9
A̱vu u lyuwa elime na adanshi,
“Amayun ɗa maa dansaa ɗu,
ozo o ro a̱ ta̱ pa uba̱ta̱ u nda na ee ene ukwa̱ shi,
she ne e ene tsugono tsa̱ A̱sula̱ tsa̱ ta̱wa̱ nu ucira.”
Lipu va̱ Yesu vadalai
2 Ana a yuwain rana ta̱li,
a̱vu Yesu tara Bituru,
na̱ Yakubu,
na̱ Yahaya,
u ꞌya̱wa̱to le a masasan mo ugaꞌan,
ele goon.
A̱vu oroci a̱ yi a vadala elime e le.
3 Itana ya̱ yi i vadala yo oꞌwo uꞌuri puwu a madala,
pa o uvaɗi u nda babu za na aa gura za̱za̱ꞌwa̱ le ne.
4 A̱vu e eneshi Iliya na̱ Musa,
a yuwusan adanshi na̱ Yesu.
5 A̱vu Bituru cananaa yi una̱,
“Manlu,
u lobono ta̱ ana tsu ri pa.
Tsu ta yuwan pa ogodo a taꞌatsu,
za ta̱ za va̱ wu,
za ta̱ za va Musa,
za ta̱ waru za va Iliya.”
6 U lamba ta̱ ili i na waa damma,
adama a na wu uwwai wovon lon.
7 A̱vu eleshe a̱ ta̱wa̱ a̱ kpa̱to le nu ululu,
a̱vu uɗyo wu uta̱ ɗe e elesheꞌe,
“Mawun ma na n cigai lon ɗa nda,
yu uwwa yi.”
8 A̱vu a̱ jika̱ a̱ ka̱nla̱shi,
amma e ene waru za ro shi,
Yesu ɗa goon e enei oɓolo ne ele.
9 Ana a̱ cipa̱i ɗe a masasaꞌan,
a̱vu u damma le,
“She i damma nanza ili i na ye enei wan,
she na̱ Mawun ma Vuma mo ꞌyon a̱tsuma̱ o ukwa̱.”
10 A yuwan ta̱ ili i na u damma nle a yuwan,
amma a yuwusan ta̱ adanshiꞌi goon le,
“Nye i ɗa waa dansa adama o uꞌyosun o ukwa̱ u nda?”
11 A̱vu e ece yi,
“Nye i zuwai munlu n Wila̱ n dammai nga Iliya ta fara ta̱wa̱ elime a̱ Kristi Zamawawa?”
12 A̱vu u usu le,
“Iliya ɗa fara ta̱wa̱i,
adama a na woo foɓo ili suru.
Nye i zuwai a ɗanai,
adama a Mawun ma Vuma,
‘U to sowo awuya icuꞌun icuꞌun,
waru aa ꞌyuwan yi?’
13 Amma n ta dansaa ɗu,
Iliya ta̱wa̱ ta̱ ɗe,
a yuwaan yi ta̱ cine a cigai,
cine alabari a̱ yi a̱ ri uɗanu.”
Yesu ka̱mba̱to ta̱ mawun mo otoni a̱ lima̱ gbaga
14 Ana a̱ ka̱mba̱i uba̱ta̱ u na ojoro a̱ yi a̱ ri,
a̱vu e ene a̱ba̱jini o oɓolo uka̱nda̱ruwu ne ele.
Munlu n Wila̱ waru n da̱na̱ ta̱ a mawasan ne ele.
15 Na̱ menee ma̱ Yesu,
a̱vu oɓoloꞌo a yuwan asalama lon.
A̱vu o ɓoso ni ilaɗi a̱ ta̱wa̱ uba̱ta̱ wa̱ yi,
a̱ ca̱sa̱sa̱ yi.
16 A̱vu we ece le,
“Mawasan ma̱ ne yaa yuwusan?”
17 A̱vu za ta̱ a̱tsuma̱ o oɓoloꞌo u usu yi,
“Manlu,
mpa nda n ta̱wa̱a̱ nuwu na̱ molobo ma̱ va̱ za na ri no otoni a̱ lima̱.
