Gutafarawania ma Unuwenuwea
5
Siꞌei ba ona wanewanedii wagii fei weꞌiaa naranara, onaa gutafarawani aꞌa mei Haidaa uaa mei Fasuu oꞌou Jesus Christ, 2 mei na ugainaa oꞌou aꞌa fei weꞌiaa naranara ba onei waduꞌainaa aꞌa fei rawaniꞌa, fei ona oa i wagina eni. Ma onab niꞌeniꞌe aꞌa fei oꞌonaia unu ba oꞌaa oafipui aꞌa fei haweraa mei Haidaa. 3 Maꞌuaa ana onac niꞌeniꞌe aꞌa ei fiꞌiaa oꞌou, uaa ona aida ba ei fiꞌia, ipowe fanoramii fei ba onei utauai 4 ma fei ba o utauai, i bigiꞌaa fei rawaniꞌa maumau ma fei rawaniꞌa maumau, i bigiꞌaa fei oꞌonaia unu. 5 Ma fei oꞌonaia unu, lomi ba o faꞌadudu wagina, uaa namina bauana fei haguaa mei Haidaa, fei na augia i laloo iaa oꞌou fei Spiriti Apuna, fei ina fanaa oꞌou. 6 Uaa aꞌa fei paꞌaa au, aꞌa fei au lomi faufau oꞌou, Christ na maꞌe ba i tohadiweꞌinaa oꞌou, uaa ona hafelo. 7 Paꞌaa lomi hememea ba iwe maꞌe ba i hadumaa hemea wanewanea ramaꞌa, maꞌuaa woro hemea i maꞌe ba i hadumaa hemea rawaniꞌa. 8 Maꞌuaa mei Haidaa na famaꞌaa oꞌou fei haguana aꞌa feni: ei ana oi oa laloo ei hafeloꞌa, Christ na todigaa oꞌou aꞌa fei maꞌeana.
9 Siꞌei ba ona wanewanedii aꞌa fei namona, ana i aꞌana napaꞌaa faꞌua ba ona tela aꞌa fei sibaa mei Haidaa! 10 Uaa, hamatee ina faꞌua ba ei i paꞌi watolaa oꞌou ma mei Haidaa, mei naꞌuna, wagii fei maꞌeana na fawanewaneaa oꞌou aꞌa mei Amana. Ma siꞌei ba lomi watolaa oꞌou ma mei Haidaa napaꞌaa faꞌua ba ona tela uaa fei harenuaa mei naꞌuna! 11 Ma hepalodiai, aꞌa mei Fasuu oꞌou Jesus Christ, mei na fawanewaneaa watolaa oꞌou ma mei Haidaa, i aꞌana, ona niꞌeniꞌe aꞌa mei Haidaa.
Maꞌea aꞌa Adam, Harenua aꞌa Christ
12 Siꞌei, ei hafeloꞌa na nomai i malagufu aꞌa hemea ramaꞌa ma fei maꞌea na nomai wagii ei hafeloꞌa ma ana aleꞌei, fei maꞌea na nomai aꞌa minaa ei ramaꞌa, uaa minaa ei, rona bigiꞌaa ei hafeloꞌa— 13 uaa, ei atawe paꞌi fei law, na udedii ei hafeloꞌa yeni malagufu. Maꞌuaa ei hafeloꞌa, lomi na paꞌi dududuana nabaa lomi na paꞌi law. 14 Maꞌuaa fei maꞌea, hepalo baua manumanu aꞌa fei au Adam amaꞌanaa fei au Moses, ana aꞌa ei lomi rona barafeaa hepalo warea, aleꞌei fei bigiꞌaa Adam, mei hia, haduoo mei ba i nomai.
15 Maꞌuaa fei fana abaa aleꞌei fei barafea. Uaa, siꞌei ba watauda, rona maꞌe aꞌa fei barafeaa hemea ua ramaꞌa, ana napaꞌaa faꞌua ba fei rawaniꞌaa mei Haidaa ma fei fana, fei na nomai aꞌa hemea ua ramaꞌa, Jesus Christ, na hawainaa watauda! 16 A warediai ba fei fanaa mei Haidaa abaa aleꞌei fei aree ei hafeloꞌaa mei ramaꞌa mei: Fei dududua na neneraa hepalo hafeloꞌa ma na notomai fagianaa, maꞌuaa fei fana na neneraa watauda barafea ma na notomai wanewanea. 17 Uaa aꞌa fei barafeaa hemea ua ramaꞌa, fei maꞌea na nogipelao aꞌa mei ramaꞌa mei ma siꞌei, ana napaꞌaa faꞌua ba aꞌa ena rona tonaa fei baua rawaniꞌaa mei Haidaa ma fei fana ba roꞌaa wanewane aꞌa mei Haidaa, rowe paꞌi harenua aꞌa hemea ua ramaꞌa, Jesus Christ.
18 Siꞌei ba hepalo ua barafea na notonamii fei fagianaa minaa ei ramaꞌa, ana aleꞌei, hepalo ua rawaniꞌa bigiꞌa, fei fawanewanea, na fani harenua aꞌa minaa ei ramaꞌa. 19 Uaa aꞌa fei barafeaa hemea ua ramaꞌa, watauda ramaꞌa rona hafelo, ana aleꞌei, aꞌa fei rawaniꞌa bigiꞌaa hemea ua ramaꞌa, watauda, roꞌaa wanewane.
20 Fei law na nomai ba ei barafea nei nogipelao. Maꞌuaa i nogipelao ei barafea, fei rawaniꞌaa mei Haidaa, ana fi gipedilao 21 ma ana aleꞌei ba ei hafeloꞌa na nogipelao fininaa fei maꞌea, ana aleꞌei, fei rawaniꞌa fanaa mei Haidaa nei nogipedilao aꞌa fei wanewanea ba nei fani fei harenua lomi i pedutoo, fei i nomai aꞌa Jesus Christ mei Fasuu oꞌou.