Abraham na Wanewane wagii fei Weꞌiaa Naranarana
4
Aꞌa fei manumanu fei, oꞌaa ware batanai aꞌa Abraham, mei upuu oꞌou? 2 Nabaa faꞌua ba Abraham na wanewane aꞌa ei bigiꞌana, ina paꞌi paꞌafina ba i mamagugu, maꞌuaa aꞌa ba i pudaa mei Haidaa. 3 Fei Buꞌu Apuna na ware batanai? “Abraham na narafaweꞌi aꞌa mei Haidaa ma aꞌa fei, ina wanewane.”4 Ma nabaa nemea i bigibigi, fei ponoꞌana abaa aleꞌei fana, uaa nei paꞌi ponoꞌana. 5 Maꞌuaa aꞌa mei lomi na bigi, ma na narafaweꞌi aꞌa mei Haidaa, mei fawanewanea uaa fei weꞌiaa naranarana, mei Haidaa na tenia ba hia, na wanewane. 6 Ana aleꞌei ei wareaa David ei i uꞌugaa fei hawegiaa ei ramaꞌa lomi rona bigibigi maꞌuaa mei Haidaa na fawanewaneꞌuaiaa roꞌou:
7 “Niꞌeniꞌea aꞌa ena
ina futoaa ei hafeloꞌaa roꞌou,
ena na hawaipaꞌai ei hafeloꞌaa roꞌou.
8 Niꞌeniꞌea aꞌa mei
lomi iwe nonominaa ei hafeloꞌana mei Fasu.”
9 Fei hawegia fei, na ude aꞌa ei rona moroꞌaa hudii wawanei ua, o ei lomi rona moro anaa? Ona ware ba fei weꞌiaa naranaraa Abraham, sifei fei na fawanewaneia. 10 Batanai ba hia na wanewane aleꞌei? Ina wanewane nenee fei i moroꞌaa hudii wawaneina, o ei atawe moroꞌia? Aꞌa ba ina wanewane nenee fei, uaa doꞌo rawarawa. 11 Ma ina tonaa fei hilalaa moroꞌa ba i famaꞌaia ba ina wanewanedii aꞌa fei weꞌiaa naranarana ma nawe moroꞌaa hudii wawaneina. Siꞌei, hia amaa minaa ei rona narafaweꞌi maꞌuaa lomi rona moroꞌaa hudii wawanei ba ronei tonaa fei wanewanea. 12 Ma hia ana amaa ei rona moroꞌaa hudii wawanei maꞌuaa, ei ramaꞌa ei, lomi rona moro ua, ana rona narafaweꞌi ana aleꞌei mei amaa oꞌou Abraham ei i narafaweꞌi ma atawe moro.
13 Abaa wagii fei law ba Abraham ma ei paina, rona tonaa fei faꞌunaia ba hinene, hia, i tonaa feni malagufu, maꞌuaa na tonia aꞌa fei wanewanea, fei i nofininamii fei weꞌiaa naranara. 14 Uaa, nabaa ei rona neneraa fei law, roꞌaa tonaa feni malagufu, fei weꞌiaa naranara, loꞌe hanuna ma fei faꞌunaia, ana lomi awatana, 15 uaa aꞌa fei law, i nofininamii fei sibana. Ma nabaa loꞌe law, ana lomi barafea.
16 Siꞌei, fei faꞌunaia i nofininamii fei weꞌiaa naranara ba i nomai aꞌa fei rawaniꞌa fanaa mei Haidaa ma na hawia ba roꞌaa tonia minaa ei pai Abraham abaa aꞌa unaa ei rona neneraa fei law, maꞌuaa aꞌa ei rona paꞌi fei weꞌiaa naranara aleꞌei Abraham anaa. Hia mei amaa minaa oꞌou. 17 Ana aleꞌei fei neꞌaia: “Una augio aleꞌei amaa watauda baua gufu.” Hia amaa oꞌou i pudaa mei Haidaa, mei hia na narafaweꞌi, ana mei na fani harenua aꞌa ei maꞌea, mei i augaa ei manumanu lomi inadoꞌo ude mina.
18 Lomi paꞌafina ba i faꞌoꞌoninaa ununa, maꞌuaa Abraham na oꞌonai ununa ma narafaweꞌi ma idii, pawe hia amaa watauda baua gufu ana aleꞌei i faꞌunai aꞌana ba, “Ana aleꞌei, owe paꞌi watauda naꞌumu.” 19 Ina fanunupaꞌia ba fei ununa aleꞌei unuu maꞌea, uaa ina paꞌi hefa puꞌu igisimasina, maꞌuaa lomi na adudu fei weꞌiaa naranarana. Ma ana ina aida ba fei watau Sarah ana aleꞌei maꞌea. 20 Lomi na adudu fei weꞌiaa naranarana aꞌa fei faꞌunaiaa mei Haidaa, maꞌuaa ina faweꞌiaa fei naranarana ma uduginaa mei Haidaa 21 ma namina narafaweꞌi ba mei Haidaa na paꞌi faufauna ba i bigiꞌaa tamanu na faꞌunainia. 22 Sifei, fei paꞌafina ba hia na wanewane. 23 Fei warea ba “hia na wanewane” aꞌa ba warea aꞌana ua, 24 maꞌuaa aꞌa oꞌou anaa, mei Haidaa iwe fawanewaneaa hini oꞌou na narafaweꞌi aꞌa mei na faꞌasiꞌanaa mei Fasuu oꞌou Jesus aꞌa fei maꞌea. 25 Ina fifaninia wagii fei maꞌea, uaa ei hafeloꞌaa oꞌou ma faꞌasiꞌania ba oꞌaa wanewane.