Yesu lyungu ta̱ Kupanejere
9
Reve Yesu ɗe Kupanejereꞌe,
a̱vu u ca le ucira nu ukadu e ekere o otoni a̱ lima̱ suru,
waru a yuwan opocino icuꞌun-icuꞌun.
Luka 9:1-27
2 Waru u lyungu le ta̱ a yuwan alajiya a Alabari a Saꞌani o tsugono tsa̱ A̱sula̱,
reve waru a̱ ka̱mba̱to a̱za̱ o ubanakun gbaga.
3 Reve u damma le,
“She i tara ili i ro adama a mmalu n ɗu wan;
she i tara aɗanga,
ko tsa̱n,
ko ilyalya,
ko ikebe wan.
Waru i tara utugu u ro wan.
4 O uꞌwa u na i cuꞌwain suru,
i da̱nu pe hali mantsa ma na ya̱a̱ ka̱ra̱.
5 Waru uba̱ta̱ u na a̱ usu nɗu shi,
na̱ yaa lyawa lyuciꞌi,
i ka̱ka̱la̱ ma̱buta̱ ma ana ma̱ ɗu.a
U to oꞌwo iroci i na yoo roco ama a̱ lyuciꞌi a yuwan mejege shi.”
6 A̱vu a̱ ka̱ra̱ a uwusa a̱ mulyuci,
a yuwusan alajiya,
waru a yuwusan opocino uba̱ta̱ biti.
Ukwa̱ wa Yahaya za vu Urumbusu
7 Ana mogono Hiridu Antiba uwwai alabari e ili i na aa yuwusan,
reve asuvu a̱ yi a̱ riya̱,
adama a na ozo o ro a ta dansa,
Yahaya ɗa a̱ ꞌya̱sa̱in a̱tsuma̱ a̱ a̱kwa̱kwa̱.
8 Ozo o ro gba a damma,
ana Iliya ɗa ta̱wa̱i.
Ozo o ro a damma,
vuma ta̱ a̱tsuma̱ a ama̱sula̱ a ɗa ꞌyoyin.
9 A̱vu Hiridu damma,
“N koɗo ta̱ aaci a Yahaya.
To,
zane ɗa maa uwwusa cuꞌun vi ili i nda adama a̱ yi?”
Reve u ciga we ene yi.
Yesu lyuwato ta̱ ama ukpakukupa uton
10 Ana ajiyaꞌa a̱ ka̱mba̱i,
reve a damma Yesu ili i na a yuwain.
Reve u ka̱ra̱ oɓolo ne ele a̱ ngeꞌen a̱ tyo a̱ lyuci ro na a̱ tsu ɗe Besaida.
11 Ana oɓolo a ama e enei ne,
reve a̱ kuru yi.
A̱vu u raba le,
reve u yuwaan le adanshi o tsugono tsa̱ A̱sula̱.
Reve u ka̱mba̱to a̱za̱ o ubanakun gbaga.
12 Urana a̱ ma̱riya̱a̱,
reve Kupanejereꞌe a rawa a damma yi,
“Vu lyawa amaꞌa adama a uwa a̱ mulyuci ni ilyuci i na i ri zuzu adama a cuꞌwan,
adama waru a̱ tsura̱ ilyalya.
Adama a na uba̱ta̱ u na tsu ri za pa shi.”
13 A̱vu u usu le,
“Ca nle ilyalya.”
Ɗaɗa a̱ usuyi,
“Tsu ri ni ili i na i laꞌai akpatali o ton na̱ mugula n re shi.
She na̱ tsa̱a̱ ꞌya̱wa̱ tsu tsulaa ama a nda ilyalya suru.”
14 (Ama a na a̱ shi lo a rawa ta̱ ali ukpakukupa uton.)
A̱vu u damma ojoro a̱ yi,
“Zuwai ama a̱ da̱nu oɓolo oɓolo,
ama kupoton-uton.”
15 Reve a yuwan ne,
a zuwa le a̱ da̱nu suru.
16 Ana u tarai akpatali o toꞌon na̱ mugula n reꞌe,
a̱vu u ꞌya̱sa̱n aaci u ka̱lyuwa̱ zuva,
a̱vu u godyoo A̱sula̱.
A̱vu wu busa a casu ojoro a̱ yi a̱ tyowushe ama.
17 Suru nle a lyuwa ta̱ a̱ cuwa̱n.
Ana o ɓolotoi akapi a na a buwai,
a rawa ta̱ asaka kupa ne ejere.
Bituru yuwan ta̱ adanshi adama e Yesu
18 Urana u ro,
a̱yi a avasa a̱yi a̱ ndeꞌen,
a̱vu ojoro a̱ yi a rawa zuzu.
A̱vu we ece le,
“Zane ɗa ama aa tarasa mu?”
19 Reve a̱ usu,
“Ozo o ro a damma,
a̱vu ɗa Yahaya za vu Urumbusu.
Ozo o ro gba a damma Iliya ɗa.
Ozo o ro waru a damma,
vuma ta̱ a̱tsuma̱ a ama̱sula̱ a ɗa ꞌyoyin.”