Adama o ndolo u tsu gura yuwan adanshi shi.
18 Mantsa ma na otoni a̱ lima̱ꞌa̱ a kumba niyi suru,
she na a vari yi e iɗa,
una̱ wa̱ yi a yuwusan apiva,
u gagalai anga a̱ yi,
a̱vu wo oꞌwo wudaruwu.
A̱vu m pati ojoro a̱ wu o lo otoni a̱ lima̱ a̱ yi,
a̱vu a̱ kuɗa̱.”
19 A̱vu u usu le,
“A̱ɗu ama o gogo aza a na aa casu okolo shi.
N jima ta̱ nden na̱ a̱ɗu.
Hali mantsa ma̱ ne ma̱a̱ da̱nu na̱ a̱ɗu a yuwusan ankuri na̱ a̱ɗu?
Ta̱wa̱a̱ numu na̱ a̱yi.”
20 A̱vu a̱ ta̱wa̱a̱ yi na̱ moloboꞌo.
Ana otoni a̱ lima̱ꞌa̱ e enei Yesu,
a̱vu a varu moloboꞌo e iɗa babu usa̱n,
lipu va̱ yi e mejeꞌen.
Reve u riya̱ u da̱na̱ e igandalu,
una̱ wa̱ yi o utusa̱ apiva.
21 A̱vu Yesu ece dada va̱ yi,
“Urana u ne ili i ndolo i cina niyi?”
A̱vu u damma,
“A̱yi a mawun.
22 U sowo ta̱ a varusu yi a akina na̱ a̱ mini,
adama wu una yi.
Amma na̱ vaa gura yuwan ili i ro,
ve ene tsu iliyali,
vu kamba tsu.”
23 A̱vu u damma yi,
“Na̱ maa gura?
Ili suru ili i na aa gura yuwan ɗa e ekere a za na cayi okolo.”
24 A̱vu wu uta̱a̱ uɗyo babu usa̱n,
“N ca ta̱ okolo.
Kamba mu n da̱shi ca okolo.”
25 Ana Yesu enei oɓolo a ama a̱ ta̱wusa̱ lo uba̱ta̱ꞌa̱,
a̱vu u ɓara otoni a̱ lima̱,
u damma,
“A̱vu otoni a̱ lima̱ a na a tsu putsaa na adanshi,
n damma wu ta̱,
vu kasa na̱ a̱yi.
She vu da̱shi toni yi wan.”
26 Ana otoni a̱ lima̱ a̱ yi a saalai,
a̱vu a kpasuꞌwa yi e iɗa lon,
lipu va̱ yi e mejeꞌen,
a̱vu a kasa na̱ a̱yi.
A̱vu moloboꞌo wo oꞌwo tsa̱ a̱a̱kwa̱kwa̱,
hali wo oꞌwo ama na̱ a̱bunda̱ a damma,
“U kuwa̱ ta̱.”
27 A̱vu Yesu reme ukere wa̱ yi u ꞌya̱sa̱n yi,
a̱vu u ꞌyon mishin.
28 Ana u uwai o uꞌwa,
a̱vu ojoro a̱ yi e ece yi usokowu,
“Nye i zuwai tsu kuɗa̱i,
a na tsoo lo otoni a̱ lima̱ o ndolo?”
29 A̱vu u usu le,
“Na avasa a ɗa goon aa gura lo cuꞌun ndolo a alanga,
babu ili i ro.”a
Yesu yuwisan ta̱ adanshi o ukwa̱ wa̱ yi
30 A̱vu a̱ ꞌyon lo,
a uwa e iɗa ya̱ Ga̱lili.
U ciga nanza reve shi.
31 Adama a na u to ritosu ojoro a̱ yi,
u ta dansaa le,
“A ta ca Mawun ma Vuma e ekere a ama waru a̱ to una yi.
Na̱ o una yi,
na a yuwan rana taꞌatsu u ta̱ ꞌyon.”
