Fei Dududuaa mei Haidaa na Wanewane
2
Siꞌei, nabaa ona nara ba hefiꞌa na hafelo, lomi i paꞌi tala ba o ware ba ona rawani, uaa aꞌa tamanu ona nara ba rona bigifafelo wagina, ana ona fafeloaa anaio, uaa ei manumanu ei, ana ona bigiꞌia. 2 Ma ona aida ba fei paꞌafii fei dududuaa mei Haidaa aꞌa ei rona bigiꞌaa ei manumanu ei, na neneraa tamanu na wanewane. 3 Yoi ramaꞌa ua. Tani o nara ba rona bigifafelo, maꞌuaa ei manumanu ei, ana ona bigiꞌia—haa, ei naramu ba o ponipaꞌainaa fei dududuaa mei Haidaa? 4 O, ona nara ba aba baua manumanu ei rawaniꞌana, o fei walaloaa sibana, o fei ofasiꞌana ma lomi ona apaꞌia ba fei rawaniꞌaa mei Haidaa fi nodugio aꞌa fei filogiaa naranara?5 Maꞌuaa, siꞌei ba namina waiwai tabamu ma lomi ona filoginaa ei naranaramu, oi faꞌapoiꞌuaiaa fei fagianamu aꞌa fei arewaa sibaa mei Haidaa ena na arewamai famaꞌaiaa fei wanewane dududuana. 6 Mei Haidaa, “iwe fanaa hememea ana aleꞌei tamanu ina bigiꞌia.” 7 Aꞌa ei ronaꞌaida nunumai ba roꞌaa labaginaa fei hawera, fei honua ma fei ba lomi ro maꞌetoo, mei Haidaa ipowe fanaa roꞌou fei harenua lomi i pedutoo. 8 Maꞌuaa aꞌa ei rona naraꞌuaiaa ana roꞌou ma ofadugaa fei faꞌuaia ma neneraa ei hafelo, rowe tonaa fei dududuana ma fei sibana. 9 I paꞌi gutafafeloa ma fiꞌia naranara aꞌa hememea ramaꞌa na bigiꞌaa ei hafeloꞌa; doꞌo rawarawa aꞌa ei Jew ma hinene, ei Gentile; 10 maꞌuaa hini i bigiꞌaa ei rawaniꞌa, iwe tonaa fei hawerana, honua ma gutafarawania; doꞌo rawarawa aꞌa ei Jew ma hinene, ei Gentile. 11 Uaa mei Haidaa, loꞌe na paꞌi papaꞌaa ununa.
12 Minaa ei rona bigiꞌaa ei hafeloꞌa ma lomi rona paꞌi fei law, faꞌua lomi rona paꞌi fei law, maꞌuaa ana rowe maꞌe. Ma minaa ei rona paꞌi fei law, ana iwe dududuaa roꞌou fei law. 13 Uaa abaa ena rona guainaa fei law, ena rona wanewane pudaa mei Haidaa, maꞌuaa ena rona neneraa fei law, iwe ware ba rona wanewane. 14 (Hiꞌi, ei Gentile lomi rona paꞌi fei law, maꞌuaa nabaa rona bigiꞌuanaa ei naranaraa roꞌou ma ei bigiꞌaa roꞌou na neneraa fei law, faꞌua ba lomi rona paꞌi fei law, maꞌuaa rona fanunupaꞌaa tamanu na rawani ba roꞌaa bigiꞌia, 15 uaa rona famaꞌaia ba tamanu fei i neneraa fei law na neꞌidii laloo iaa roꞌou ma ei naranaraa roꞌou, ina famaꞌaiaa roꞌou ma warefanaa roꞌou ba ei bigiꞌaa roꞌou, na tata, o na wanewane.) 16 Ma ei manumanu ei, iwe nomai aꞌa fei arewaa i umuinaa mei Haidaa Jesus Christ ei na dududuaa ei opaꞌaiaa naranaraa ei ramaꞌa. Ma fei, iwe bigiꞌia ana aleꞌei fei nafane wareia laloo fei rawaniꞌa wareau.
Ei Jew ma fei Law
17 Ma yoi, nabaa ona ware ba yoi hemea Jew ma nara ba o neneraa fei law ma ona mamagugu ba ona rawani pudaa mei Haidaa 18 ma nabaa ona apaꞌaa fei nunumiana ma aida ba tamanu na wanewane, uaa ina feroinio fei law 19 ma nabaa ona nara ba yoi hemea talaidugaa ei pudawerai, aleꞌena ramai ena roꞌou dupuaa fei roromaa, 20 ba yoi hemea feroiaa ei poapoa, hemea feroiaa ei baduu pusuꞌo ua, hamatee ona paꞌi fei law ma lalona na paꞌi apaꞌa ma faꞌuaia 21 ma yoi, mena ona feroinaa hefiꞌa—haa, lomi ona feroinaa ana yoi? Ma yoi mena, ona uꞌu ba hefiꞌadiai, roneiꞌaa fafanao—haa, lomi ona fafanao? 22 Yoi, mena ona ware ba ei ramaꞌa, roneiꞌaa fiharoharoipaꞌai—haa, lomi ona bigiꞌia? Ma yoi, mena ona bidibidi unumu aꞌa ei haidaa sifisifi—haa, lomi ona losuinaa hefiꞌa haidaa sifisifi? 23 Yoi, mena ona mamagugu aꞌa fei law—haa, lomi ona bigifafelo i pudaa mei Haidaa ei ona barafeaa fei law? 24 Aleꞌei ei neꞌaia: “Ei Gentile, rona fafeloaa fei haraa mei Haidaa, uaa fafaiaa hamuꞌodu.”a
25 Fei moroꞌaa hudii wawanei na paꞌi hanuna nabaa ona neneraa fei law, maꞌuaa nabaa ona barafeaa fei law, yoi, aleꞌena lomi ona moroꞌaa hudii wawaneimu. 26 Nabaa ena lomi rona moroꞌaa hudii wawanei ma rona neneraa fei law, tawiꞌaa roꞌou aleꞌena ena rona moroꞌaa hudii wawanei? 27 Mei lomi napaꞌaa moroꞌaa hudii wawaneina, maꞌuaa na neneraa fei law, fei maumauna na famaꞌaia ba ona tata. Yoi na paꞌi fei neꞌaia ma moroꞌaa hudii wawanei, maꞌuaa onab hafelo uaa ona barafeaa fei law.
28 Nabaa nemea na moroꞌaa hudii wawaneina, aꞌa ba hanuna ba hia Jew. Ma fei paꞌaa moroꞌaa hudii wawanei, abaa manumanuu augu, hamatee manumanuu laloo ia. 29 Agia, hemea ramaꞌa, hia Jew i laloo iana; ma fei moroꞌaa hudii wawanei, manumanuu laloo iana, bigiꞌaa fei Spiriti, aꞌa ba manumanuu fei neꞌaia. Ei ramaꞌa aleꞌei, mei Haidaa, i uduginaa roꞌou ma abaa udugiaa ramaꞌa.