Bituru, vuma na ɗanai aatagada a nda, aajiya a ɗa a̱ da̱na̱i. U da̱na̱ ta̱ zuzu na̱ Yesu. We ene ta̱ cine Yesu sowoi a̱tsuma̱lima̱ ne esu a̱ yi. A̱tsuma̱ e mepepelime ma nda u yuwaan ta̱ a̱za̱ e Itoni a na a̱ ri ba̱ta̱ kokoꞌo adanshi adama a̱ a̱tsuma̱lima̱.

Bituru damma ta̱ a̱za̱ e Itoni a mantsa mo ndolo a na a yuwan ma̱za̱nga̱ adama a̱ a̱tsuma̱lima̱ a na oo sowuso. Ana wo oꞌwoi Yesu sowo ta̱ a̱tsuma̱lima̱ a̱tsuma̱ o uvaɗi u nda, ne ɗa fo a̱za̱ e Itoni a̱ yi na a ꞌyuwan a ciga o sowo cuꞌun va̱ a̱tsuma̱lima̱ o ndolo. A̱tsuma̱lima̱ a tsu zuwa ta̱ ucawu wo okolo a vuma a̱ da̱shi gbama. U damma le ta̱ isaꞌani ya̱ A̱sula̱ u to oɓolo ne ele a mantsa ma na oo sowuso a̱tsuma̱lima̱ o ndolo.

Anaꞌan a̱za̱ e Itoni o to sowuso fo a̱tsuma̱lima̱, waru ne ɗa, A̱sula̱ a̱ ta̱ na̱ a̱ɓula̱ hali anaꞌan n nda. Aatagada a nda a ca tsu ta̱ urevu adama a amayun a akiza a na aa kamba tsu na̱ tsoo sowuso a̱tsuma̱lima̱. Waru u damma tsu ta̱ ili i saꞌani ya̱ a̱bunda̱ i na tsaa yuwan a mantsa ma na tsu ri oo sowuso a̱tsuma̱lima̱ ko na̱ tsu ri a asuvu nden.