Yesu lyuwato ta̱ ama ukpakukupa una̱shi
8
A mantsa mo ndolo,
oɓolo a ama o ro o ɓoloto ta̱ a̱bunda̱,
agba a̱ ri ni ilyalya i na aa lyuwa shi.
A̱vu Yesu ɗe ojoro a̱ yi,
a̱vu u damma le,
2 “N te eneshe oɓolo a ama ndaꞌa iliyali,
adama a na o to oɓolo na̱ mu hali rana taꞌatsu,
agba a̱ ri ni ilyalya i na aa lyuwa shi.
3 Waru na̱ n damma le a̱ tyo o uꞌwa na ambulu,
aa gura rawa o uꞌwa shi,
ozo o ro ɗa nda gba o uta̱i alanga.”
4 A̱vu ojoro a̱ yi a̱ usu yi,
a damma,
“Uba̱ta̱ u nda ogozo a ɗa,
te ɗa gba tsaa gura tsura̱ ilyalya i na tsaa gura lyuwato ama a̱ a̱bunda̱ a nda?”
5 A̱vu we ece le,
“Opopofu a yan a ɗa ɗu?”
A̱vu a damma,
“A̱za̱ e cindere.”
6 A̱vu u zuwa amaꞌa a̱ da̱nu e iɗa.
Ana u tarai opopofu e cindere o ndolo,
a̱vu u godyoo A̱sula̱,
a̱vu u bubusa,
u casu ojoro a̱ yi a̱ ꞌya̱wa̱a̱ oɓolo a amaꞌa.
A̱vu a̱ ꞌya̱wusa̱a̱ le.
7 A̱ da̱na̱ ta̱ na̱ mugula n kekeꞌen waꞌa.
Ana u godyoyi A̱sula̱,
a̱vu u damma a̱ ꞌya̱wa̱a̱ le.
8-9 Ama ukpakukupa una̱shi (4,000) u ɗa a̱ shi o ɓolotoi,
a̱vu gba a lyuwa ilyalya hali a̱ cuwa̱n.
Reve ojoro o ɓoloto akapi a na a buwai reve o shiton asaka e cindere.
A̱vu u damma le a̱ tyo o uꞌwa.
10 A jima shi,
ɗaɗa u uwai a wantsun no ojoro a̱ yi a̱ tyo Dalmanuta.
Afarishi a zami ta̱ ili ya asalama
11 Afarishi a̱ ta̱wa̱ e teme mawasan na̱ a̱yi,
a ta zama u roco le iroci ɗe zuva,
adama a̱ lyungwa̱ yi.
12 A̱vu wi ivuwan ogbolo a̱ ruhu va̱ yi,
u damma,
“Nye i zuwai ama o gogo a̱ ri e izami yi iroci?
Amayun a ɗa n damma nɗu,
babu iroci i na oo roco ama o gogo.”
13 A̱vu u lyawa le lo,
a̱vu u ka̱mba̱ a wantsun u pasa a̱ ꞌya̱wa̱ a̱ mɓa̱nga̱ n ndeɗe.
Wolilo wa Afarishi na̱ a̱za̱ a̱ Hiridu
14 Reve e reme mmalu agba e icina ta̱ a na a̱ ta̱wa̱a̱ no opopofu,
ili i na i ri lo le pe a wantsuꞌun u laꞌa za ta̱ shi.
15 A̱vu u damma le,
“I yuwan ugbozu na̱ wolilo wa Afarishi na̱ a̱za̱ a̱ Hiridu.”
16 A̱vu a dammulai,
“U damma ta̱ ne ana wo oꞌwoi tsu ri no opopofu shi.”
17 Yesu gba u reve ta̱ ili i na a dammulai,
a̱vu we ece le,
“Nye i zuwai i dammai i ri no opopofu shi?
Koto ye ene ko i reve shi?
18 I ta̱ ne esu,
amma yee ene shi.
I ta̱ na atsuvu,
amma yaa uwwa shi.
19 Waru i cuwan ana m bubusai opopofu o ton,
a̱vu n neꞌeshen ama ukpakukupa uton shi?
Akapi gba asaka a yan a ɗa i ɓolotoi?”
A̱vu a̱ usu,
“Kupa ne ejere.”
20 Ɗaɗa we ece nle,
“Ana m bubusayi ama opopofu e cindere,
akapi a asaka a yan a ɗa a buwai ana i ɓolotoi?”
Reve a̱ usu yi “A̱za̱ e cindere a ɗa.”
