ROMANS
1
Yau Paul, hemea nafii Christ Jesus, na rafeinau mei Fasu ba yau, apostle ma na auꞌuꞌugainau ba nei bigiꞌaa fei rawaniꞌa wareaa mei Haidaa— 2 fei rawaniꞌa warea, fei nadoꞌo faꞌunainia aꞌa ei mamamaꞌa i laloo fei Buꞌu Apuna— 3 fei na uꞌufanaa oꞌou fei uꞌugaa mei Naꞌuna, mei na tonaa fei maumau ramaꞌa noranamai aꞌa fei pai David 4 ma wagii fei Spiriti,a fei na apunai, ina tonaa fei faufau mei Haidaa ba i famaꞌaia ba hia Naꞌuu mei Haidaab wagii fei asiꞌanana aꞌa fei maꞌea, Jesus Christ, mei Fasuu oꞌou. 5 I aꞌana ma wagii fei ba i farawaninaa fei harana, haiꞌouna tofaꞌaꞌaꞌuaiaa fei rawaniꞌa ma fei bigiꞌaa apostle ba haiꞌou lalaꞌaa minaa ei ramaꞌa dupuaa ei Gentile ba ronei neneraa tamanu i nomai aꞌa fei weꞌiaa naranara. 6 Ma hamuꞌou, ana i dupuaa ei rona rafei ba maroaa Jesus Christ.7 Feni i dinaa aꞌa minaa hamuꞌou ena yena Rome, hamuꞌou ena na rafei ma haguaa hamuꞌou mei Haidaa ba hamonei apunai aꞌana.
Fei rawaniꞌa ma fei gutafarawania i dinaa aꞌa hamuꞌou noranamai aꞌa mei Haidaa, mei Amaa oꞌou ma mei Fasuu oꞌou Jesus Christ.
Fei Ude Nunumiaa Paul ba i Dinaa Rome
8 I aꞌa Jesus Christ, adoꞌo ware ‘ta’ aꞌa mei Haidaniau uaa minaa hamuꞌou, hamatee fei weꞌiaa naranaraa hamuꞌou, ronamina uꞌugia tadiweꞌaiaa malagufu. 9 Una bigifaweꞌi aꞌa mei Haidaa fininaa minaa ei faufau ei una uꞌugaa fei rawaniꞌa wareaa mei Naꞌuna. Ma mei Haidaa, hia ugaa neneu ba yau nafane nonominaa hamuꞌou 10 laloo ei lafulafuau ranimai ma ufi lafulafu ba aꞌa fei nunumiaa mei Haidaa ba fei talau nei gigi ba awe nowau aꞌa hamuꞌou.
11 Ba apaꞌaa maꞌa hamuꞌou, ba a fanaa hamuꞌou ei na fanau fei spiriti ba nei paꞌi faufau hamuꞌodu 12 ba hamuꞌou ma yau nei fihaduminaa ei weꞌiaa naranaraa oꞌodu. 13 Nunumiau, ena lofuu, ba hamonei aida ba unafane naranara ba amii maꞌa hamuꞌou (maꞌuaa nafane lawagi talau nopaꞌamii eꞌeni) ba a hufu fua i dupuaa hamuꞌou, ana aleꞌei na bigidigia aꞌa hefiꞌadiai ei Gentile.
14 Uneipaꞌaa bigifipui aꞌa ei Greece mawe ei abaa Greece ma aꞌa eꞌei rona paꞌi apaꞌaa roꞌou mawe ei rona poapoai. 15 Siꞌei unamina refurefu ba a uꞌugaa fei rawaniꞌa warea aꞌa hamuꞌou ena yena Rome.
16 Lomi una mamafa aꞌa fei rawaniꞌa warea, uaa sifei, fei faufau mei Haidaa ba i fatelaꞌanaa minaa ei ramaꞌa na weꞌi naranaraa roꞌou, doꞌo rawarawa ei Jew ma hinene ei Gentile. 17 Uaa laloo fei rawaniꞌa warea, mei Haidaa na famaꞌaa fei talaa wanewanea, fei noranamai aꞌa fei weꞌiaa naranara, farawarawa amaꞌanaloo pedupeduna,c ana aleꞌei rona neꞌinia ba: “Ei wanewanea, ronaꞌaida bigifininaa fei weꞌiaa naranara.”
