Hepalo Warea Hanunu wagii fei Lalaia
7
Ena lofuu, haa—lomi hamona aida ba fei law i famamoaa hemea nopaꞌaloo fei maꞌeana (uaa, uꞌei warenaa aꞌa ena rona apaꞌaa fei law)? 2 A faꞌarewaia aleꞌei ba wagii fei law, nabaa hemea pifine na paꞌi harona, inei gutafipui aꞌa mei harona nopaꞌaloo fei maꞌeana, maꞌuaa nabaa mei haroo mei pifine na maꞌe, ina ala aꞌa fei law lalaia. 3 Siꞌei, nabaa ina lalainaa hemeadiai wawane, ei ana fi werawera harona, rona ware ba hia, na fiharoharoipaꞌai. Maꞌuaa nabaa ina maꞌe mei harona, hia na ala aꞌa fei law lalaia ma aꞌa ba ina fiharoharoipaꞌai nabaa ina lalainaa hemeadiai wawane.4 Siꞌei, ena lofuu, ana hamona maꞌedii aꞌa fei law uaa fei hudi unuu Christ ba hamonei oafipui aꞌa hemeadiai—mei na asiꞌaa aꞌa fei maꞌea ba onei fuaa aꞌa mei Haidaa. 5 Uaa ei i famamoaa oꞌou fei maumau hafeloꞌa, fei law na faꞌasiꞌanaa fei hafeloꞌa maumau oꞌou,a hee, ona tonaa fei fuaa fei maꞌea. 6 Maꞌuaa eꞌeni, nabaa o maꞌe aꞌa ei na o panarofaa oꞌou mina, ona ala aꞌa fei law ba o neneraa fei manufau talaa fei Spiriti ma aꞌa ba aleꞌei fei watanai talaa fei law.
Oteꞌotei aꞌa ei Hafeloꞌa
7 O ware batanai? Hafeloꞌa fei law? Paꞌaa lomi! Nabaa lomi fei law, lomi a apaꞌia tamanu na hafelo. Uaa lomi ba a apaꞌaa hanuu fei nanamaia nabaa lomi na ware fei law ba, “Apuna nanamai.” 8 Maꞌuaa aꞌa fei law, ei hafeloꞌa na fani tala ba i fanoramiaa watauda mau nanamaia aꞌau. Uaa, nabaa lomi law, na maꞌe ei hafeloꞌa. 9 Mina, ei lomi law banaꞌaa poꞌo sifei, maꞌuaa ipowe nomai fei law, ei hafeloꞌa na asiꞌaa ma yau na maꞌe. 10 Una fanunupaꞌia ba ana fei law ua, fei ba i fani harenua, paꞌaa sifei fei i fanoramiaa fei maꞌea. 11 Uaa aꞌa fei law, ei hafeloꞌa na fani tala ba i sifiꞌau ma ana fei law na famaꞌeau. 12 Siꞌei, fei law na apunai ma ei warea wagina. Ina wanewane ma rawani.
13 Nabaa aleꞌei, hanuna ba fei na rawani i fani maꞌea aꞌau? Paꞌaa lomi! Maꞌuaa ba unei fanunuꞌapaꞌaa ei na hafelo, una to maꞌea wagii fei law, fei na rawani ba wagina, o aida ba ei hafeloꞌa napaꞌaa hafelo.
14 Ona aida ba fei law, manumanuu spiriti; maꞌuaa yau, lomi na paꞌi fei maumau spiriti. Yau na oa ua aleꞌei humuwa aꞌa ei hafeloꞌa. 15 Ei uneiꞌaa bigiꞌia, lomi na aida ba tani afane bigiꞌuaia. Uaa, tamanu a nunuminia ba a bigiꞌia, lomi na bigiꞌia. Maꞌuaa ei lomi na nunuminia ba a bigiꞌia, una bigiꞌia. 16 Ma nabaa a bigiꞌaa tamanu lomi na nunuminia, una uga ba fei law, ina rawani. 17 Hee, abaa yau una bigiꞌia, maꞌuaa ei hafeloꞌa, ei na oa laloo iau. 18 Una aida ba lomi hepalo rawaniꞌa manumanu na oa laloo fei hafeloꞌa naranarau.b Uaa, nunumiau ba a bigiꞌaa ei rawaniꞌa, maꞌuaa lomi na bigiꞌia. 19 Uaa, fei bigiꞌau, abaa fei rawaniꞌa aleꞌei nunumiau; agia, ei hafeloꞌa, ei lomi na nunuminia—unaꞌaida bigiꞌuaia. 20 Ma nabaa a bigiꞌaa ei lomi na nunuminia, aꞌa ba yau na bigiꞌia, uaa, bigiꞌaa ei hafeloꞌa laloo iau.
21 Siꞌei, una fanunupaꞌia ba fei maumau bigiꞌa i aleꞌei: Ei una nunuminia ba a bigiꞌaa ei rawaniꞌa, ei hafeloꞌa ana na oafipui aꞌau. 22 Uaa laloo iau, na niꞌeniꞌe aꞌa fei law mei Haidaa; 23 maꞌuaa una fanunupaꞌaa hefaa maumaudiai fi bigi unuu ma fiforainaa fei naranarau ma fafaiau ba una boboꞌai aꞌa fei maumau ei hafeloꞌa, ei na biginaa unuu. 24 Yau, namina faloloaꞌi! Hini i hadumau aꞌa feni hudi unuu maꞌea? 25 A ware ‘ta’ aꞌa mei Haidaa—uaa Jesus Christ, mei Fasuu oꞌou!
Siꞌei, aꞌa fei naranarau, yau hemea humuwa aꞌa fei law mei Haidaa, maꞌuaa aꞌa fei hafeloꞌa maumau, yau humuwa aꞌa fei law ei hafeloꞌa.