21 Ɗaɗa we ece nle,
“Hali n gogo koto i reve ili i na maa dansaa ɗu shi?”
Yesu kpa̱tuꞌwa̱ ta̱ irumba̱ esu
22 A̱vu a rawa a̱ lyuci va Besaida.
Reve ama a̱ ta̱wa̱a̱ Yesu ni irumba̱,
a̱vu a pati yi u juꞌwa̱n yi.
23 A̱vu u reme ukere wa̱ yi,
wu uta̱a̱ yi a̱ mɓa̱nga̱ n lyuci.
Reve u tsuwa̱a̱n yi ma̱tsa̱n e esu,
waru u kuruwa̱ yi ukere,
a̱vu we ece yi,
“Vu gura ta̱ ene ili i ro?”
24 A̱vu irumba̱ꞌa̱ u ꞌya̱sa̱n urewesu,
a̱vu u usu,
“N te eneshe ama.
Amma oroci a ɗanga a ɗa mee eneshe le a agara.”
25 A̱vu u zuwisaa yi ukere o urewesu.
A̱vu irumba̱ i kpa̱tuꞌwa̱ esu yi we ene ili suru mejege.
26 A̱vu Yesu damma yi u wala a̱ tyo o uꞌwa,
waru u damma yi ta̱,
“She vu uwa a ma̱lyuci mo ndolo wan.”
Bituru yuwan ta̱ adanshi adama e Yesu
27 Yesu ꞌyon ta̱ no ojoro a̱ yi,
u uwa mulyuci n Kasariya Filibi.
A̱vu we ece ojoro a̱ yi,
“Zane ɗa ama aa dansa n ri?”
28 A̱vu a̱ usu yi,
“Yahaya za vu Urumbusu,
ozo o ro gba a damma,
Iliya,
ozo o ro gba a damma vu uta̱ ta̱ a̱tsuma̱ a ama̱sula̱.”
29 A̱vu we ece le,
“Amma a̱ɗu gba,
zane ɗa yaa dansa n ri?”
A̱vu Bituru usu yi,
“A̱vu ɗa Kristiꞌi Zamawawa.”
30 A̱vu u rono le atsuvu she a damma nanza wan.
Yesu yuwisan ta̱ adanshi adama o ukwa̱ wa̱ yi
31 A̱vu u teme o ritosu le,
a dansa,
“A̱mu Mawun ma Vuma n to sowo a̱tsuma̱lima̱ lon.
Waru azagbain,
na̱ nan ganu a gbagbain,
na̱ munlu n Wila̱ a ta ꞌyuwan mu,
hali o una mu.
Agba na a yuwan rana taꞌatsu,
n ta̱ ꞌyon wuma.”
32 A alanga eteshe a ɗa u damma nle adanshi o ndolo.
A̱vu Bituru ɗe yi a̱ tyo a̱ ngeꞌen,
u teme a yuwusaan yi nla̱ngi.
33 Amma ana Yesu vadalai,
we enei ojoro a̱ yi,
a̱vu u ɓara Bituru,
u damma,
“Vu yuwan alanga na̱ a̱mu,
a̱vu Male!
Vaa yuwusan avasa adama a na ili ya̱ A̱sula̱ yaa shiwan shi,
she ili ya ama.”
34 A̱vu u ɗe oɓoloꞌo oɓolo no ojoro a̱ yi,
u damma le,
“Za na cigai u toni mu,
she nu u ꞌyuwan aciya̱yi suru suru,
nu u ciga u ꞌyuwan u tara akpata a̱ yi,
a̱vu u toni mu.
35 Za na ri aɗa a wuma wa̱ yi,
u ta lamba yi.
Amma za na lambai wuma wa̱ yi adama a̱ va̱,
adama a Alabari a Saꞌani waru,
u ta̱ tsura̱ yi.
36 Nye i ɗa vuma munai ko nu u tsura̱ uvaɗi u nda suru,
a̱vu u lamba wuma wa̱ yi?
37 Nye waru vuma aa gura tsupa,
a̱vu u wawa wuma wa̱ yi?
38 Na̱ za uwwa wono u va̱ na alajiya a̱ va̱ o uvaɗi u iwuya wu ulambu wa̱ a̱ɓula̱ u nda,
Mawun ma Vuma fo u ta uwwa wono wa̱ yi,
nu u ꞌya̱wa̱ a̱ ma̱ka̱ka̱n ma Dada va̱ yi na̱ nlingata ma̱ A̱sula̱.”