Wareaa Paul aꞌa Hememea
16
I aꞌa hamuꞌou, una tenaa mei agii oꞌou Phoebe, hemea nafiia fei losuu yei Cenchrea. 2 A iꞌiginaa hamuꞌou ba hamonei taufagutania aꞌa mei Fasu ana aleꞌei hamona taufagutanaa ei apunaiaa mei Haidaa ma fani pani wagii ei nunumiana aꞌa hamuꞌou, uaa hia na hadumaa wataua ramaꞌa mawe yau.3 Famafufuoinaa Priscillab ma Aquila, laguei rafirafiu bigiꞌa aꞌa Christ Jesus. 4 Laguna nigoaa ei manumanu hafelo uaa laguꞌei hadumau. Abaa uniau na niꞌeniꞌe, maꞌuaa minaa ei losuu ei Gentile anaa.
5 Ana famafufuoinaa fei losuu ei ronaꞌo gutafipui aꞌa fei humuu lagua.
Famafufuoinaa mei paꞌaa tafiu Epenetus, mei rawarawa tonaa Christ aꞌa fei gufu Asia.
6 Famafufuoinaa Mary, mei na bigifaweꞌi aꞌa hamuꞌodu.
7 Famafufuoinaa laguena maroau, Andronicus ma Junias, laguei laguna oafipui aꞌau yei boboꞌaia. Lagunamina ude uꞌugai dupuaa ei apostle ma lagua doꞌo rawarawa tonaa Christ laraa yau.
8 Famafufuoinaa Ampliatus, mei una haguia aꞌa mei Fasu.
9 Famafufuoinaa Urbanus, mei rafirafii oꞌou aꞌa fei bigiꞌaa Christ mawe mei paꞌaa tafiu Stachys.
10 Famafufuoinaa Apelles, mei na oadii aꞌa ei manimania ma na rawani i pudaa Christ.
Famafufuoinaa ei maroaa fei humuu Aristobulus.
11 Famafufuoinaa mena maroau, Herodion.
Famafufuoinaa ena maroaa fena humuu Narcissus, ena rona neneraa mei Fasu.
12 Famafufuoinaa laguena pifine, Tryphena ma Tryphosa, laguena laguna bigifaweꞌi aꞌa mei Fasu.
Famafufuoinaa mena paꞌaa tafiu Persis, hemeadiai pifine namina bigifaweꞌi aꞌa mei Fasu.
13 Famafufuoinaa Rufus, mei na rafeiaa mei Fasu mawe mei inana, mei ana aleꞌei paꞌaa inau.
14 Famafufuoinaa Asyncritus, Phlegon, Hermes, Patrobas, Hermas ma ena lofu aꞌa roꞌou.
15 Famafufuoinaa Philologus, Julia, Nereus ma mei agina ma Olympas mawe minaa ei apunaiaa mei Haidaa aꞌa roꞌou.
16 Hatofaa pudaa hamuꞌou fininaa rawaniꞌa naranara ma famafufuoinaa hememea hamuꞌou. Minaa ei losuu Christ, rona aloawii ei famafufuoiaa roꞌou.
17 A warefaweꞌi aꞌa hamuꞌou, ena lofuu ba hamonei wagiꞌinaa hamuꞌou aꞌa ena roꞌaa fafifalagii ma au alabeꞌa i maꞌaa hamuꞌou, ena rona faꞌalawiꞌinaa hamuꞌou aꞌa ena apaꞌaa hamuꞌou. Faraua aꞌa roꞌou. 18 Uaa ena mau ramaꞌa aleꞌena, lomi rona neneraa mei Fasuu oꞌou Christ, maꞌuaa ei puguaa roꞌou ua. Aꞌa ena roꞌoa ma hofeaa warea, roꞌaa sifiꞌaa naranaraa ei ramaꞌa bibiyeiꞌualao. 19 Minaa ei ramaꞌa, rona guainia ba hamuꞌou ramaꞌaa guaiawarea hee, namina bauana fei niꞌeniꞌeau aꞌa hamuꞌou; maꞌuaa, nunumiau ba hamoneipaꞌaa paꞌi apaꞌaa hamuꞌou aꞌa ei rawaniꞌa ma faraua aꞌa ei hafeloꞌa.
20 Mei Haidaniaa fei gutafarawania na rarafiꞌi ba ipowe fudosinaa Satan haroo pinee hamuꞌou.
Fei rawaniꞌaa mei Fasuu oꞌou Jesus i oafipui aꞌa hamuꞌou.
21 Timothy, mei rafirafiu aꞌa fei bigiꞌa mawe ei maroau, Lucius, Jason ma Sosipater, rona aloawii fei famafufuoiaa roꞌou aꞌa hamuꞌou.
22 Yau, Tertius, meni i neꞌinaa feni neꞌia na famafufuoinaa hamuꞌou aꞌa mei Fasu.
23 Gaius, mei i faniꞌeniꞌeaa fei gutanau ma minaa feni losuu yeni, na aloawii fena famafufuoiana aꞌa hamuꞌodu.
Erastus, mei famamoaa ei bigiꞌaa wataua ramaꞌa laloo fei baua gufu ma mei lofuu oꞌou Quartus, laguna aloawii fei famafufuoiaa lagua. 24\f + \fr 16:24 \ft Hefiꞌa neꞌia ba, famafufuoiaa lagua. 24 Fei rawaniꞌaa mei Fasuu oꞌou Jesus Christ i oa aꞌa minaa hamuꞌou. Amen.\f*
25 Ma i aꞌana, mei na hawia ba i faroaa fei rawaniꞌa warea, fei una uꞌugia, fei uꞌugaa Jesus Christ, fei na fiboꞌii aꞌa fei nawe arewa, fei nadoꞌo udeꞌopaꞌai mina, 26 maꞌuaa eni, na ude areꞌare ma onawe apaꞌia aꞌa ei neꞌaiaa ei mamamaꞌa wagii fei warefaweꞌiaa mei Haidaa, mei i oalao ma ba minaa ei gufu tadiweꞌaia, ropowe narafaweꞌi ma nenegia— 27 Aꞌa Jesus Christ, onei uduginaa mei uniana Haidaa, mei na paꞌi apaꞌana ranimai ranimai. Amen.