32 Amma a gura reve adanshiꞌi shi,
a̱vu waru a uwwusa wovon na ee ece yi.
Tsugbashi tsa̱ a̱ɓula̱
33 A̱vu a rawa Kafarnahum.
Ana u uwai o uꞌwa,
a̱vu we ece le,
“Mawasan ma̱ ne yaa yuwusan o ure?”
34 A̱vu a̱ rungwa̱ kpaku kpaku,
adama a na a yuwan ta̱ mawasan o ure za na oꞌwo zagbain a̱tsuma̱ e le.
35 A̱vu u da̱nu,
u ɗe Kupanejereꞌe.
A̱vu u damma le,
“Za na cigai woo oꞌwo zagbain,
u ka̱mba̱ za vu ukosu,
aagbashi a ama suru waru.”
36 A̱vu u sheɗe mawun mo ro u zuwa yi e memere,
a̱vu u katala yi.
Ɗaɗa u damma nle,
37 “Za na ushiyi mawun me keꞌen cuꞌun nda adama a ala a̱ va̱,
a̱mu ɗa u ushiyi.
Za na waru usu numu,
a̱mu ɗa u ushiyi goon shi,
amma za na lyungu numu ɗa u ushiyi.”
Za na ꞌyuwan ntsu shi, za tsu ɗa
38 A̱vu Yahaya usu yi,
“Manlu,
tse ene ta̱ nanza o utusa̱a̱ otoni a̱ lima̱ na ala a̱ wu.
A̱tsu gba tsu putsa yi ta̱,
adama a na u ri oo tono tsu shi.”
39 Amma u damma ta̱,
“She i putsa yi wan,
adama a na za na gura yuwain ulinga wa asalama a ala a̱ va̱,
waa gura vadala u yuwan adanshi avama adama a̱ va̱ shi.
40 Za na ri a tsurala na̱ tsu shi,
za tsu ɗa.
41 Amayun a ɗa maa dansaa ɗu,
za na ca nɗu mini i sowo adama a̱ va̱,
u ta̱ tsura̱ iliyinkapa.
Re ma̱riya̱a̱ a̱tsuma̱ o unusu
42 “Na̱ nanza aa zuwa a̱tsuma̱ a̱ muwun n nda a̱ riya̱,
u ta laꞌa a̱ nla̱a̱ yi utali u yira a̱ yinlu ya̱ yi,
a̱vu a vari yi a mala.
43 Nu ukere wa̱ wu waa zuwa wu,
vu nusan,
vu koɗo yi.
U ta laꞌaa wu,
vu tsura̱ wuma babu ukere u ta̱ ana va̱a̱ tsura̱ ekere e re,
a̱vu vu uwa a akina.
44 [Uba̱ta̱ u na azun a̱ tsu kuwa̱ shi,
waru akina a̱ tsu kima̱ shi.]
45 Na anana a̱ wu aa zuwa wu vu yuwan unusu,
vu koɗo yi.
U ta laꞌaa wu,
vu tsura̱ wuma na̱ tsukutsuma̱,
ana aa vari wu a̱tsuma̱ a akina na ana e re.
46 [Uba̱ta̱ u na azun a̱ ri n kuwa̱ shi,
waru akina a̱ ri n kima̱ shi.]
47 Na̱ lyusu va̱ wu aa zuwa wu vu yuwan unusu,
vu kongoro yi.
U ta laꞌaa wu,
vu uwa o tsugono tsa̱ A̱sula̱ na̱ lyusu ta̱,
ana aa vari wu a̱tsuma̱ a akina ne esu e re.
48 Uba̱ta̱ u na azun a̱ ri n kuwa̱ shi,
waru akina a̱ ri n kima̱ shi.
49 “Na akina a ɗa aa lyungwa̱ ama suru,
cine a tsu lapula ili na akpaɗi.
50 “Akpaɗi a̱ tu ulobonu,
amma na̱ a̱ la̱nga̱,
na̱ nye ɗa vaa lapula yi?
“I da̱na̱ na akpaɗi o okolo a̱ ɗu,
i yuwan nden n saꞌani.”