rona neꞌinia mina, rona neꞌinia ba i feroinaa oꞌou ba wagii fei apitaia ma fei faꞌunuwenuweaa fei Buꞌu Apuna, oꞌaa paꞌi oꞌonaia unu. 5 Ma nunumiau ba mei Haidaa, mei i faꞌunaꞌanaa naranaraa hamuꞌou ba fei mau spiritii hamuꞌou aleꞌei ba hamoꞌaa apitaifipui, ei hamoꞌaa neneraa Christ Jesus 6 ba aꞌa hepalo ua naranara ma hepalo ua umu, hamoꞌaa uduginaa mei Haidaa, mei Amaa mei Fasuu oꞌou, Jesus Christ.
7 Hamonei taufagutanaa ana hamuꞌou, ana aleꞌei Christ na fagutanaa hamuꞌou siꞌei ba mei Haidaa i to udugiana wagina. 8 Uaa a warefanaa hamuꞌou ba Christ na fanafinaa anaia aꞌa ei Jewa ba i bigiꞌaa tamanu mei Haidaa na faꞌunainia aꞌa ei ama mina 9 ba ei Gentile, roꞌaa uduginaa mei Haidaa uaa fei faloloaꞌiana, aleꞌei rona neꞌinia:
“Siꞌei, a uduginio dupuaa ei Gentile;
a laugaa ei lauga aꞌa fei haramu.”
10 Na warediai ba:
“Hamuꞌou ena Gentile, hamonei niꞌeniꞌefipui aꞌa ei ramaꞌaa gufuna.”
11 Ma na warediai,
“Minaa hamuꞌou ena Gentile, uduginaa mei Fasu
ma minaa hamuꞌou ena ramaꞌa nei laugiꞌuduginia.”
12 Ma na warediai Isaiah,
“Fei Waraa Jesse, iwe nusu,
hemei i asiꞌaa ba i famamoaa ei baua gufu;
ei Gentile iwe oꞌonai unuu roꞌou aꞌana.”
13 Nunumiau ba mei Haidaniaa fei oꞌonaia unu, neimina fani niꞌeniꞌea ma gutafarawania aꞌa hamuꞌou, ei hamona aunaa naranaraa hamuꞌou aꞌana ba hamuꞌou aleꞌei hepalo peꞌi na mereꞌesuꞌesu aꞌa fei oꞌonaia unu, fei na nofininamii fei faufau fei Spiriti Apuna.
Paul mei Bigibigiꞌa yei aꞌa ei Gentile
14 Ena lofuu, unapaꞌaa aida ba ana hamuꞌou namina rawani, namina bauanai apaꞌaa hamuꞌou ma na hawiaa hamuꞌou feroiaa ana hamuꞌou. 15 Una neꞌifaweꞌi wagii hefiꞌa manumanu ba a fanonomidinaa hamuꞌou hamatee na fanau fei rawaniꞌa fanaa mei Haidaa 16 ba unei bigiꞌaa fei bigiꞌaa Christ Jesus aꞌa ei Gentile wagii fei bigiꞌaa ei bauaniaa humuu mei Haidaa ba unei uꞌugaa fei rawaniꞌa wareaa mei Haidaa ba ei Gentile, roꞌou aleꞌei fana aꞌa mei Haidaa ba i apunainaa roꞌou fei Spiriti Apuna.
17 Siꞌei ba aꞌa Christ Jesus, una upeꞌupei wagii fei bigiꞌau aꞌa mei Haidaa. 18 Lomi a wareaa hepalo manumanu, maꞌuaa ana ei bigiꞌaa Christ aꞌau, fei a unifanaa ei Gentile ba ronei guainaa mei Haidaa wagii ei una wareia ma bigiꞌia, 19 wagii fei faufau ei hilala ma ei foigia aꞌa fei faufau fei Spiriti. Siꞌei, yei Jerusalem ma nopaꞌalao yei Illyricum, unamina warepedugaa fei rawaniꞌa wareaa Christ. 20 Mina ranimai, nunumiau ba unei uꞌugaa fei rawaniꞌa wareaa Christ fawelei rotaa apaꞌaa Christ ba lomi a fadufadu pafoo fei bigiꞌaa hemeadiai. 21 Maꞌuaa ana aleꞌei fei neꞌaia:
“Ei lomi rona guainaa fei uꞌugana, rowe maꞌapaꞌia
ma ei lomi rona u guguai, iwe arewa aꞌa roꞌou.”
22 Sifei fei paꞌafina ba nafaneꞌo lawagi fei talau ba a nomai aꞌa hamuꞌou.
Fei Naranaraa Paul ba i Dinaa Rome
23 Hamatee lomidiai bigiꞌau faweleni ma hamatee ude nunumiau watauda igisimasi ba a maꞌa hamuꞌou, 24 una nara ba a bigiꞌia ena una dinaa Spain. Nunumiau ba a maꞌa hamuꞌou ena una nowau yena ma ba hamonei hadumau aꞌa fena tatalaiau yena ma ba oꞌou doꞌo gutawiwiwidi maꞌida. 25 Maꞌuaa eꞌeni, a dinaa Jerusalem ba adoꞌo hadumaa ei apunaiaa mei Haidaa yei. 26 Uaa ei Macedonia ma ei Achaia, rona niꞌeniꞌe hamatee rona fani haduma aꞌa ei apunaiaa mei Haidaa yei Jerusalem, ei lomi rona paꞌi manumanu. 27 Rona niꞌeniꞌe ba rona bigiꞌia ma ana faꞌua ba ronei bigiꞌia. Uaa nabaa ei Gentile, rona to ei hawegiaa fei spiriti aꞌa ei Jew, ana na rawani ba ronei hadumaa ei Jew aꞌa ei manumanuu malagufu. 28 Siꞌei, ena na bigidigaa feni bigiꞌa feni ma na aidadii ba rona todigaa fei fua fei, yau a dinaa Spain ma ena na tatalailao, awedoꞌo maꞌa hamuꞌou. 29 Una aida ba ena na nomai aꞌa hamuꞌou, awe nofininamii minaa ei hawegiaa Christ.
30 A warefaweꞌi aꞌa hamuꞌou ena lofuu, aꞌa mei Fasuu oꞌou Jesus Christ ma wagii fei haguaa fei Spiriti ba hamonei oafipui aꞌau ma lafulafunaa aꞌa mei Haidaa ba nei hadumau wagii fei oteꞌoteiau. 31 Lafulafu ba unei tela aꞌa ei abaa narafaweꞌia yei Judea ma ba fei bigiꞌau i Jerusalem nei rawani i pudaa ei apunaiaa mei Haidaa yei 32 ba aꞌa fei nunumiaa mei Haidaa, yau a noniꞌeniꞌemai ma gutafipui aꞌa hamuꞌou ma gutafawenai. 33 Mei Haidaniaa fei gutafarawania i oafipui aꞌa minaa hamuꞌou. Amen.