Mepepelime mo Ufaru ma̱
Bituru
1
A̱mu Bituru,
aajiya e Yesu Kristi Zamawawa,
a̱mu ɗa ma̱a̱ lyungusa̱a̱ ɗu mepepelime ma nda.
N ta ɗanasaa ama a na A̱sula̱ a ɗangwai.
Ele ɗa aza a na a̱ ri a̱ nden ana omocin a̱tsuma̱ e iɗa ya Pontu,
na̱ Galatiya,
na̱ Kafadokiya,
na Asiya ni iɗa ya Bitiniya.
2 A̱sula̱ Dada u ɗangwa ɗu ta̱ ɗe nu ujimu waru Ruhu ka̱mbuwa̱ ɗu ta̱ aza a akiza.
Adama o ndolo a ɗa i yuwain tsutoni na̱ Yesu Zamawawa,
reve mpasa ma̱ yi mo oꞌwoto ɗu cece.
N ta avasa i tsura̱ isaꞌani ya̱ A̱sula̱ na asuvu nden a̱ yi a wuma u ɗu na̱ a̱bunda̱ lon.
A̱za̱ e Itoni a̱ da̱na̱ nu uzuwu wo okolo
3 Ica a̱ tyo uba̱ta̱ wa̱ A̱sula̱,
Dada vu Zagbain tsu Yesu Zamawawa.
A̱tsuma̱ e isaꞌani ya̱ a̱bunda̱ ya̱ yi i ɗa a matsisan ntsu.
Adama o umatsun u saꞌavu u nda u ɗa tsu ri nu uzuwu wo okolo a na a̱ ri wuma,
waru tsu tsura̱ yi ta̱ adama a na a̱ ꞌya̱sa̱in Yesu Zamawawa a̱tsuma̱ a̱ a̱kwa̱kwa̱.
4 Waru umatsun u saꞌavu u nda u ta̱wa̱a̱ tsu ta̱ na agadu a na a̱a̱ la̱nga̱ shi,
waru za na ri cece agba woo kporo shi.
A̱sula̱ a̱ tu uguzu na agadu a̱ ɗu ɗe zuva,
agba waa lyawa ili i ro i juꞌwa̱n yi shi.
5 Adama o ndolo ni i ca A̱sula̱ okolo a̱ ɗu,
ucira wa̱ yi waa lyawa ili i vama i juꞌwa̱n ɗu shi,
hali she nu u roco iwawi a mantsa mo ukosu.
Waru ama suru e te ene iwawi i nda.
6 Ili i nda amayun a ɗa,
adama o ndolo i yuwan ma̱za̱nga̱ adama e le.
Amma gogo i to sowo a̱tsuma̱lima̱ icuꞌun icuꞌun mantsa waꞌa.
7 A̱tsuma̱lima̱ꞌa̱ a̱ ta̱wa̱ ta̱ adama u roco ucawu wo okolo a̱ ɗu amayun a ɗa.
Ucawu wo okolo a̱ ɗu ili ya̱ a̱ɓula̱ i ɗa u laꞌa ta̱ zinariya.
Akina a ɗa o tsu lobonoto zinariya agba suru na̱ ne u tsu la̱nga̱ ta̱.
A mantsa ma na koyan ɗa ee ene Yesu Zamawawa,
i ta̱ tsura̱ ica,
na̱ tsugbain,
ni isaꞌani adama o ucawu wo okolo wa amayun a̱ ɗu.
8 I ciga ta̱ Zamawawa ko ana koto ye ene niyi shi.
Ko na yee inda yi gogo shi,
a̱vu gba i ca yi okolo.
Waru ko gogo i ta̱ ma̱za̱nga̱ na̱ ma̱za̱nga̱ ma gbain ma na yaa gura cuɗuwa shi.
9 Adama a na i ca niyi okolo a̱ ɗu,
i ta̱ ushi uneꞌe wi iwawi i wuma i ɗu.
10 Ama̱sula̱ a yuwan ta̱ adanshi cine A̱sula̱ oo roco ɗu isaꞌani ya̱ yi,
reve a̱ bunga̱ ulobonu adama a̱ tsura̱ urevu wi iwawi i na A̱sula̱ aa ca ɗu.
11 Ruhu vu Zamawawa shi ta̱ a̱tsuma̱ e le,
reve u yuwan adanshi a̱ a̱tsuma̱lima̱ a na Zamawawa oo sowo waru na̱ tsugbain tsa na wa̱a̱ tsura̱ na̱ a̱tsuma̱lima̱ o koto.
Ama̱sula̱ꞌa̱ a̱ shi ta̱ a ciga e reve mantsa na̱ cine ili i nda yaa fara.
12 Reve A̱sula̱ o roco le aa yuwusan adanshi e ili i na yaa fara a mantsa me le shi,
ili ya amayun i na a dammai adama a̱ ɗu a ɗa.
Gogo nda A̱sula̱ a̱ lyungu ta̱ Ruhu va Akiza u kamba ama a mantsa ma na aa yuwusaan ɗu alajiya a Alabari a Saꞌani.
Hali na̱ nlingata ma̱ A̱sula̱ fo n ciga ta̱ n reve ili i ndaꞌa.
