Ei Dufuu Israel
11
Siꞌei a iꞌigai aleꞌei ba: Haa, mei Haidaa na ofadugaa ei ramaꞌa gufuna? Paꞌaa lomi! Yau, ana Israel, hemea pai Abraham, aꞌa fei maroaa Benjamin. 2 Mei Haidaa lomi na ofadugaa ei ramaꞌaa gufuna, ei nadii rafeinaa roꞌou. Lomi hamona aida tamanu na wareia fei Buꞌu Apuna laloo fei uꞌugaa Elijah—batanai i iꞌiginaa mei Haidaa ba nei fafeloaa Israel? 3 Ina ware, “Mena Fasu, rona foꞌafamaꞌeaa ei mamamaꞌa ma biꞌoꞌoaa ei tawahafi na apunai; unaa yau dufu; ma ba roꞌaa foꞌafamaꞌeau.” 4 Ma tamanu ei wareaa mei Haidaa aꞌana? “Unadii augaa oloromeai pufabaꞌa, ei loꞌe rona faꞌunaa duꞌuu roꞌou aꞌa Baal.” 5 Ma, ana aleꞌei, aꞌa fei au eꞌeni, na paꞌi dufuu ramaꞌa, ei na rafeinaa roꞌou fei rawaniꞌana. 6 Uaa manumanuu fei rawaniꞌana ma abaa manumanu bigiꞌaa ramaꞌa. Uaa, nabaa na hawiaa ei bigiꞌaa ramaꞌa, te, lomi hanuu fei rawaniꞌana.a7 Tani ei? Fei ronamina nunuminia ma lalabaginia ei Israel, lomi rona tonia, maꞌuaa ei ina rafeinaa roꞌou, rona tonia. Ei rawarawa, namina waiwai tabaa roꞌou, 8 aleꞌei fei neꞌaia:
“Mei Haidaa na fanaa roꞌou hepalo spiritii poapoa,
ma puda ba lomi roꞌaa fanunupaꞌi
ma adia ba lomi roꞌaa guaipaꞌi
nopaꞌamii wagieni.”
9 Ma David na ware:
“Fei tawaa roꞌou, i oanaa aleꞌei fahumamani,
aleꞌei waofahabehabe ma aleꞌei alabeꞌa. Ma fei, aree roꞌou.
10 Ei pudaa roꞌou nei roro ba lomi roꞌaa fanunupaꞌi
ma ei uguu roꞌou nei hawi noꞌoa.”
Ei Rara, Rona Fabanaꞌia aꞌa Hepalodiai Haihai
11 Hepalodiai, a iꞌigai ba: rona pasiꞌalabe aleꞌei ba lomi roꞌaa asiꞌadiai? Paꞌaa lomi! Maꞌuaa aꞌa ei barafeaa roꞌou, fei tala ba roꞌaa tela na dinaa aꞌa ei Gentile ba i fapunepuneaa ei Israel. 12 Maꞌuaa nabaa hanuna sifei ba ei barafeaa roꞌou na fani tala aꞌa minaa ei ramaꞌaa malagufu, ma tamanu ina paꞌai aꞌa roꞌou, hanuna sifei ba ei Gentile roꞌaa paꞌi talaa roꞌou, nabaa aleꞌei, te fei hawegiaa ei Israel ipowe bauanaidiai ei ropowe tela!
13 A warefanaa hamuꞌou ena Gentile. Uaa yau apostle aꞌa ei Gentile, a bigifaweꞌi aꞌa fei bigiꞌau, 14 uaa na nara ba a faꞌunaꞌanaa punepunea aꞌa ei ramaꞌaa gufuu ma fatelaꞌanaa hefiꞌa roꞌou. 15 Uaa nabaa fei ofadugaa roꞌou i fawanewaneaa feni malagufu, te, nabaa roꞌaa ugainia—haa, naraa hamuꞌou ba lomi roꞌaa filoginaa fei maꞌea amaꞌanaa fei harenua? 16 Ma fei rawarawa faraa pidaua ba ro fanaa mei Fasu, nabaa hesuwi fei na apunai, minaa fei na apunai; ana aleꞌei nabaa ei waraa hepalo haihai na apunai, ei rarana ana na apunai.