20 A̱vu we ece le,
“A̱ɗu gba,
zane ɗa yaa tarasa n ri?”
A̱vu Bituru usu u damma,
“A̱vu ɗa Kristi Zamawawa,
za na uta̱i uba̱ta̱ wa̱ A̱sula̱.”
21 Reve u ɓara le,
she a damma za wan.
22 A̱vu u damma,
“Amayun a ɗa,
Mawun ma Vuma ma ta uwwa a̱tsuma̱lima̱ icuꞌun-icuꞌun.
Azagbain,
na̱ nan ganu a gbagbain,
na̱ munlu n Wila̱ waru a ta ꞌyuwan yi,
hali o una yi.
O urana wa taꞌatsu,
a̱ ta̱ ꞌya̱sa̱n yi.”
23 Reve u damma le suru,
“Za na cigai u kuru mu,
she nu u wasan aciya̱yi,
reve u tara akpata a̱ a̱tsuma̱lima̱ a̱ yi urana suru,
a̱vu u kuru mu.
24 Za na a yuwusan adama a wuma wa̱ yi,
u ta lamba yi.
Za na waru ꞌyuwain aciya̱yi adama a̱ va̱,
a ta wawa yi.
25 Nye i ɗa vuma munai,
nu u tsura̱ uvaɗi u nda suru,
a̱vu u lamba wuma wa̱ yi?
26 Za na aa uwwusa wono u va̱ na adanshi a̱ va̱,
a̱mu Mawun ma Vuma fo n ta uwwa wono wa̱ yi,
na̱ n ta̱wa̱ na̱ tsugbain tsa Dada tsa̱ va̱ na̱ tsugbain tsa nlingata ma̱ A̱sula̱ a akiza.
27 Amma amayun a ɗa maa dansaa ɗu,
ozo o ro a̱ ta̱ pa uba̱ta̱ u nda na a̱a̱ kuwa̱ shi,
she ne e ene tsugono tsa̱ A̱sula̱.”
Lipu va̱ Yesu vadalai
28 Ana a yuwain ayin kunla̱,
ana u yuwain adanshi o ndolo,
a̱vu u tara Bituru na̱ Yahaya na̱ Yakubu.
Reve a katsa masasan mo ro adama u yuwan avasa.
Luka 9:28-56
29 A̱yi a̱tsuma̱ a avasa,
ɗaɗa urewesu wa̱ yi u vadalai,
itana ya̱ yi waru a̱ ka̱mba̱i uꞌuri a lyulyuwusa esu.
30 Reve e ene ama e re a adanshi na̱ a̱yi,
ele ɗa Iliya na̱ Musa.
31 A̱ ta̱wa̱i a̱tsuma̱ a tsugbain a yuwusan adanshi o ukwa̱ wa̱ yi u na wa̱a̱ kuwushi Urishelima ununa Adanshi a̱ A̱sula̱ a dammai.
32 Bituru na aza a na a̱ ri oɓolo na̱ a̱yi,
a̱ shi ta̱ a nlavu lon.
Ana a̱ ꞌyoyin,
reve e ene tsugbain tsa̱ yi na ama e re ana a̱ ri mishin na̱ a̱yi.
33 Ana ama o ndolo a lyawa niyi,
a̱vu Bituru yuwan adanshi nu ulambu u majiyan,
u damma Yesu,
“Zagbain,
u lobono ta̱ ana tsu ri pa.
Tsu ta yuwan pa ogodo a taꞌatsu:
za ta̱ za va̱ wu,
za ta̱ za va Musa,
za ta̱ waru za va Iliya.”
34 Ana u dammai ne,
reve eleshe a̱ ta̱wa̱ wu pupala le,
ɗaɗa a uwwai wovon.
35 Reve uɗyo wu uta̱ pe ana,
“A̱yi ɗa Mawun ma̱ va̱ za na n ɗangwai.
Yu uwwa yi.”
36 Ana uɗyoꞌo u yuwain adanshi,
a̱vu e ene Yesu a̱yi a̱ ndeꞌen.
Reve a̱ ɓa̱ru na̱ le.
A mantsa mo ndolo,
a damma za ro ili i na e enei shi.
Yesu ka̱mba̱toi mawun mo otoni a̱ lima̱ gbaga
37 Ana usana u tawai,
ana a̱ cipa̱i a masasaꞌan,
a̱vu oɓolo a ama a gaꞌaton yi.
38 Reve vuma ro a̱tsuma̱ o oɓoloꞌo u yuwan ɗewu,
“Manlu,
yuwan ankuri,
ka̱lyuwa̱ mawun ma̱ va̱.
Adama a na a̱yi ɗa mu goon.
39 No otoni a̱ lima̱ a kumba yi,
u tso oruwo ta̱.
Reve u polo yi,
a̱vu wo oꞌwo e ikpatatsu,
reve una̱ wa̱ yi u yuwan a̱puciꞌya̱.
U tsu lyawa yi goꞌo shi,
u tsu ciga ta̱ wu una yi.
40 A̱vu m pati ojoro a̱ wu o uta̱a̱ yi otoni a̱ lima̱ꞌa̱,
agba a gura shi.”
