2
Adama o ndolo ni i ciga i ꞌyuwan i lyawa unusu u na yaa yuwusan.
I lyawa a̱ lulumusa̱ ama.
I lyawa a dansa i ta̱ na̱ a̱ɓula̱ agba ne ɗa shi.
She i tonoo tsushuꞌun wan,
agba i lyawa adanshi e ili i na ya̱a̱ ɓa̱li ama o ro.
2-3 I ciga i ꞌyuwan i da̱na̱ a maluwa ma na yoo sowo maani ma akiza ma na ma̱ ri diga uba̱ta̱ wa̱ Ruhu,
adama i kungwa nu ucira a̱tsuma̱ e iwawi i ɗu.
I saala e izami ya adanshi a̱ A̱sula̱ ununa ba̱ba̱ tsu da̱na̱ e mesun ma maani,
adama a na i peɗei isaꞌani yi Zagbain.
Aatali a wuma
4 Yesu Zagbain a̱yi ɗa Aatali a wuma.
Ama a ꞌyuwan yi ta̱,
reve gba A̱sula̱ a ɗangwa yi reve u ciga yi lon.
5 Ne ɗa a̱ɗu waru i ri.
A̱ɗu atali a wuma a ɗa aza a na A̱sula̱ aa yuwusaan ulinga u suwa uꞌwa a̱tsuma̱ o tsugono tsa̱ yi.
Waru a̱ɗu oɓolo a nan ganu va akiza a ɗa,
waru i ta ca kucci a̱tsuma̱ a̱ Ruhu,
za na oo yoꞌonoto A̱sula̱ okolo a̱tsuma̱ e Yesu Zamawawa.
6 Adanshi a̱ A̱sula̱ a damma tsu ta̱:
“Ka̱lyuwa̱i!
N ta zuwusa aatali e ikyun yu ucira yu usaa a̱tsuma̱ a Sihiyona,
za na n ɗangwai,
a̱yi ɗa macigata ma̱ va̱.
Za na cayi vuma ndolo okolo,
u te ene u nusan vuma na waa ca okolo shi.” a
7 A̱yi macigata ma̱ ɗu ma ɗa,
a̱ɗu aza a na i ushi niyi.
Amma aza a na a ꞌyuwan niyi,
“Aatali a na asuwi a ꞌyuwain
a̱yi ɗa gba wo oꞌwoi aatali e ikyun yu ucira yu usaa.” b
8 Waru Adanshi a̱ A̱sula̱ a damma ta̱,
“A̱yi ɗa aatali a na aa zuwusa ama uta̱ɗa̱tsa̱sa̱,
aatali a na aa zuwa le a̱ riya̱.”
c
A̱ ta̱ ta̱ɗa̱tsa̱sa̱ adama a na o poloi atsuvu reve a̱ kuru Adanshi a̱ A̱sula̱ shi. Adama o ndolo reve a cina ili i na o foɓoo nle.
9 Amma a̱ɗu i ri tsa ama o ndolo shi,
adama a na a̱ɗu elentsu a na A̱sula̱ a ɗangwai a ɗa.
A̱ɗu oɓolo a nan ganu a ɗa aza a na aa yuwusaan A̱sula̱ tsugbashi ana Mogono,
a̱ɗu ama a akiza a ɗa,
waru a̱ɗu ama a̱ A̱sula̱ a ɗa.
A̱sula̱ o uta̱a̱ ɗu ta̱ a̱tsuma̱ e irumbu a̱ tyo a̱tsuma̱ e ekan a gbain a saꞌani a̱ yi.
Gogo nda ni i ciga i ꞌyuwan i damma linga va asalama na u yuwain suru.
Adanshi a̱ A̱sula̱ a damma ta̱,
10 “Ɗe a̱ca̱pa̱ i da̱na̱ ta̱ ama a na a̱ ri ne elentsu shi;
gogo gba shi a̱ɗu ama a̱ A̱sula̱ ɗa.
Ɗe a̱ca̱pa̱,
i shi i tsura̱ iliyali ya̱ A̱sula̱ shi,
gogo gba shi,
i tsura̱ ta̱ iliyali ya̱ yi.” d
11 Ama a̱ va̱,
a̱ɗu omocin a ɗa na aza a mabura o uvaɗi.
Adama o ndolo n to ronuso ɗu atsuvu i suma icigi yi iwuya adama a na a̱ ta̱ nla̱ngi no okolo a amayun a̱ ɗu.