Fei Dududua ma fei Sibaa mei Haidaa aꞌa Ei Ramaꞌa
18 Mei Haidaa fi famaꞌaa fei dududua fipuinaa fei sibana i norai pafea dinaa aꞌa minaa ena hafeloꞌa ma ei hafeloꞌa bigiꞌaa ei ramaꞌa, ei rona hafududumaa fei faꞌua warea aꞌa ei hafeloꞌa bigiꞌaa roꞌou, 19 uaa ei maumau mei Haidaa na arewadii aꞌa roꞌou, hamatee mei Haidaa na faꞌarewadigia aꞌa roꞌodu. 20 Uaa aꞌa fei mamaraiamii feni malagufu nopaꞌamii eꞌeni, ei maumau mei Haidaa, ei lomi ona maꞌapaꞌia, aleꞌena fei faufauna, fei na ude ranimai ma fei maumauna ba hia, mei Haidaniaa ei maumau ei, ona fanunufarawaninia ma apaꞌifarawaninia aꞌa tamanu ina bigidigia ma siꞌei, ei ramaꞌa, paꞌaa loꞌe ba roꞌaa warefasifipaꞌi ba lomi rona aida.
21 Faꞌua ba rona apaꞌaa mei Haidaa maꞌuaa, lomi rona uduginia ba hia mei Haidaa ma ana lomi rona ware ‘ta’ aꞌana, lomi rona narafarawani ma fei poapoa naranaraa roꞌou, namina roroma. 22 Rona ware ba rona paꞌi apaꞌaa roꞌou maꞌuaa, ronapaꞌaa poapoai 23 ma mei Haidaa, mei lomi i maꞌetoo, rona filoginaa fei hawerana aꞌa ei manumanu rona bigiꞌia ba fafanunuana aleꞌena maumau ei ramaꞌa (ei foraimanunu) mawe aleꞌena ei manufidufidu ma ei manulelele ma ei rona oꞌataꞌata.
24 Siꞌei, mei Haidaa na rawaꞌaꞌafinaa roꞌou aꞌa ei hafeloꞌa nunumiaa ei naranaraa roꞌou ba roꞌaa fafeloaa ana unuu roꞌou aꞌa ei fitatafipaꞌaia. 25 Rona filoginaa fei faꞌuai wareaa mei Haidaa aꞌa ei sifisifi ma losui ma uduginaa ei bigiꞌaa mei Haidaa ma aꞌa ba mei i bigiꞌaa ei manumanu, mei onei uduginia ranimai. Amen.
26 Aꞌa fei, mei Haidaa na rawaꞌafinaa roꞌodu aꞌa ei mamafaa nunumiaa unuu roꞌou. Ma ei pifinee roꞌou, ana rona filoginaa tamanu na wanewane aꞌa ei lomi na wanewane. 27 Ana aleꞌei, ei wawane, lomi rona fiharoi aꞌa ei pifine, uaa namina bauanai fei ba roꞌaa fiharoi ana roꞌou ei wawane. Ei wawane na bigiꞌaa tamanu lomi na rawani aꞌa ana roꞌodu. Ma ana roꞌou, rona tonaa fei aree roꞌou aꞌa ei hafeloꞌa bigiꞌaa roꞌou.
28 Ma hepalodiai, siꞌei ba rona nara ba loꞌe manumanu nabaa roꞌaa siminaa fei apaꞌaa mei Haidaa, te, ina rawaꞌafainaa roꞌou aꞌa fei poapoa naranaraa roꞌou ba roꞌaa bigiꞌaa tamanu roneiꞌaa bigiꞌia. 29 Namina pepesu aꞌa roꞌodu minaa ei maumau hafeloꞌa, wawaꞌai poa, fai lomi naranaraa rawani. Ronamina pepesu aꞌa fei nanamaia, foꞌafamaꞌea, fiharenia, sifisifiꞌa ma fei bidibidii unu. Rona bababauꞌu, 30 rona warefafeloaa hefiꞌadiai, na bidi unuu roꞌou aꞌa mei Haidaa, warefani, aguꞌagui, mamagugui; rona pagipagiaa hefiꞌa tala ba roꞌaa bigiꞌaa ei hafeloꞌa; rona barafeaa ei ama ma inaa roꞌou; 31 na waiwai tabaa roꞌou ma lomi weꞌiaa naranara, lomi faloloaꞌia ma lomi rona haguaa hefiꞌadiai. 32 Faꞌua ba rona apaꞌaa fei wanewane wareaa mei Haidaa, fei ba ei rona bigiꞌaa ei manumanu ei, aree roꞌou, maꞌea, maꞌuaa rona bigiꞌuaiaa ei manumanu ei ma ana rona uga ua aꞌa ei rona bigiꞌia.