Fei Nunumiaa mei Haidaa
9
Yau na oafipui aꞌa Christ ma a warefaꞌuai—lomi ba a warefasifi ma laloo fei naranarau fipuinaa fei Spiriti Apuna, ana na uga ba faꞌua— 2 namina faloloaꞌi ma na fiꞌi naranarau. 3 Uaa nunumiau ba yau ma ei lofuu, haiꞌouꞌaa filoginaa ei gutanaa haiꞌou aleꞌei ba yau, na hafelo i pudaa mei Haidaa ma lomi na paꞌi Christ ma ei paꞌaa gufuu, ronei paꞌi Christ, 4 ei Israel. Uaa ei ramaꞌa ei, ba roꞌou naꞌuu mei Haidaa, ba ro tonaa fei haweraa mei Haidaa, ei fiꞌugaia, fei law, fei losuia ma ei difaꞌunaia. 5 Noramiaa roꞌou aꞌa ei ama mina ma Christ hia pai roꞌou ma ana hia Haidaniaa minaa ei manumanu ma oꞌaa uduginia ranimai ranimai!a Amen. 6 Abaa aleꞌei ba fei wareaa mei Haidaa na pasi. Uaa minaa ei pai Israel, aꞌa ba minaa roꞌou Israel. 7 Ma nabaa roꞌou paina, aꞌa ba minaa roꞌou, paꞌaa naꞌuu Abraham. Agia, hamatee na udedii fei neꞌia ba, “Aꞌa Isaac, owe paꞌi paimu.” 8 Siꞌei, aꞌa ba ei naꞌu waniniaa ramaꞌa, roꞌou paꞌaa naꞌuu mei Haidaa, maꞌuaa ei naꞌuu fei difaꞌunaiaa mei Haidaa, roꞌou, pai Abraham. 9 Uaa inadii warefaꞌunai aleꞌei: “Aꞌa fei paꞌaa au, a hadiweꞌimai ma Sarah, iwe paꞌi hemea baduu wawane.”
10 Ma hepalodiai, laguei naꞌuu Rebekah, mei amaa lagua, hemea ua, Isaac, mei ana amaa oꞌou. 11 Maꞌuaa laguei wataa, ei lagutaa wanini, o bigiꞌaa hepalo rawaniꞌa o hafeloꞌa manumanu—siꞌei ba mei Haidaa i bigiꞌaa ei nunumiana 12 ma aꞌa ba i nofipuimai aꞌa ei bigiꞌaa ei ramaꞌa, uaa hia mei rafeia—ina warenaa aꞌa mei pifine ba, “Mei umaꞌua, hia, nafii mei umugina.” 13 Ana aleꞌei fei neꞌaia: “Jacob, una haguia, maꞌuaa Esau, na bidibidi unuu aꞌana.”
14 Siꞌei, o ware batanai wagina? Ba mei Haidaa, lomi na wanewane? Paꞌaa lomi! 15 Uaa ina warenaa aꞌa Moses ba,
“Yau, a faloloaꞌinaa hini una nunuminia
ma farawaninaa hini una nunuminia.”
16 Siꞌei, mei Haidaa na rafeinaa hemea ramaꞌa uaa fei faloloaꞌiana ma aꞌa ba i rafeinia uaa fei nunumia o bigiꞌaa mei ramaꞌa mei. 17 Uaa fei Buꞌu Apuna na warenaa aꞌa Pharaoh: “Una faꞌufalarainio aꞌa fei bigiꞌa ba a famaꞌaiaa fei faufauu aꞌamu ba fei harau nei baꞌa i tadiweꞌaiaa feni malagufu.” 18 Siꞌei, mei Haidaa i faloloaꞌinaa mei nunumiana ma i fawaiwainaa tabaa mei abaa nunumiana.
19 Narau ba hemea hamuꞌou i warenaa aꞌau ba, “Nabaa aleꞌei, tani ei ba mei Haidaa i aunaa unuu oꞌou? Uaa hini oꞌou i faharea aꞌa fei nunumiana?” 20 Maꞌuaa yoi hini ba o warefani aꞌa mei Haidaa? “Mei famamaraꞌuamaia, ana i warenaa aꞌa mei i famamaraia ba, ‘Tani oꞌaa bigiꞌau aleꞌeni?’” 21 Mei tafitafiꞌa, lomi ba i tafiꞌaa ei nunumiana? Hefiꞌa hapena na paꞌi baua bigiꞌana ma hefiꞌa, lomi.
22 Mei Haidaa na nunuminia ba i famaꞌaa fei sibana ma faufauna, maꞌuaa ina apitainaa fei sibana aꞌa tamanu nadii augia ba i biguguia. 23 Ma ina bigiꞌaa fei ba i famaꞌaa fei baua rawaniꞌana aꞌa ei na faloloaꞌinaa roꞌou, ei nadii augia ba roꞌaa tonaa fei hawerana. 24 Ma ana ina bigiꞌaa fei aꞌa oꞌou eni rafeiana ma abaa noramiaa oꞌou aꞌa ei Jew ua, maꞌuaa aꞌa ei Gentile anaa. 25 Ana aleꞌei, ei wareana aꞌa fei neꞌaiaa Hosea:
“Ena abaa gufuu, a ware ba roꞌou, ramaꞌaa gufuu;
ma mei pifine abaa haꞌeu, a ware ba haꞌeu,”
26 ma,
“Iwe nomai ana yei, fawelei rona guainaa fei warea ba,
‘Hamuꞌou, abaa gufuu,’
ropowe guainia ba roꞌou, ‘naꞌuu mei Haidaa, mei i oalao.’”
27 Isaiah na aiꞌaigaa ei Israel ba:
“Faꞌua ba fei puduu ei Israel aleꞌei fei puduu ei piye i didipisii,
maꞌuaa hememea ua i tela.
28 Uaa mei Fasu iwepaꞌaa bigiꞌaa
fei dududuana aꞌa feni malagufu ma imina tale ma i haꞌiai.”
29 Aleꞌei nadii wareia Isaiah:
“Nabaa mei Fasu, mei Faufaua,
lomi i augaa hefiꞌa dufuu pai oꞌou,
ana oꞌaa aleꞌei Sodom ma Gomorrah.”
Lomi na Weꞌi fei Naranaraa ei Israel
30 O ware batanai aꞌa fei? Ei Gentile lomi rona labaginaa tamanu na wanewane, maꞌuaa rona paꞌaa fei wanewanea, fei na nofininamii fei weꞌiaa naranara; 31 maꞌuaa ei Israel, ei rona neneraa fei law ba roꞌaa wanewane, lomi rona tonia. 32 Tani ipoꞌo biyei? Hamatee fei lalabagiaa roꞌou, abaa aꞌa fei weꞌiaa naranara, maꞌuaa aleꞌei manumanu ba ro tonia aꞌa ei bigiꞌaa roꞌou. Rona alabe aꞌa fei “mugoo alabeꞌa.” 33 Aleꞌei fei neꞌaia:
“Maꞌaia, yei Zion una augaa hepalo mugoo i faꞌalabeꞌaa ei ramaꞌa,
hepalo naꞌa i fapasiaa roꞌou,
ma hini i augaa naranarana aꞌana, lomi iwe oanaa fei mamafaa.”