Fei Harenua aꞌa fei Spiriti
8
Siꞌei, eꞌeni, lomi i paꞌi fagianaa aꞌa ei rona oafipui aꞌa Christ Jesus.a 2 Uaa, aꞌa Christ Jesus, fei maumau fei Spiriti, fei i fani harenua, na alarau aꞌa fei maumau ei hafeloꞌa ma fei maꞌea. 3 Uaa, tamanu lomi na hawia ba i bigiꞌia fei law hamatee na fafafauia fei maumau ei hafeloꞌa,b mei Haidaa na bigiꞌia aꞌa fei aloanarai mei Naꞌuna fininaa hudi unu, ana aleꞌei ei hafeloꞌa ramaꞌa, ei rona paꞌi hudi unuu roꞌou. Ma hia, aleꞌei hepalo fana ba i siminaa ei hafeloꞌa. Ma siꞌei, i dududuaa ei hafeloꞌa, ei na oa tapuu ei hafeloꞌa ramaꞌac 4 ba i fawanewaneia aꞌa oꞌou tamanu na ware fei law ba onei ponoꞌia. Ina bigiꞌia aꞌa ei lomi rona neneraa ei maumau hafeloꞌa, maꞌuaa rona neneraa fei Spiriti. 5 Ei rona neneraa fei maumau hafeloꞌa, rona augaa ei naranaraa roꞌou aꞌa tamanu na nunuminia fei maumau hafeloꞌa; maꞌuaa ei rona neneraa fei Spiriti, rona augaa ei naranaraa roꞌou aꞌa tamanu na nunuminia fei Spiriti. 6 Fei naranaraa ei hafeloꞌa ramaꞌa,d maꞌea, maꞌuaa fei naranara i famamoia fei Spiriti na paꞌi harenua ma gutafarawania; 7 fei hafeloꞌa naranarae na siba aꞌa mei Haidaa. Lomi i guaipaꞌaa fei law mei Haidaa ma ana lomi i hawia ba i guaipaꞌia. 8 Ei na famamoaa roꞌou fei maumau hafelo, lomi roꞌaa faniꞌeniꞌeaa mei Haidaa.
9 Maꞌuaa abaa na famamoaa hamuꞌou fei maumau hafeloꞌa, uaa hefei Spiriti—nabaa fei Spiritii mei Haidaa na oa laloo iaa hamuꞌodu. Ma mei lomi na paꞌi fei Spiritii Christ, abaa hia maroaa Christ. 10 Maꞌuaa nabaa Christ, i laloo iaa hamuꞌou, fei hudi unuu hamuꞌou na maꞌe wagii ei hafeloꞌa, maꞌuaa ei spiritii hamuꞌou na paꞌi harenua wagii fei wanewanea. 11 Ma nabaa fei Spiritii mei i faꞌasiꞌanaa Jesus aꞌa fei maꞌea na oa laloo iaa hamuꞌou, mei i faꞌasiꞌanaa Christ wagii fei maꞌea ana i fani harenua aꞌa fei hudi unuu hamuꞌou uaa fei Spiritina, fei na oafipui aꞌa hamuꞌou.
12 Siꞌei, ena lofuu, ona paꞌi hepalo bigiꞌa ba onei bigiꞌia, maꞌuaa aꞌa ba bigiꞌa wagii fei maumau hafeloꞌa ba onei nenegia. 13 Uaa, nabaa hamoꞌaa neneraa fei maumau hafeloꞌa, hamopaꞌaa maꞌe; maꞌuaa nabaa aꞌa fei Spiriti, hamoꞌaa famaꞌeaa ei hafeloꞌa bigiꞌaa fei hudi unu, hamowe paꞌi harenua, 14 uaa ena rona neneraa fei Spiritii mei Haidaa, roꞌou, naꞌuna. 15 Uaa fei Spiriti tonaa hamuꞌou abaa na fahumuwaidinaa hamuꞌou wagii fei mamaꞌaua, maꞌuaa fei spiriti ba hamuꞌou naꞌuna.f Ma i aꞌana, ona harofia ba “Abba, Oꞌama.” 16 Fei Spiriti ana unaia na uꞌufanaa fei spiritii oꞌou ba oꞌou, naꞌuu mei Haidaa. 17 Ma nabaa oꞌou naꞌu, te, opowe tonaa manumanu ro tonia ei naꞌuu mei Haidaa, ana aleꞌei fei na tonia Christ ba nabaa oꞌaa tonaa ei fiꞌina, ana o to fei hawerana.
Fei Hawera i Nomai Hinene
18 Yau na nara ba ei fiꞌiaa oꞌou eꞌeni, lomi o hawawagipaꞌia aꞌa fei hawera iwe famaꞌaiaa oꞌou. 19 Minaa ei famamarana, rona omaꞌa fininaa oꞌonaia unu nopaꞌaloo fei ba i uniaa ei naꞌuu mei Haidaa. 20 Uaa minaa ei bigiꞌaa panina, na nanamuinia ba lomi hanuu roꞌou. Ma aꞌa ba nunumiaa roꞌou aleꞌei, maꞌuaa nunumiaa mei i augia ba i faꞌoꞌonainaa unuu roꞌou 21 ba roꞌaa ala aꞌa fei maroroa ma tonaa fei rawaniꞌa gutanaa ei naꞌuu mei Haidaa.