41 A̱vu u usu,
“A̱ɗu ama o gogo,
aza a na a cayi okolo shi,
ozo o okolo o ugbamu;
hali mantsa ma̱ ne ma̱a̱ da̱nu na̱ a̱ɗu a yuwusaan ɗu ankuri?
Ta̱wa̱ na̱ mawun ma̱ wu pa nda.”
42 A̱yi a̱ ta̱wa̱,
a̱vu otoni a̱ lima̱ꞌa̱ o polo yi,
a̱vu u uwa ikpatatsu.
A̱vu Yesu ɓara otoni a̱ lima̱ꞌa̱,
reve u ka̱mbuwa̱ mawuꞌun gbaga.
Reve u ca dada va̱ yi a̱yi.
43 Reve ama a uwa asalama o ucira wa̱ A̱sula̱.
Yesu yuwisan ta̱ adanshi o ukwa̱ wa̱ yi
Ele a̱tsuma̱ a asalama e ili i na u yuwain suru,
a̱vu u damma ojoro a̱ yi,
44 “Lyawa adanshi a nda a uwa a atsuvu a̱ ɗu.
A ta wina Mawun ma Vuma e ekere a ama.”
45 Agba ele a gura reve adanshiꞌi shi.
O soko le ta̱ urevu wa adanshiꞌi adama e reve wan.
Ele gba a uwwusa ta̱ wovon u na ee ece yi.
Tsugbashi tsa̱ a̱ɓula̱
46 A̱vu mawasan ma̱ ꞌyon a̱tsuma̱ e le adama a zane ɗa zagbain a̱tsuma̱ e le.
47 Ana Yesu revei majiyan me le,
ɗaɗa u tarai mawun mo ro,
reve wi isawaton yi zuzu na̱ a̱yi.
48 A̱vu u damma le,
“Za na ushiyi mawun ma nda na ala a̱ va̱,
a̱mu ɗa u ushiyi.
Waru za na usu numu,
za na lyungu numu ɗa u ushiyi.
Za na ri zawaꞌa a̱tsuma̱ a̱ ɗu,
a̱yi ɗa zagbain.”
49 Reve Yahaya usu,
u damma,
“Zagbain,
tse ene ta̱ nanza o uta̱su otoni a̱ lima̱ na ala a̱ wu,
agba tsu putsa yi ta̱ adama a na u ri oɓolo na̱ a̱tsu shi.”
50 A̱vu u damma yi,
“She i putsaa yi wan,
adama a na za na ꞌyuwan tsu shi,
za tsu ɗa.”
Ma̱lyuci ma Samariya ma ꞌyuwain Yesu
51 Ana yashi i na wa̱a̱ ka̱ra̱ zuva yuwain zuzu,
reve u saɓa a̱ tyo Urishelima.
52 Reve u lyungu nlingata elime a̱ yi.
A̱vu gba a̱ ka̱ra̱,
reve a uwa a̱ ma̱lyuci ma aza a Samariya adama o foɓoo yi.
53 A̱vu amaꞌa a ꞌyuwan yi,
adama a na u zuwai ma̱ka̱ka̱n ma̱ yi a̱ tyo Urishelima.
54 Ana Yakubu na̱ Yahaya ojoro a̱ yi e enei ne,
a̱vu a damma,
“Zagbain,
vu ciga ta̱ tsu zuwa akina a̱ cipa̱ zuva u kula̱to le?”
55 A̱vu u vadala,
reve u ɓara le.
56 Reve a̱ ka̱ra̱ a̱ tyo a̱ ma̱lyuci mo ro.
Aza a na a dansa a̱ ta̱ kuru Yesu
57 Ele a mmalu o ure,
a̱vu vuma ro damma yi,
“N ta̱ kuru wu uba̱ta̱ u na vu tyoyi suru.”
Luka 9:57-62
58 A̱vu Yesu damma yi,
“Nranji n ta̱ na angu;
nnunu waru n ta̱ ni ikinda.
A̱mu Mawun ma Vuma n ri nu uba̱ta̱ u na maa gbasato shi.”
59 A̱vu u damma za ro,
“Vu kuru mu.”
A̱vu u damma,
“Zagbain,
lyawa neꞌen she na̱ n ciɗo aabara a̱ va̱.”
60 A̱vu gba u damma yi,
“Lyawa a̱kwa̱kwa̱ a̱ ciɗo a̱kwa̱kwa̱ e le.
A̱vu gbaꞌa vu ꞌya̱wa̱ vu yuwan alajiya o tsugono tsa̱ A̱sula̱.”
61 A̱vu za ro waru damma,
“N ta̱ kuru wu manlu,
agba lyawa neꞌen n ꞌya̱wa̱ n revetyo a̱za̱ o uꞌwa a̱ tsu uka̱ru u va̱.”
62 Ɗaɗa Yesu damma niyi,
“Za na guza̱i uba̱ri wi inan,
a̱vu u vadala a̱ ka̱nla̱sa̱ a̱ca̱pa̱,
wu ntsaa na̱ tsugono tsa̱ A̱sula̱ shi.”