Fafefenaa ei Bauaniaa Gufu
13
Minaa ei, ronei fafefenaa ei bauaniaa gufu, uaa lomi i paꞌi hemea bauana nabaa abaa augaa mei Haidaa. Ei bauana, ei roꞌaa guta, augaa mei Haidaa. 2 Siꞌei, hini i fadugeaa ei bauana na fadugeaa mei augaa mei Haidaa. Ma ei roꞌaa bigiꞌia aleꞌei, ana roi to ua aree roꞌou aꞌa fei dududua. 3 Uaa ei bauana, lomi roꞌaa famamaꞌauaa ei rona bigiꞌaa ei rawaniꞌa, maꞌuaa ei rona bigiꞌaa ei hafeloꞌa. Numiamu ba oꞌaa ala aꞌa fei famamaꞌauaa ei bauana? Te, onei bigiꞌaa tamanu na wanewane ma iwe ware ba yoi, rawaniꞌa ramaꞌa. 4 Uaa hia, nafii mei Haidaa ba i bigiꞌaa ei rawaniꞌa aꞌamu. Maꞌuaa, nabaa o bigifafelo, onei maꞌau, uaa lomi i panaroꞌuaiaa fei wadu. Hia nafii mei Haidaa, hemea bigiꞌa aꞌa fei sibaa mei Haidaa ba i fanimaꞌaiaa mei i bigiꞌaa ei hafeloꞌa. 5 Siꞌei, onei fafefenaa ei bauana ba lomi roꞌaa fanimaꞌaio ma ona aida ba fei na wanewane.6 Sifei, fei paꞌafina ba onei fani mugoo poꞌi aꞌa gavaman, uaa ei bauana, nafii mei Haidaa, ei rona fanaa minaa ei au roꞌou ba ro omaꞌaiaa fei gufu. 7 Onei fanaa minaa ei ramaꞌa tamanu onadoꞌo toꞌuaia aꞌa roꞌou: nabaa onei fani mugoo poꞌi aꞌa gavaman, fania; nabaa mugoo poꞌi aꞌa tamanu ona aloia, te fania; nabaa onei maꞌauaa nemea, maꞌauia; nabaa onei fani honua, fania.
Hamonei Fihagui Uaa fei Arewaa na Rafiꞌi
8 Nabaa hamona paꞌi hepalo manumanu hamonadoꞌo toꞌuaia, apuna auꞌuaia aleꞌei—maꞌuaa sifei ua nei ude aꞌa hamuꞌou, fei haguaa hememea, uaa hini i haguaa hemeadiai, na nenegidigaa fei law. 9 Fei law ba, “Apuna fiharoharoipaꞌai,” “Apuna foꞌafamaꞌe,” “Apuna fafanao,” “Apuna nanamai,” ma tamanudiai na apunai aꞌa fei law na ude i laloo hepalo ua law: “Haguaa mei gufumu ana aleꞌei ona haguio.” 10 Mei i paꞌi hagua, lomi i fafeloaa mei gufuna. Siꞌei, nabaa hemea na haguaa hemeadiai, ina nenegidigaa fei law.
11 Ma hamonei bigiꞌia hamatee hamona aida batanai fei au eꞌeni. Fei au na nodigimai ba hamonei mamaꞌa aꞌa fei maꞌigua, uaa fei au telaꞌanaa oꞌou na rafiꞌidiai laraa fei au hamonadoꞌo tonaa fei narafaweꞌia. 12 Fei poi naꞌaa i pedu ma fei arewaa naꞌaa i nomai. Siꞌei, onei putodinaa ei bigiꞌaa fei roromaa ma tonaa ei manumanuu foꞌaa aꞌa fei weꞌai. 13 Fei maumau bigiꞌaa oꞌou, nei rawani aleꞌei ei bigiꞌa aꞌa fei arewaa ma abaa ei maumau fihalehaleia, hunupoapoaia, fitatafipaꞌaia, ei maumau hafeloꞌa, ei maumau fifoꞌaia, o punepunea. 14 Agia, hamonei hawegi aꞌa fei maumau Jesus Christ ma apuna naranara ba hamoꞌaa faguaa ei hafeloꞌa maumau.a