22 Ona aida ba minaa ei bigiꞌaa panina, rona aiꞌai nopaꞌamii eꞌeni ana aleꞌei fei fiꞌiaa hemea pifine ba i wanini. 23 Ma abaa siꞌei ua, hamatee ana oꞌou, oꞌou ena na tonaa fei rawarawa fuaa fei Spiriti, ana ona aiꞌai laloo iaa oꞌou, eni oi omaꞌaia ba i taweaa oꞌou aleꞌena naꞌuna aꞌa fei ponohadiweꞌia ei hudi unuu oꞌou. 24 Uaa, wagii feni oꞌonaia unu ona tela. Maꞌuaa fei oꞌonaia unu ona fanunupaꞌia, abaa paꞌaa oꞌonaia unu. Hini i oꞌonai ununa aꞌa tamanu na paꞌidii? 25 Maꞌuaa nabaa na oꞌonai unuu oꞌou aꞌa tamanu otawe paꞌi, te, onei omaꞌa fininaa ofasiꞌia.
26 Ana aleꞌei, fei Spiriti na hadumaa oꞌou aꞌa ei rafileleaa oꞌou. Lomi ona aida ba oꞌaa lafulafunaa tamanu, maꞌuaa ba i hadumaa oꞌou fei Spiriti, ana unaia na umuinaa oꞌou fininaa aiꞌaiga, uaa lomi paolaa warea ba o warepaꞌia. 27 Ma mei na aida ei naranaraa oꞌou, na apaꞌaa fei naranaraa fei Spiriti, uaa ba i hadumaa oꞌou, fei Spiriti na umuinaa ei apunai ramaꞌa aleꞌei nunumiaa mei Haidaa.
Onapaꞌaa Muadiai
28 Ma ona aida ba aꞌa minaa ei manumanu, mei Haidaa i bigiꞌaa ei rawaniꞌa aꞌa ei rona haguia,g eih ina lalaꞌaa roꞌou aꞌa ei nunumiana. 29 Uaa ei ramaꞌa, ei inadii apaꞌidigaa roꞌou, ana aꞌa roꞌou inadii augia ba ronei neneraa fei maumau mei Naꞌuna ba hia, aleꞌei umaꞌua dupuaa watauda filofui. 30 Ma aꞌa eꞌei, inadii bigiꞌia ba roꞌaa batanai ma ana na lalaꞌaa roꞌou. Ei ina lalaꞌaa roꞌou, ana ina fawanewaneaa roꞌou; ei ina fawanewaneaa roꞌou, ana ina fanaa fei hawerana aꞌa roꞌou.
31 Ma siꞌei, oꞌaa ware batanai aꞌa fei? Nabaa mei Haidaa, hia aꞌa oꞌou, hini ba i papaꞌaa oꞌou? 32 Mei lomi na utofeꞌainaa mei Naꞌuna, ana simei mei i faniꞌuaia aꞌa minaa oꞌou—ana iwepaꞌaa fanaa oꞌou minaa ei manumanu aꞌana, lomi ponoꞌana. 33 Hini i ware ba rona tata ei rafeiaa mei Haidaa? Mei Haidaa, ana hia fawanewanea. 34 Hini ba i dududuaa oꞌou? Christ Jesus, mei na maꞌe ma asiꞌaa, ifi guta pepei maꞌau mei Haidaa ma ana fi umuinaa oꞌou. 35 Hini ba i bitaweaa oꞌou aꞌa fei haguaa Christ? Tamanu i bitaweaa oꞌou? Ei hafeloꞌa? Ei awataa? Ei haperaraia? Fei mouabiabia? Fei ba lomi lawalawa? Ei manumanu hafelo? Fei wadu? 36 Ana aleꞌei fei neꞌaia:
Hamatee yoi, haiꞌouna oa i maꞌaa fei maꞌea minaa ei arewaa;
haiꞌou aleꞌei ei sipsipi, ei ba roꞌaa foꞌafamaꞌeaa roꞌou.”
37 Lomi. Aꞌa minaa ei manumanu ei, onapaꞌaa muadiai uaa mei na haguaa oꞌou. 38 Uaa unaminapaꞌaa aida ba eni manumanu aleꞌeni maꞌea, harenua, ei aloꞌalo, ei pigea,i ei manumanu eꞌeni, o hinene, o hepalo manumanu na paꞌi forafora, 39 ei tarea manumanu o walaloaa manumanu, o hepalodiai manumanu aꞌa minaa ei bigiꞌaa panina, lomi na hawia ba i bitaweaa oꞌou aꞌa fei haguaa mei Haidaa, fei aꞌa Christ Jesus, mei Fasuu oꞌou.