Nden ma akiza
13 Adama e ili i nda suru,
i yuwan majiyan ma saꞌani,
reve i guza̱ okolo a̱ ɗu.
I yuwan majiyan ununa A̱sula̱ oo roco ɗu isaꞌani ya̱ yi a mantsa ma na Yesu Zamawawa a̱a̱ ka̱mba̱.
Mantsa ma na i cuwain ni ili i ndolo suru,
u ta ca ɗu uzuwu wo okolo.
14 I yuwaan A̱sula̱ tsutoni adama a na a̱ɗu muwun ma̱ yi n ɗa.
She i ka̱mba̱ a̱ca̱pa̱ a yuwusan ili i wuya ununa i yuwain a wuma u ɗu ɗe a̱ca̱pa̱ wan.
A mantsa mo ndolo i shi i reve ununa u lobonoi i yuwan shi.
15 A̱sula̱ a ɗangwa ɗu ta̱ adama yoo oꞌwo muwun ma̱ yi,
adama o ndolo gogo ni i ciga i ꞌyuwan i da̱na̱ na akiza a̱tsuma̱ e ili i na yaa yuwusan biti,
ununa A̱sula̱ a̱ ri na akiza.
16 A̱sula̱ na aciya̱yi u damma ta̱,
“Ni i ciga i ꞌyuwan yoo oꞌwo na akiza adama a na a̱mu za va akiza a ɗa.” a
17 I cuwan i ta yuwusan avasa e ekere a Dada za na ri zuva.
A̱yi ɗa za vu ugeꞌetosu,
agba u tsu laꞌa ciga za ro e ekere a za ro shi.
U ta ca ɗu a̱tsuma̱lima̱ ko iliyinkapa adama e ili i na i yuwain.
Adama o ndolo i ciga i ꞌyuwan i ca A̱sula̱ tsugbain a̱tsuma̱ a̱ nden n na yaa yuwusan pa o uvaɗi ana omocin.
18 I reve ta̱ A̱sula̱ a tsupa ta̱ ili i gbain i ro adama u wawa ɗu diga o ure u vama u na nkaya n ɗu n lyawaa nɗu.
Agba atsupu a na u tsupai ili i ɗa tsa zinariya ko azurufa,
ili i na i tsu jima shi.
19 U tsupaa ɗu ta̱ na̱ mpasa ma̱ a̱ɓula̱ ma̱ Yesu Zamawawa.
A̱yi ɗa Ma̱giriꞌi ma̱ A̱sula̱ ma na ma yuwain unusu shi suru suru,
waru u ri na abasa shi,
ko keꞌen.
20 A̱sula̱ a ɗangwa yi ta̱ adama o ndolo ɗe nu ujimu kafu a yuwan uvaɗi,
gogo gba a rana vu ukosu u nda A̱sula̱ a̱ lyungu yi ta̱ o uvaɗi adama koyan ɗa ee ene yi.
Waru A̱sula̱ a yuwan ta̱ ne adama a̱ ɗu.
21 Gogo nda,
i ca A̱sula̱ okolo a̱ ɗu adama a Zamawawa.
Waru adama a na A̱sula̱ a̱ ꞌya̱sa̱in Zamawawa a̱tsuma̱ a̱ a̱kwa̱kwa̱,
a̱vu u ca yi tsugbain tsa gbain.
I ta gura usu reve i zuwa okolo a̱ ɗu uba̱ta̱ wa̱ A̱sula̱ na amayun.
22 Gogo nda,
i ta gura cigalai na̱ a̱za̱ a̱ ɗu na amayun ana ama o uꞌwa u ta̱.
Adama a na a̱ za̱ꞌwa̱i okolo a̱ ɗu cece a mantsa ma na i usuyi Alabari a Saꞌani ili ya amayun i ɗa.
Adama a nda ni i ciga i ꞌyuwan i cigalai lon,
nu ucira u na u ri o okolo a̱ ɗu suru.
23 A̱sula̱ a zuwa ta̱ a matsisan ɗu.
Wuma u saꞌavu u ɗu wu uta̱ uba̱ta̱ wa aza a na a matsan nɗu o uvaɗi shi.
Adama a na wuma u na a ca nɗu u to koto o ukwa̱.
A̱yi gba wuma u saꞌavu u nda u ri nu ukotu shi,
adama a na wu uta̱ ta̱ a̱tsuma̱ a adanshi a wuma wa̱ A̱sula̱,
agba adanshiꞌi u ri nu ukotu shi.
24 Ishaya vumava̱sula̱ ɗana ta̱:
“Ama suru a̱ ta̱ tsa anlya tsa na tsa̱ tsu kuwushi,
ulobonu u le waru u tsu kotushi ta̱
ununa vu revei ulobonu u yipa̱lu wo ogozo.
Anlya a̱ tsu ꞌyewe ta̱
reve yipa̱lu yo oco e iɗa.
25 Amma adanshi a Zagbain a̱ ri nu ukotu shi.”
b
Waru adanshi a Zagbaiꞌin a̱yi ɗa Alabari a Saꞌani a na tsu yuwain alajiya a̱ yi a̱ tyo ya̱ꞌa̱ ɗu.