Fei Oafaguguaa mei Haidaa
3
I paꞌi tamanu rawaniꞌana nabaa hemea, hia Jew, o nabaa hemea na moroꞌaa hudii wawaneina? 2 Hiꞌi, na paꞌi baua rawaniꞌana! Fei rawaniꞌana sifei ba mei Haidaa na faninaa panii roꞌou ei wareana.3 Ma nabaa hefiꞌa lomi na weꞌi naranaraa roꞌou—fei ba lomi na weꞌi naranaraa roꞌou, hanuna ba mei Haidaa, lomi na oafagugu? 4 Paꞌaa lomi! Mei Haidaa, hia faꞌua ma ei ramaꞌa, roꞌou, sifisifi. Aleꞌei ei neꞌaia:
Ba roꞌaa maꞌaia ba tamanu ona wareia,
ina faꞌuai ma ona mua ei ona fadududu.”
5 Maꞌuaa, nabaa fei maumau oꞌou, fei lomi na wanewane i faꞌarewaia ba fei maumau mei Haidaa na rawani ua, oꞌaa ware ba lomi na wanewane ba fei sibana na dinaa aꞌa oꞌou? (Uꞌei wareaa ei mau naranaraa ei ramaꞌa eꞌeni.) 6 Paꞌaa lomi! Nabaa aleꞌei, batanai ba mei Haidaa i dududuaa feni malagufu? 7 Woro hemea i ware ba, “Nabaa fei mau sifisifiu na famaꞌaia ba fei maumau mei Haidaa napaꞌaa faꞌuai ma siꞌei na fagipeaa fei harana, tani ei ba ana fi hafelo yau?” 8 Hefiꞌadiai, rona uꞌufafeloaa haiꞌou ba haiꞌounadii wareia ba, “Onei bigiꞌaa ei hafeloꞌa ba nei paꞌi rawaniꞌa wagina”. Roꞌaa paꞌaa aree roꞌou.
Lomi Hemea na Wanewane
9 O fapoꞌai batanainia fei? Fei maumau oꞌou na rawanidiaia aꞌa fei maumau roꞌou? Paꞌaa lomi! Ona waredii ba ei Jew ma ei Gentile, rona fiminaꞌei, uaa minaa roꞌou, rona paꞌi hafeloꞌa. 10 Aleꞌei fei neꞌaia:
Lomi hemea na wanewane, paꞌaa lomi hemea;
11 “lomi hemea na apaꞌia,
lomi hemea i labaginaa mei Haidaa.
12 Minaa ei, rona ofadugia,
minaa roꞌou peduga, lomi haraa roꞌou;
lomi hemea i bigifarawani,
paꞌaa lomi hemea.”b
13 “Ei onoꞌonoo roꞌou, aleꞌena huapu;
rafee ei rawerawee roꞌou, ware sifisifi.”
Fei siafaa ei waꞌa na ude i bigibigii umuu roꞌou.”
14 “Ei umuu roꞌou, namina pepesu aꞌa fei umua ma ei paraꞌaa.”
15 “Ei pinee roꞌou na maduare ba roꞌaa foꞌafawigii namo;
16 “rona fafeloaa ei ramaꞌa ma fani fiꞌiaa roꞌou
17 ma fei talaa gutafarawania, lomi rona aida.”
18 “Lomi rona maꞌauaa mei Haidaa.”
19 Ma ona aida ba tamanu na wareia fei law, fi wareia aꞌa ei rona neneraa fei law ba minaa ei ramaꞌa, roꞌaa famadumu ma minaa ei tadiweꞌai, roꞌaa ufalarai aꞌa fei dududuaa mei Haidaa. 20 Siꞌei, i pudana, lomi hemea ba i wanewane hamatee ina neneraa fei law; maꞌuaa aꞌa fei law, ona aida ba oꞌou, hafeloꞌa.
Fei Wanewanea wagii fei Weꞌia Naranara
21 Maꞌuaa eꞌeni nawe arewa fei wanewanea noranarai aꞌa mei Haidaa ma abaa aꞌa fei law, fei rona uꞌugia ei mamamaꞌa mawe fei law. 22 Feni wanewanea noranarai aꞌa mei Haidaa, i nomai aꞌa fei narafaweꞌia ma i dinaa aꞌa minaa ei rona narafaweꞌi aꞌa Jesus Christ. Lomi hemea na uꞌugai, 23 uaa minaa oꞌou, hafeloꞌa ma ona tauhafo aꞌa fei haweraa mei Haidaa, 24 maꞌuaa ona toꞌuaiaa fei wanewanea wagii fei rawaniꞌana fininaa fei ponohadiweꞌia, fei nomai aꞌa Christ Jesus. 25 Mei Haidaa na fania aleꞌena ba aꞌa fei maꞌeana, lomi manumanu watolaa oꞌou ma mei Haidaac uaa fei weꞌiaa naranara wagii fei namona. Ina bigiꞌaa fei ba i famaꞌaa ei na wanewane aꞌana, uaa aꞌa fei ofasiꞌana, itawe dududuaa ei hafeloꞌa ona bigiꞌia mina— 26 ina bigiꞌia ba i famaꞌaa ei na wanewane aꞌana eꞌeni, uaa hia na wanewane ma ana mei i fawanewaneaa ei na weꞌi naranaraa roꞌou aꞌa Jesus.
27 Paꞌaa lomi paꞌafii fei mamaguguaa oꞌou. Uatani? Lomi na hawia ba oꞌaa wanewane nabaa oꞌaa neneraa fei law, maꞌuaa nabaa i weꞌi fei naranara, ina hawia. 28 Uaa, ona ware ba hemea ramaꞌa na wanewane aꞌa fei weꞌiaa naranarana ma aꞌa ba i neneraa fei law. 29 Mei Haidaa, hia Haidaniaa ei Jew ua? Haa—abaa hia ana Haidaniaa ei Gentile? Hiꞌi, ei Gentile anaa, 30 uaa na paꞌi hemea ua Haidaa, mei i fawanewaneaa ei rona moroꞌaa hudii wawanei wagii fei narafaweꞌia mawe ei lomi rona moro, wagii ana fei narafaweꞌia. 31 Fei warea fei, paꞌafina ba lomi hanuna fei law, hamatee fei weꞌiaa naranara? Paꞌaa lomi! Maꞌuaa agia, oi neneraa fei law.