12 I yuwan ugbozu cine ya̱a̱ da̱nusu oɓolo na ama a̱ ɗu aza a na a̱ ri e itoni shi.
Ko na aa dansa ne epen,
a na i ta yuwusan ili i na i lobonoi shi,
e te ene wuma u saꞌani u ɗu,
reve a ca okolo e le a̱vu a ca A̱sula̱ tsugbain a mantsa ma na wa̱a̱ ta̱wa̱ adama o ugeꞌetosu wu uvaɗi.
Tsutoni na azagbain
13 Zagbain ciga ɗu ta̱ i kuru azagbain a ama.
I yuwan tsutoni na aza a na laꞌai tsugbain a̱tsuma̱ a ama,
14 waru oɓolo na azagbain a na u lyunguyi suru.
I yuwan ne adama a na mogono ma̱ tsu lyungu le ta̱ adama a ca aza a na aa nususan a̱tsuma̱lima̱,
waru reve a cuwa aza a na aa yuwusan ili i mejege.
15 A̱sula̱ a ciga ɗu ta̱ i yuwan ili i mejege.
Ni i yuwan ne,
i ta̱ ɓa̱ru na̱ va ama a na a yuwain adanshi e epen a aci a̱ ɗu pere m pere.
16 A̱ɗu agbashi a ɗa shi i ta̱ fa̱a̱n.
Agba nden m babu tsugbashi tsa̱ ɗu u zuwa ɗu i yuwan iwuya shi.
Ufa̱lu u na ya̱a̱ da̱nu ana agbashi a̱ A̱sula̱ a ɗa.
17 I ca koyan ɗa tsugbain,
reve i roco icigi la̱nga̱ a̱ tyo e ekere a̱ a̱za̱ e Itoni.
Yu uwwa wovon wa̱ A̱sula̱,
a̱vu i ca mogono tsugbain.
18 Agbashi,
ni i ciga i ꞌyuwan i yuwaan azagbain a̱ ɗu tsutoni,
a̱vu i ca le tsugbain.
I yuwaan ne aza a na a̱ ri na̱ a̱ɓula̱ waru a̱ ri na̱ majiyan me isaꞌani,
waru agba ni i ciga i ꞌyuwan i yuwaan aza a na a̱ ri usuɗuwu.
19 A̱sula̱ a tsu yuwan ta̱ ma̱za̱nga̱ na̱ vuma kaɓa asuvu a̱ a̱tsuma̱lima̱ e iwuya i na wu ntsayi i sowo shi adama a na u revei A̱sula̱.
20 Agba na a faba ɗu adama o unusu,
ya̱a̱ tsura̱ ili i ro pe shi.
Amma A̱sula̱ a ta zuwaa ɗu abaꞌun na̱ wo oꞌwo i to sowo a̱tsuma̱lima̱ adama a na i yuwain ili i saꞌani.
21 Zamawawa a̱yi ɗa iroci i ɗu,
waru u sowo ta̱ a̱tsuma̱lima̱ adama a̱ ɗu.
I kuru ili i na u yuwain.
A̱sula̱ e ɗe ɗu ta̱ adama i sowo a̱tsuma̱lima̱.
Adanshi a̱ A̱sula̱ a damma ta̱:
22 “Zamawawa nusan shi,
waru wu luma̱ za shi.” e
23 Ana ama a uwai e isulusa yi,
u tsupa le shi.
Ana ama a ca niyi a̱tsuma̱lima̱ u damma she ne ele fo o sowo a̱tsuma̱lima̱ shi.
A̱yi de u zuwa aciya̱yi e ekere a̱ A̱sula̱ za na tsu yuwan ugeꞌetosu mejege.
24 A̱yi na aciya̱yi u tanuyi unusu u tsu a̱ lipu va̱ yi ana u kuwa̱i a akpata,
adama a̱tsu tsu kakasai nu unusu u tsu,
reve tso oꞌwo wuma adama tsu yuwain ili ya̱ a̱ɓula̱.
Yo oꞌwo ta̱ gbaga adama a antsu a̱ yi!
25 I shi ta̱ e igaru tsi ikyon i na i puwa̱in.
Agba gogo i ka̱mba̱ ta̱ uba̱ta̱ wu Za va Aguɓa ɗu,
za na a̱a̱ ka̱lyuwusa̱ wuma u ɗu.