Peter na Tela aꞌa fei Humuu Boboꞌai
12
I aꞌa feni au feni, mei hapara Herod na panarofaa hefiꞌa losuia ba i haperaraiaa roꞌou. 2 Ei maroana, rona foꞌafamaꞌeaa James, mei lofuu John aꞌa hepalo wadu. 3 Iꞌa fanunupaꞌia ba fei na faniꞌeaa ei Jew, inaree panarofaa Peter anaa. Ina bigiꞌaa fei aꞌa fei au Hananaa fei Faraa Pidaua Lomi Fafuafua. 4 I panarodigia, ina aunaa hia i laloo humuu boboꞌaia di aunaa panii ei omaꞌamaꞌaa. Eꞌei omaꞌamaꞌaa eꞌei, gunaroa gupu ma hepapalo gupu na paꞌi gunaroa ramaꞌa. Herod na nunuminia ba i dududuia i pudaa minaa ei ramaꞌa nenee fei Talai Falogia.5 Hee, Peter rona faroroꞌinia i laloo humuu boboꞌai, maꞌuaa ei losuia, ronamina lafulafunia aꞌa mei Haidaa.
6 Fei poi ana i paꞌaa fei arewaa ba Herod i aunaa hia dududua, Peter na maꞌigu watolaa helagui foꞌaa, rona faroroꞌainia aꞌa guapalo alatai ma ei omaꞌamaꞌaa rona u i poaa fanefanee humu. 7 Ana ei ua, hemea aloꞌaloo mei Fasu na faꞌarewa ma fei weꞌai na weꞌapapaꞌarai i lalona. Ina paꞌigueinaa haparanonoo Peter ma funia. Ina ware, “Batafa! Asiꞌaa!” Ma ei alatai na maꞌala i panii Peter.
8 Mei aloꞌalo na warenaa aꞌana, “Fareaa fena lawalawamu ma ena hafena pinemu.” Ma Peter na bigiꞌia. Mei aloꞌalo na ware, “Fareaa fena hawaa ugumu ma nenerau.” 9 Peter na nenegia ma laguna walaꞌaa aꞌa fei humuu boboꞌaia. Maꞌuaa, lomi ina aida ba mei aloꞌalo napaꞌaa bigiꞌia; ina nara aleꞌei ba mefina. 10 Laguna talaidiꞌininaa ei rawarawa ma ei faguaiaa omaꞌaa ma laguna nomai aꞌa fei gigei iron, uꞌunii fei baua gufu. Fei gigei na gigiꞌualao ma laguna asiꞌalao wagina. Ei laguꞌaa talaifamalalao maꞌida aꞌa fei tala, mei aloꞌalo na diꞌininia.
11 Peter nawe aida ma na ware, “Eꞌeni unaminapaꞌaa aida ba mei Fasu na aloamii mei aloꞌalona ma na fatelaiau panii Herod mawe minaa ei manumanu ei Jew rona nunuminia.”
12 Ipowe arewa aꞌana, ina aununaa fei humuu Mary, mei inaa John, mei ana harana Mark, i fawelei rona figupui watauda ramaꞌa ma roi lafulafu aꞌa mei Fasu. 13 Peter na fabaꞌabaꞌa aꞌa fei gigei ano ma hemea nafi pifine, harana Rhoda na nomai ba i gigiaa fei gigei. 14 I guaipaꞌaa fei lao Peter, namina niꞌeniꞌe ma lomi na gigiaa fei gigei. Na ponihadiweꞌai ma na warefatemutemu, “Peter, hia aꞌa fei gigei!”
15 Rona warenaa aꞌana, “Onapaꞌaa poapoai.” Maꞌuaa, lomi na babanini; naminaꞌu wareware ua ma ronawe ware ba, “Woro mena aloꞌalona.”
16 Maꞌuaa Peter na u fabaꞌa ua aꞌa fei gigei ano ma roꞌaa gigiaa fei gigei ma roꞌaa fanunupaꞌia, namina nanawala pudaa roꞌodu. 17 Peter na piꞌinaa panina ba ronei babanini ma na uꞌufanaa roꞌou batanai mei Fasu i fatelaꞌania humuu boboꞌaia. Ina ware, “Warefanaa James ma ei lofu feni manumanu feni.” Ma na diꞌininaa roꞌodu dinaa aꞌa hepalodiai gufu.
18 I nomafufuoilao, ei foꞌaa, ronamina hautata aꞌa fei ba na baꞌuanaa hitani Peter. 19 Herod namina lalabaginia maꞌuaa, lomi na labagipaꞌia. Ma siꞌei, namina iꞌiginaa watauda iꞌigaia aꞌa ei omaꞌamaꞌaa ma nawe ware ba hefiꞌadiai foꞌaa nei foꞌafamaꞌeaa roꞌodu.
Fei Maꞌeaa Herod
I dii, Herod na diꞌininaa Judea dinaa Caesarea ma na guta famadii maꞌida yei. 20 Famaꞌa ina fiharenii aꞌa ei Tyre ma Sidon. Eꞌeni, ei ramaꞌaa guapaloei gufu, rona fihupuꞌii ba roꞌaa maꞌa hia. Ma hemea ramaꞌa, harana Blastus na waredii ba iwe hadumaa roꞌodu. Blastus, hia hemea rawaniꞌa nafii mei hapara ma mei hapara na apaꞌifarawaninia. Rona iꞌigai ba mei hapara nei fapedugaa fei fisisibaia watolaa roꞌodu, uaa ronaꞌaida to duꞌua aꞌa fei gufuu mei hapara.
21 Aꞌa fei arewaa ba roꞌaa figupui, Herod na fareaa ei lawalawaa hapara ma guta pafoo fei gutanaa hapara ma wareaa hepalo wareana aꞌa ei ramaꞌa. 22 Rona haromemewai ba, “Paꞌa sifeni fei lao hemea haidaa, abaa lao ramaꞌa.” 23 Ana ei ua, hamatee Herod lomi na uduginaa mei Haidaa, hemea aloꞌaloo mei Fasu na foꞌaia ma na pasinaa pu. Ma ei waꞌawaꞌa na hanaia ma na maꞌe.
24 Maꞌuaa fei wareaa mei Haidaa fimina gipelao ma aununaa watauda gufu.
25 Barnabas ma Saul, laguꞌaa fapedugaa ei bigiꞌaa lagua, laguna nodugamii John, ana harana Mark. Noramiaa roꞌodu, Jerusalem.a