Fanaa Ana Oꞌou aꞌa fei Bigiꞌana
12
Hamatee fei faloloaꞌiaa mei Haidaa, a iꞌigifaweꞌi aꞌa hamuꞌou ena lofuu, ba hamonei faniꞌuaiaa ei hudi unuu hamuꞌou ei hamoꞌei guta ba fei fanaa hamuꞌou nei apunai aꞌa mei Haidaa ma faniꞌeniꞌeia wagina—sifei, fei bigiꞌaa fei spiritii hamuꞌoua ba hamoꞌaa losuinia wagina. 2 Apuna nenegidiaa fei maumau feni ano, maꞌuaa hamonei filoginaa maumau hamuꞌou wagii fei famanufauaa fei naranaraa hamuꞌou. Hamoꞌaa bigidigaa fei, te, na hawia ba hamuꞌou fanunupaꞌaa fei nunumiaa mei Haidaa, fei na rawani ma fafaꞌarai, fei ina niꞌeniꞌe wagina. 3 Uaa aꞌa fei rawaniꞌa, fei ina fanau, a warefanaa minaa hamuꞌou ba hamoneiꞌaa nara ba hamona pafeai, maꞌuaa hamonei naramaꞌaia ba hamuꞌou, ramaꞌa batanai, aleꞌei na fipupuduinaa fei weꞌiaa naranara, fei mei Haidaa na fanaa hamuꞌou. 4 Ana aleꞌei, hememea oꞌou, na paꞌi hepalo ua paꞌafina ma watauda maroana ma ei bigiꞌaa ei maroana, lomi na fiminaꞌei 5 ma aꞌa Christ ana aleꞌei—oꞌou watauda, maꞌuaa hepalo ua paꞌafina ma hememea maroana nei oafipui. 6 Ona paꞌi uꞌugai fana, ana aleꞌei na puduaa tamanu ei rawaniꞌa fana aꞌa oꞌou. Nabaa fei fana aꞌa hemea ba neidii wareaa ei ba i nomai hinene, ana inei puduaab fei weꞌiaa naranarana. 7 Nabaa fei tonana ba nei hadumaa ei ramaꞌa, inei hadumaa roꞌou; nabaa hia feroia, inei feroi; 8 nabaa hia, ba i faweꞌiaa naranaraa ei ramaꞌa, inei faweꞌia; nabaa hia, ba i fanihaduma aꞌa ei ramaꞌa, inei fanifaꞌaꞌa ua; nabaa hia famamoa, inei bigifaweꞌi; nabaa hia ba i faloloaꞌinaa hefiꞌa, inei bigiwiwiwidi ua.
Fei Hagua
9 Fei haguaa hamuꞌou neipaꞌaa faꞌua. Fabidinaa unuu hamuꞌou aꞌa tamanu na hafelo. Panarofaa tamanu na rawani. 10 Hamonei firawanii aleꞌei fei fihaguiaa ei filofui. Aunaa hememeadiai i paꞌudu. 11 Hamonei refurefu ma fei spiritii hamuꞌou nei unuwenuwe ei hamuꞌou neneraa mei Fasu. 12 Hamonei niꞌeniꞌe aꞌa fei oꞌonaia unu, ofasiꞌia aꞌa fei au hafeloꞌa ma hamonei wewea lafulafua. 13 Fani ua aꞌa ei apunaia, ei lomi rona paꞌi manumanu. Hamonei fapalaꞌai taufagutanaa ramaꞌa.
14 Haweginaa ei rona haperararaiaa hamuꞌou; hawegiꞌuaiaa roꞌou ma apuna umuaa roꞌou. 15 Hamonei niꞌeniꞌefipui aꞌa ei rona niꞌeniꞌe; hamonei aiꞌaifipui aꞌa ei rona aiꞌai. 16 Gutafirawanii aꞌa hememea. Apuna mamagugua, maꞌuaa hamonei gutafipui aꞌa ei lomi haraa roꞌou.c Apuna aunaa hamuꞌou pafea.
17 Apuna bigifafelo aꞌa nemea ba ina fafelo aꞌa hamuꞌou. Hamonei fanunumaꞌaiaa ei bigiꞌaa hamuꞌou ba nei rawani i pudaa minaa ei ramaꞌa. 18 Nabaa na maꞌatalaa, hamonei gutafarawani aꞌa minaa ei ramaꞌa. 19 Apuna fania aleꞌei hia na fafelo aꞌa hamuꞌou, ena tafiu, maꞌuaa rawaꞌaꞌafinia aꞌa fei sibaa mei Haidaa, uaa rona neꞌinia ba: mei Fasu na ware, “Fei ba a fananamuinia, manumanuu; yau, a fawanewaneia.” 20 Agia:
“Nabaa na bao mei bidibidii unuu hamuꞌou, faguia;
nabaa na sigigi, fani numana.
Nabaa hamoꞌaa bigiꞌia aleꞌei,
fei bigiꞌaa hamuꞌou ana aleꞌei ba hamona augaa ei bafuu hafi i tabana.”
21 Ei hafeloꞌa, ineiꞌaa muainio, maꞌuaa onei muainaa ei hafeloꞌa.