Ona Maꞌe aꞌa ei Hafeloꞌa ma Werawera aꞌa Christ
6
O ware batanai—o bigiꞌuaialao ei hafeloꞌa ba fei rawaniꞌa nei bauanaidiai? 2 Paꞌaa loꞌe! Ona maꞌedii aꞌa ei hafeloꞌa; hee, oꞌaa gutabatanaidilao wagina? 3 Haa, lomi hamona aida ba minaa oꞌou eni ona pudugufai aꞌa Christ Jesus, ona pudugufaifipui aꞌa fei maꞌeana? 4 Siꞌei, ona maꞌe ma iꞌifaifipui aꞌana wagii fei pudugufaia ba ana aleꞌei Christ na asiꞌaa aꞌa fei maꞌea fininaa fei haweraa mei Ama ma oꞌou anaa, oꞌaa guta aꞌa fei manufau harenua. 5 Ma nabaa ona panafipui aꞌana aꞌa fei maꞌeana, napaꞌaa faꞌua ba oꞌaa panafipui aꞌana wagii fei asiꞌanana. 6 Uaa, ona aida ba fei maumau oꞌou mina na fatawafipui aꞌana ba ei hafeloꞌaa hudi unu nei paꞌai wagina baa lomidiai oꞌaa humuwai aꞌa ei hafelo— 7 uaa hini na maꞌe na ala aꞌa ei hafeloꞌa.
8 Ma nabaa ona maꞌefipui aꞌa Christ, ona aida ba opowe oafipui aꞌana. 9 Uaa ona aida ba hamatee Christ na asiꞌaa aꞌa fei maꞌea, lomi ba i maꞌediai. Fei maꞌea, lomi na fai famamoia. 10 Fei maꞌea, fei ina maꞌe wagina, ina maꞌe ba i fapedugaa ei hafeloꞌa hepoa ua ma lomidiai; maꞌuaa fei harenua, fei hia na paꞌi, na oafipui aꞌa mei Haidaa.
11 Ana aleꞌei, hamonei nara ba hamona maꞌedii aꞌa ei hafeloꞌa, maꞌuaa hamona paꞌi harenua aꞌa mei Haidaa uaa Christ Jesus. 12 Siꞌei, aꞌa ei hafeloꞌa, apuna fafeloaa ei unuu hamuꞌou, ei hudi unuu maꞌea ba hamoꞌaa neneraa ei hafeloꞌa nunumiaa ei unuu hamuꞌou. 13 Apuna fanaa ei hudi unuu hamuꞌou aꞌa ei hafeloꞌa ba o biginaa ei hafeloꞌa wagina, maꞌuaa hamonei fanaa ana hamuꞌou aꞌa mei Haidaa, aleꞌena ei rona walaꞌaa aꞌa fei maꞌea ma oa aꞌa ei rona werawera; ma hamonei fanaa ei unuu hamuꞌou aꞌana ba i biginaa ei wanewanea. 14 Uaa ei hafeloꞌa, lomi i famamoaa hamuꞌou uaa abaa hamuꞌou panii fei law, uaa hamuꞌou panii fei rawaniꞌa.
Humuwaa fei Wanewanea
15 Tamanu naranaraa hamuꞌou? O bigiꞌaa ei hafeloꞌa uaa abaa oꞌou panii fei law, maꞌuaa oꞌou panii fei rawaniꞌa? Paꞌaa lomi! 16 Haa, lomi hamona apaꞌia ba nabaa hamona ugainaa hemea ba hamuꞌou humuwana, hamuꞌou humuwaa mena hamona guainia? Nabaa hamuꞌou humuwaa ei hafeloꞌa, i notonaa hamuꞌou aꞌa fei maꞌea. Nabaa hamuꞌou humuwaa fei guaiawarea, i fani harenua aꞌa hamuꞌou. 17 Maꞌuaa paꞌaa ware ‘ta’ aꞌa mei Haidaa ba hamonadoꞌo humuwai aꞌa ei hafeloꞌa, maꞌuaa hamonawemina guaipaꞌaa fei mau feferoi, fei na ude panii hamuꞌou. 18 Hamona ala aꞌa ei hafeloꞌa ma humuwai aꞌa fei wanewanea.
19 A ware aleꞌei mau wareaa ramaꞌa, uaa hamona rafilele aꞌa ei unuu hamuꞌou, ana aleꞌei mina, ei hamonaꞌaida fanaa ei unuu hamuꞌou aꞌa ei lomi na fafaꞌarai ba ei hafeloꞌa i nogipelao, aleꞌei ba hamuꞌou humuwai wagina. Siꞌei, eꞌeni hamonei fanaa ei unuu hamuꞌou aꞌa fei wanewanea, fei i notonaa hamuꞌou aꞌa tamanu ina fafaꞌarai ba hamuꞌou humuwai wagina. 20 Ei hamuꞌou humuwai aꞌa ei hafeloꞌa, hamona ala aꞌa fei famamoaa fei wanewanea. 21 Tamanu rawaniꞌana hamoꞌaa tonia eꞌeni wagii ei bigiꞌaa hamuꞌou na famamafa mina? Ei manumanu ei, ponoꞌana, maꞌea. 22 Maꞌuaa, siꞌei ba hamona ala aꞌa ei hafeloꞌa eꞌeni ma hamonawe humuwai aꞌa mei Haidaa, fei fua wagina, fafaꞌaraia ma i dinaa aꞌa fei harenua lomi i pedutoo. 23 Uaa ponoꞌaa ei hafeloꞌa, maꞌea. Maꞌuaa fei fanaa mei Haidaa, harenua lomi i pedutoo, fei i norai aꞌab Christ Jesus, mei Fasuu oꞌou.