17 Hefiꞌa ei rara, ina faꞌarafepasiaa roꞌou ma hamuꞌou, aleꞌei hepalo nusuu ei olive podu rona fabanaꞌia aꞌa hepalo haihai dupuaa hefiꞌa olive na udedii. Ma eꞌeni hamuꞌou aleꞌei ei rara, ei rona hunumaa fei ranu fei waraa fei paꞌaa olive. 18 Siꞌei, apuna famamagugua aꞌa ei rara ei. Nabaa hamoꞌaa bigiꞌia, hamonei naramaꞌaia ba aꞌa ba hamuꞌou ena hamona urofaa fei wara, maꞌuaa fei wara, fei i urofaa hamuꞌou. 19 Hamowe ware ba, “Na faꞌarafepasiaa hefiꞌa rara ba i fabanaꞌau wagina.” 20 Faꞌua, maꞌuaa ina faꞌarafepasiaa roꞌou uaa rona ofadugia ma hamona u hamatee na weꞌi naranaraa hamuꞌou. Apuna poronaa hamuꞌou pafea, maꞌuaa hamonei mamaꞌau. 21 Uaa, nabaa mei Haidaa, lomi naꞌo panarofaa ei paꞌaa rara, ana lomi ba iꞌo panarofaa hamuꞌou.
22 Siꞌei, hamonei naramaꞌaiaa fei rawaniꞌa ma fei sibaa mei Haidaa: fei sibana aꞌa ei rona pasi maꞌuaa fei rawaniꞌana aꞌa hamuꞌou, nabaa hamona oafagugu aꞌa fei rawaniꞌana. Nabaa lomi, i balaisiminaa hamuꞌou. 23 Ma nabaa lomi ronaꞌu ofadugia, iwe fabanaꞌaa roꞌou, uaa mei Haidaa i fabanapaꞌidinaa roꞌou. 24 Uaa nabaa inadoꞌo balaitonaa hamuꞌou aꞌa fei olive podu, fei na waiwai, maꞌuaa ina fabanaꞌaa hamuꞌou aꞌa hepalo olive hape, ina madutadiai nabaa i fabanaꞌaa ei raraa ei paꞌaa haihai olive, ei ronadoꞌo nomai aꞌana.
Minaa ei Israel, Roꞌawe Tela
25 Ena lofuu nunumiau ba hamoneiꞌaa poapoai aꞌa feni manumanu na udeꞌopaꞌai o faꞌupeꞌupei ba hamonamina paꞌi apaꞌaa hamuꞌou, uaa na waiwaidii tabaa ei Israel nopaꞌaloo fei paꞌaa puduu ei Gentile rona tela. 26 Ma siꞌei, minaa ei Israel, roꞌawe tela, aleꞌei na wareia fei neꞌaia:
“Mei faꞌuꞌunaia i norai Zion
ma filoginaa ei hafeloꞌaa Jacob,
ei lomi na neneraa maumau mei Haidaa.
27 Ma sifei, fei fiꞌugaiau aꞌab roꞌou ei a fapedugaa ei hafeloꞌaa roꞌou.”c
28 Na bidibidi unuu hamuꞌou aꞌa roꞌou uaa fei rawaniꞌa warea; maꞌuaa aꞌa fei rafeia, ina haguaa roꞌou uaa ei ama mina, 29 uaa fei fanaa mei Haidaa ma fei rafeiana, lomi ba i filogii. 30 Hamonadoꞌo barafeaa mei Haidaa ma eꞌeni hamona tonaa fei faloloaꞌiana, uaa ei barafeaa roꞌou. 31 Ana aleꞌei, eꞌeni rona barafeia ba ana ronei tonaa fei faloloaꞌiaa mei Haidaa aꞌa fei rawaniꞌana, fei na fanaa hamuꞌou. 32 Uaa mei Haidaa na boboꞌainaa minaa ei barafea ba i faloloaꞌinaa minaa roꞌou.
Uduginaa mei Fasu
33 Oo, naminapaꞌaa walalo ma bauana fei naranara ma fei apaꞌaa mei Haidaa!
Lomi hemea ba i labaraipaꞌaa fei naranarana.
Ma ei talana, lomi ba o nenegipaꞌia!
34 “Hini na apaꞌaa fei naranaraa mei Fasu?
O, hini na aweinia?”
35 “Hini na fani manumanu aꞌa mei Haidaa
ba inei hodiꞌia?”
36 Uaa minaa ei manumanu, noramiaa roꞌou aꞌana
ma minaa ei manumanu i dinaa aꞌana
ma minaa ei manumanu i nomai uaa hia.
I aꞌana i oa fei hawera ranimai! Amen.