10
Ena lofuu, fei nunumiau ma fei lafulafuau aꞌa mei Haidaa sifei ba ei Israel, ronei tela. 2 Uaa a uꞌugaa roꞌou ba rona refurefu aꞌa mei Haidaa, maꞌuaa ei refurefuaa roꞌou, fei fasuna abaa aꞌa fei apaꞌa. 3 Hamatee lomi rona apaꞌaa fei wanewanea, fei noramiana aꞌa mei Haidaa ma siꞌei ba roi labagiꞌuaia aꞌa ei naranaraa roꞌou, lomi rona fafefenaa aꞌa fei wanewaneaa mei Haidaa. 4 Christ, mei na fafaꞌuainaa fei law ba nei paꞌi wanewanea aꞌa minaa ei rona narafaweꞌi.5 Moses na neꞌi ba fei wanewanea aꞌa fei law aleꞌei: “Hini i neneraa eni manumanu eni, i oa wagina.” 6 Maꞌuaa fei wanewanea, fei i nofininamii weꞌiaa naranara, na ware ba, “Apuna naranara laloo iamu ba, ‘Hini i dinaa pafea?’” (ba i faꞌupuaree Christ pu) 7 “o, ‘Hini i upunaa fei walaloa?’” (ba i faꞌasiꞌanamii Christ aꞌa fei maꞌea). 8 Maꞌuaa ina ware batanai? “Fei warea na rafiꞌi aꞌamu; ina ude umumu ma laloo iamu,” fei warea ba onei narafaweꞌi, fei oi uꞌugia: 9 Ba nabaa o warenaa umumu ba “Jesus hia Fasu,” ma na weꞌi fei naranaramu ba mei Haidaa na faꞌasiꞌania aꞌa fei maꞌea, te, opowe tela. 10 Uaa wagii fei naranaramu, ona narafaweꞌi ma wanewane wagina ma aꞌa fei umumu ona wareia ma ona tela wagina. 11 Aleꞌei i ware fei Buꞌu Apuna, “Hini i augaa fei naranarana i aꞌana, lomi iwe oanaa fei mamafaa.” 12 Uaa lomi na uꞌugai ei Jew ma ei Gentile—hemea ua Fasuu roꞌou ma hia, Fasuu minaa roꞌou ma namina haweginaa minaa ei rona lalaꞌia, 13 uaa, “Hini i lalaꞌaa fei haraa mei Fasu, ipowe tela.”
14 Batanai ba roꞌaa lalaꞌaa mei lomi rona narafaweꞌi aꞌana? Ma batanai ba roꞌaa narafaweꞌi aꞌa mei rotawe guainaa uꞌugana? Ma batanai ei ba roꞌaa guainaa uꞌugana nabaa lomi nemea i uꞌufanaa roꞌou? 15 Ma batanai ba nemea i uꞌugia nabaa hefiꞌa, lomi rona aloia? Aleꞌei fei neꞌaia, “Namina fananamai pinee ei rona talaitonaa fei rawaniꞌa warea!”
16 Maꞌuaa abaa minaa ei Israel, rona tonaa fei rawaniꞌa warea. Uaa Isaiah na ware ba, “Mena Fasu, hini na guaipaꞌaa fei uꞌugaa haiꞌou?” 17 Siꞌei, fei weꞌiaa naranara i nomai aꞌa fei guaipaꞌaa roꞌou fei uꞌuga ma fei uꞌuga, guaiaa roꞌou aꞌa fei wareaa Christ. 18 Maꞌuaa a iꞌigai: Lomi rona guainia? Hiꞌi, rona guainia:
“Ei lao roꞌou, namina aununaa tadiweꞌaiaa malagufu,
ei wareaa roꞌou namina talepedunaa feni ano.”
19 A iꞌigidiai: Lomi na arewa aꞌa ei Israel? Famaꞌa, na ware Moses,
“A fapunepuneaa hamuꞌou aꞌa ei gufu lomi rona paꞌi haraa roꞌou;
a fasibaiaa hamuꞌou aꞌa hepalo gufu, lomi apaꞌaa roꞌou.”
20 Ma Isaiah na warefaweꞌi ba,
“Rona bapaꞌau, ei abaa roi labaginau;
una faꞌarewa aꞌa ei abaa rona lalaꞌau.”
21 Maꞌuaa ina uꞌugaa ei Israel aleꞌei,
“Mina fei arewaa una arereifanaa gueni paniu aꞌa ei barafea, ei waiwai tabaa.”