Timothy na Talaihugiaa Paul ma Silas
16
Ina aununaa Derbe. Ma nene na aununaa Lystra ma hemea otalai nenera na guta yei, harana Timothy. Mei inana, Jew, hemea narafaweꞌia, maꞌuaa mei amana, Greece. 2 Ei lofu yei Lystra ma Iconium, rona ware ba hia, rawaniꞌa ramaꞌa. 3 Paul na nunuminia ba i nodugia wagii fei tatalaiana, siꞌei na moroꞌaa hudii wawaneina uaa ei Jew yei, ronamina aida ba mei amana, Greece. 4 Laguꞌaa tatalailao aꞌa hepapalo gufu, laguna warefaꞌaiaa roꞌodu fei naranaraa ei apostle ma ei bauaniaa losuu yei Jerusalem ba ei ramaꞌa, ronei guaipaꞌaa wareana. 5 Ma i nogipelao fei narafaweꞌiaa ei losuia ma fei puduu roꞌou ana fimina wataualao minaa ei arewaa.Yei Troas, Paul na Mefi
6 Paul ma ei maroana, rona tatalai yei malalaa Phrygia ma Galatia, uaa fei Spiriti Apuna na lawaraa roꞌou ba roneiꞌaa uꞌu aꞌa ei gufu malalaa Asia. 7 Roꞌaa nofarafiꞌinamii Mysia ma ba roꞌaa waduꞌainaa Bithynia, maꞌuaa fei Spiritii Jesus, lomi na ugainaa roꞌodu. 8 Siꞌei, rona farapa Mysia ma aunulao Troas. 9 Ma aꞌa fei poi, Paul na fanunuaa fei aleꞌei mefi ba hemea Macedonia na ufalarai ma iꞌigifaweꞌinia, “Nomai yeni Macedonia ma hadumaa haiꞌodu.” 10 Paul, iꞌa fanunudigaa fei, ana ei ua haiꞌouna asiꞌaa ba haiꞌouꞌaa aununaa Macedonia, uaa haiꞌouna nara ba mei Haidaa na lalaꞌaa haiꞌou ba haiꞌounei uꞌufanaa roꞌou fei rawaniꞌa warea.
Lydia na Filoginaa Naranarana yei Philippi
11 Yei Troas, haiꞌouna ala ma tamafawanewanenaa Samothrace ma i arewadiai, haiꞌouna dinaa Neapolis. 12 Haiꞌouna ala yei, tamanaa Philippi, hepalo gufu Rome, fei baua gufu yei laloo Macedonia. Ma haiꞌouna guta yei hefiꞌa arewaa.
13 Hefaa Sabbath, haiꞌouna dinaa ano aꞌa fei gigei fei gufu, dinaa adii fei ranu ba haiꞌouꞌaa labaginaa fawelei ronaꞌaida lafulafu wagina. Haiꞌouna guta ma wareware aꞌa ei pifine, ei rona figupui yei. 14 Hemea tapuu roꞌou fi gutaguguai, harana Lydia. Hia naꞌaida alo lawalawa, pomana purple na rata ponoꞌana. Gufuna Thyatira ma hia naꞌaida losuinaa mei Haidaa. Ma mei Fasu na gigiaa fei naranarana ba nei tonaa fei wareaa Paul. 15 Hia ma ei ramaꞌaa humuna, roꞌaa pudugufaidii, ina warenaa aꞌa haiꞌodu ba haiꞌounei dinaa humuna. Ina ware, “Nabaa hamona nara ba yau hemea narafaweꞌia aꞌa mei Fasu, te hamoneimii guta yeni humuu.” Ma ina warefaweꞌi aꞌa haiꞌodu.
Paul ma Silas i laloo Humuu Boboꞌaia
16 Heai arewaa, haiꞌouꞌaa dinaa aꞌa fei haiꞌounaꞌo lafulafu, na nomai aꞌa haiꞌou hemea nanao humuwa, hemea na waduꞌia fei mau pigea ba hia aleꞌei mamamaꞌa ba idii wareaa tamanu iwe nomai hinene. Ei fasuna ronaꞌaida to watauda mugoo poꞌi aꞌa ei warewareaa mei nanao mei. 17 Mei nanao mei, na neneraa Paul mawe haiꞌou ma memewai, “Eni ramaꞌa eni, nafii mei Haidaa, mei na Paꞌaa Pafeai ma roꞌei warefanaa hamuꞌodu fei tala ba hamowe tela.” 18 Ina bigiꞌia aleꞌei laloo watauda arewaa. Paul nawe nifi rawana, foisinaa aꞌana ma warenaa aꞌa fei pigea, “I aꞌa fei haraa Jesus Christ a warefanio, walaꞌamai aꞌana!” Ana ei ua fei pigea na diꞌininia.
