Ei Pududuu ma ei Faufaua
14
Fanunufarawani aꞌa mei lomi napaꞌaa weꞌi naranarana ma apuna hararasinia ma fiharei aꞌa ei manumanu lomi na arewa. 2 Fei weꞌiaa naranaraa hemea ramaꞌa, na ugainia ba i hanaiaa minaa ei manumanu, maꞌuaa hemea ramaꞌa, lomi na weꞌi naranarana, i hanana ua ei manumanu i habe peꞌihape. 3 Mei i hanaiaa minaa ei manumanu neiꞌaa fanunufafelo aꞌa mei lomi i hanaiaa minaa ei manumanu ma mei lomi i hanaiaa minaa ei manumanu neiꞌaa hararasinaa mei i hanaiaa minaa ei manumanu, uaa hia na rawani pudaa mei Haidaa. 4 Yoi hini ba oꞌaa fanunufafelo aꞌa mei nafii hemeadiai? Aꞌa mei fasuna ua, i ufalarai, o i pasi. Ma iwe ufalarai uaa mei Fasu na hawia ba i faꞌufalarainia. 5 Hemea ramaꞌa i nara ba hepalo arewaa na apunaidiai laraa hefiꞌadiai arewaa; hemea na nara ba minaa ei arewaa, fiminaꞌei ua. Hememea neiꞌaa hamamagua fei naranarana. 6 Mei i nara ba hepalo arewaa na ude uꞌugai na bigiꞌia ba manumanuu mei Fasu. Mei na hana pigio na bigiꞌia ba manumanuu mei Fasu, uaa ina ware ‘ta’ aꞌa mei Haidaa ma mei lomi i hanaia, na bigiꞌia ba manumanuu mei Fasu ma ina ware ‘ta’ aꞌa mei Haidaa. 7 Uaa lomi hemea oꞌou ba i guta anaia o maꞌe anaia. 8 Nabaa o bigiꞌaa hepalo manumanu, onei bigiꞌia ba manumanuu mei Fasu ma nabaa o maꞌe, ana manumanuu mei Fasu. Siꞌei, nabaa oꞌou gutana o maꞌea, manumanuu mei Fasu.
9 Sifei, fei hanuna ba Christ na maꞌe ma hadiweꞌimai ba i tohadiweꞌidinaa fei harenuana. Ba hia, Fasuu ei maꞌea mawe ei rona gutaguta. 10 Ma yoi, tani o fanunufafelo aꞌa mei lofumu? Ma tani o fafeloaa mei hamugua ma aunaa hia pu? Uaa, minaa oꞌou, owe ufalarai i maꞌaa fei gutanaa mei Haidaa na fadududu. 11 Rona neꞌinia ba:
“‘Hamona aidafarawani ba una oa ma ana,
hamonei aida ba minaa ei ramaꞌa,
ropowe faꞌunaa duꞌuu roꞌou i igoau;
minaa ei ramaꞌa, ropowe ware ba Yau Haidaa.’”
12 Siꞌei, hememea oꞌou, ipowe u i maꞌaa mei Haidaa ma warefania batanai ei maumauna.
13 Siꞌei, oneiꞌaa bigidinaa fei finarafafeloia. Agia, hamonei narafarawani ba oneiꞌaa augaa ei alabeꞌa, lawaraa fei talaa mei lofumu. 14 Yau hemea na oafipui aꞌa mei Fasu Jesus ma naminapaꞌaa aidamaꞌa ba lomi hepalo duꞌuaa na hafelo anaia. Maꞌuaa, nabaa hemea na nara ba hepalo manumanu na hafelo, te, aꞌana na hafelo. 15 Nabaa mei lofumu i naranara watauda aꞌa tamanu ona hanaia, fai lomi ona haguia. Aꞌa tamanu ei hanamu, apuna fafeloaa mei lofumu, mei i maꞌe aꞌana Christ. 16 Tamanu ona nara ba na rawani, hefiꞌadiai roneiꞌaa warefafeloio wagina. 17 Uaa fei haparaiaa mei Haidaa, abaa aꞌa ei ona hanaia o hunumia, maꞌuaa fei wanewanea, fei gutafarawania ma fei niꞌeniꞌea aꞌa fei Spiriti Apuna, 18 uaa mei i bigiꞌaa fei bigiꞌaa Christ aleꞌei na faniꞌeniꞌeaa mei Haidaa. Ma ei ramaꞌa, rona aida ba na wanewane.
19 Siꞌei, onei bigiꞌaa ei i noduginaa oꞌou aꞌa fei gutafarawania ma fei na farawaninaa oꞌou. 20 Apuna fafeloaa fei bigiꞌaa mei Haidaa aꞌa ei duꞌua. Minaa ei duꞌua na rawani, maꞌuaa, lomi na rawani ba hemea i hanaiaa ei i faꞌalabeꞌaa hemeadiai. 21 Na rawani ba oneiꞌaa hana pigio, o hunu wine, o bigiꞌaa hepalodiai manumanu i fapasiaa mei lofumu.
22 Siꞌei, tamanu naramu aꞌa ei manumanu ei, otoꞌuaia aꞌamu ma mei Haidaa. Na paꞌi hawegiana mei lomi i fafeloaa anaia aꞌa tamanu na bigiꞌia. 23 Maꞌuaa mei i hamamagua naranarana aꞌa ei na hanaia, na todigaa hafeloꞌana, uaa ei hanaiana abaa wagii fei narafaweꞌia ma tamanu abaa noranamai wagii fei narafaweꞌia, na hafelo.