19 Roꞌaa fanunuꞌapaꞌia ei fasuu mei nanao humuwa ba fei talaa totoo mugoo poꞌii roꞌou na pedu, rona panarofaa Paul ma Silas ma foraneneneinaa lagua fawelei rona aida aloꞌalo manumanu ba lagunei u i maꞌaa ei bauana. 20 Rona duginamii lagua i maꞌaa ei fadududua ma ware, “Lagueni ramaꞌa lagueni, lagua Jew ma laguna fafeloaa feni gufuu oꞌodu uaa 21 laguna ware ba onei neneraa ei maumau roꞌodu maꞌuaa nabaa oꞌaa ugainia o nenegia, ona barafeaa ei law Rome.”
22 Fei gupuu ramaꞌa ana rona haperaraiaa Paul ma Silas ma ei fadududua rona warefaweꞌi ba ronei alaraa lalawaa lagua ma hafugaa lagua. 23 Roꞌaa hafufanimaꞌadigaa lagua, rona siminaa lagua boboꞌaia ma warefaweꞌi aꞌa mei omaꞌamaꞌaa ba nei omaꞌafarawaninaa lagua. 24 I guainia aleꞌei, ina augaa lagua laloo fei paꞌaa lalona ma faunaa pinee lagua alatai.
25 Aleꞌei poi difaꞌuꞌu Paul ma Silas, laguꞌei lafulafunaa aꞌa mei Haidaa ma laugiꞌuduginia ma ei ramaꞌa boboꞌaia, rona guguainaa lagua. 26 Haiꞌouna maduꞌofo uaa namina rerefafelo fei malagufu ma fei eꞌeaa fei humuu boboꞌaia anaa. Ana ei ua minaa ei gigei fei boboꞌaia na gigi ma minaa ei alatai na maꞌala. 27 Mei omaꞌamaꞌaa na wera ma i fanunuia ba na gigi ei gigei, na tonaa fei waduna ba i foꞌafamaꞌeaa anaia, uaa ina nara ba rona ponipaꞌai ei boboꞌaia. 28 Maꞌuaa na haroharo Paul, “Apuna apuguio! Minaa haiꞌou yeni!”
29 Mei omaꞌamaꞌaa na haroharo ba ei maroana, ronei tonamai fei weꞌai ma na poniwaduꞌainaa fei pusuꞌo humuu Paul ma Silas, fei laguna boboꞌai lalona. Ina pasi i maꞌaa lagua ma na funurerere. 30 Ma ina noduginaa lagua ano ma iꞌigai, “Megu, yau a bigiꞌaa tamanu ba a tela?”
31 Laguna ware, “Narafaweꞌi aꞌa mei Fasu Jesus ma oꞌaa tela—yoi ma ena maroamu i humumu.” 32 Ma laguna uꞌufanaa fei uꞌugaa mei Fasu aꞌana ma aꞌa minaa ei ramaꞌa laloo fei humuna. 33 I aꞌa fei poi fei, mei omaꞌamaꞌaa na dugaa lagua, fesuaa ei loraloraa lagua; ana ei ua, hia ma minaa ei gufuna i humuna, rona pudugufai. 34 Mei omaꞌamaꞌaa na dugamii lagua laloo humuna ma hasufani hanaa lagua; hia, namina niꞌeniꞌe uaa hia ma minaa ei maroana i humuna, ronawe narafaweꞌi aꞌa mei Haidaa.
35 Heai arewadiai, ei fadududua, rona aloaa ei wareaa roꞌou aꞌa ei paniaa panii roꞌou dinaa aꞌa mei omaꞌamaꞌaa aleꞌei, “Hamonei alaraa lagua.” 36 Mei omaꞌamaꞌaa na warenaa aꞌa Paul ba, “Ei fadududua na ware ba haiꞌounei alaraa hamugua Silas. Eꞌeni, hamunei dii. Aunufaꞌaꞌa ua.”
37 Maꞌuaa Paul na warenaa aꞌa ei paniaa pani: “Rona hafugaa haigua pudaa ramaꞌa, maꞌuaa haigua ramaꞌaa Rome. Lomi rona aunaa haigua dududua maꞌuaa rona boboꞌainaa haigua. Eꞌeni rona nunuminia ba roꞌaa faꞌasiꞌafagiginaa haigua ba haigunei babanini. Paꞌaa lomi! Ana roꞌou, roneimii faꞌasiꞌanaa haigua boboꞌaia.”
38 Ei paniaa panii roꞌodu, rona warefanaa fei aꞌa ei fadududua ma roꞌaa guainia ba Paul ma Silas, lagua ramaꞌaa Rome, rona maꞌau. 39 Rona nomai ba roꞌaa farawaninaa naranaraa lagua ma faꞌasiꞌanaa lagua boboꞌaia, talaifipui aꞌa lagua ma iꞌiginaa lagua ba lagunei diꞌininaa fei gufu. 40 Paul ma Silas, laguꞌaa asiꞌadii humuu boboꞌai, laguna dinaa humuu Lydia ma yei, laguna gutafipui aꞌa ei lofu ma warefaweꞌinaa naranaraa roꞌou ma lagunawe dii.