Yesu ka̱mba̱to ta̱ osowi a̱ lipu gbaga
9
A̱vu Yesu uwa a wantsun a̱ ka̱mba̱ a̱ tyo upasalai u mala a̱ tyo a̱ lyuci na u shi na̱ nden.a
2 Ana u rawai ɗe,
reve ama o ro a̱ ta̱wa̱a̱ yi na̱ vuma na ri no osowi a̱ lipu a aavalu.
Ana Yesu enei ucawu wo okolo wa ama a nda,
reve u damma yi,
“Ulobo,
she vu uwwa wovon wan.
A yuwaan wu ta̱ gafura wu unusu wa̱ wu.”
3 A̱vu munlu n Wila̱ n ro n dammulai va̱ni le,
“Vuma nda u ta yuwusan adanshi a tarasa aciya̱yi A̱sula̱ a ɗa!”
4 Ana u revei cuꞌun majiyan ma na aa yuwusan,
ɗaɗa we ece nle,
“Nye i zuwai yaa yuwusan majiyan me iwuya i nda?
5 Zane ɗa laꞌai babu usa̱n a na a damma,
‘A yuwaan wu ta̱ gafura wu unusu wa̱ wu,’
ko ‘ꞌYon vu wala?’
6 Agba a̱mu n to roco ɗu a na a̱mu,
Mawun ma Vuma,
n ta̱ nu ucira a̱tsuma̱ o uvaɗi u nda n yuwan gafura vu unusu.”
Ɗaɗa u dammai a̱a̱kutsuma̱ꞌa̱,
“ꞌYon,
vu tara aavalu a̱ wu,
a̱vu vu ka̱ra̱ a̱ ka̱mba̱ o uꞌwa.”
7 Reve u ꞌyon u ka̱ra̱ a̱ tyo o uꞌwa.
8 Ana ama e enei ili i ndolo,
a yuwan ta̱ asalama,
reve a yuwaan A̱sula̱ ica a na u cayi vuma cuꞌun vu ucira u nda.
Yesu ɗe ta̱ Matta
9 Reve Yesu lyawa uba̱ta̱ u ndolo,
u lyuwa elime na̱ mmalu,
ɗaɗa we enei vuma ro na a̱ tsu ɗe Matta,
za na shi nden uba̱ta̱ u na u tsu ushishi utafa.
Ɗaɗa u damma niyi,
“Toni mu.”
A̱vu u ꞌyon u toni yi.
10 A̱ tyo ɗe,
a̱vu Yesu no ojoro a̱ yi a̱ da̱nu alya e ilyalya o uꞌwa wa Matta.
A̱za̱ o uꞌushishi wu utafa na̱ a̱bunda̱ na̱ a̱za̱ o unusu o ro a̱ da̱na̱ ta̱ lo.
11 Ana Afarishi enei ili i ndolo,
a̱vu e ece ojoro a̱ yi,
“Cine manlu ma̱ ɗu maa lyuwusa ilyalya ni icuꞌun ya ama o ndolo?”
12 Yesu uwwa le ta̱ a̱vu u usu le,
“Aza a na a̱ ri gbaga a ciga za va̱ a̱guma̱ shi,
amma a̱za̱ o ubanakun a ciga ta̱.
13 ꞌYa̱wa̱i i rito ili i nda i na Adanshi a̱ A̱sula̱ aa dansa,
‘Ana yaa yuwaan mu kucci,
u laꞌaa ɗu ta̱ ye ene iliyali yo ozo o ro.’
b N ta̱wa̱ adama m banu ama a̱ a̱ɓula̱ tsa̱ra̱ o oꞌwo a̱za̱ e itoni a̱ va̱ shi.
Amma n ta̱wa̱ ta̱ m banu a̱za̱ o unusu.”
A yuwan ta̱ Yesu yeci adama a akuli
14 Urana u ro,
ojoro a Yahaya za vu Urumbusu a̱ ta̱wa̱ ta̱ uba̱ta̱ wa̱ Yesu,
reve a yuwan yi yeci,
“Nye i zuwai a̱tsu na Afarishi tsaa yuwusan akuli,
agba ojoro a̱ wu aa yuwusan shi?”
15 A̱vu Yesu usu,
“Ama a vali vu kasaꞌavu a tsu yuwan a̱tsumola̱ngu shi,
nu u ri oɓolo ne ele.
Amma mantsa ma̱ ta̱ ta̱wa̱ a na aa tara valiꞌi e memere me le,
a mantsa ma ɗaɗa aa yuwan akuli.
16 “Babu za na a paɗa umuna u saꞌavu u lapulaa uba̱mu wa akuci o utugu wa̱ yi.
Nu u yuwan ne,
umuna u saꞌavu u ta̱ vura̱nu a̱vu u kara akuci o utuguꞌu,
agba apaɗi o umuna u saꞌavuꞌu waa ntsaa a akuci o utuguꞌu shi.
Ne ɗa uba̱muꞌu wa̱a̱ da̱shi washin.
17 Waru,
a̱a̱ tsun ribina saꞌavu a akuci e itsa̱n yu kwan shi,
adama a na ribinaꞌa nu u kutsa,
u to ɓoso itsa̱ꞌa̱n,
reve woo oco waru itsa̱ꞌa̱n a̱ la̱nga̱.
Amma ama a̱ tsu tsun ta̱ ribina saꞌavu kuci e itsa̱n i saꞌavu.
A̱vu suru nle a̱ da̱na̱ gbaga.”
A̱a̱kwa̱kwa̱ o usheli na̱ ka vu ubanakun
18 Yesu a̱tsuma̱ a adanshi,
a̱vu zagbain va̱ a̱a̱ꞌisa̱ ro ta̱wa̱ ya̱ꞌa̱ yi.
Reve u kingyo a̱ ma̱ka̱ka̱n ma̱ yi a̱vu u damma,
“Usheli u va̱ u kuwa̱ ta̱ gogo.
Agba na̱ vu ta̱wa̱ vu kuruwa̱ yi ukere,
u ta̱ ka̱mbisa̱ wuma.”
19 Reve Yesu na aza a na oo tono yi a̱ ꞌyon a̱vu o toni zagbaiꞌin.
20 A̱vu ka na da̱na̱i o ocosu mpasa hali aꞌwan kupa ne ejere ta̱wa̱ a̱ca̱pa̱ e Yesu,
a̱vu u juꞌwa̱n yi ngeꞌen mu utugu.
21 U da̱na̱ ta̱ a majiyan,
“Na̱ n juꞌwa̱n utugu wa̱ yi goon,
n ta̱ ka̱mba̱ gbaga.”
22 Reve Yesu vadala ɗaɗa we ene niyi,
a̱vu u damma,
“Usheli,
she vu uwwa wovon wan!
Ucawu wo okolo a̱ wu u ka̱mba̱to wu ta̱ gbaga.”
A̱vu kaꞌa wo oꞌushi gbaga.
23 Reve Yesu lyuwa elime na̱ mmalu oɓolo na̱ zagbaiꞌin a̱ tyo o uꞌwa wa̱ yi,
a̱vu we ene a̱za̱ e ishipa ya̱ a̱ciɗa̱ na ama a̱ a̱bunda̱ e mesun.
24 A̱vu u damma,
“Uta̱i suru nɗu!
Usheliꞌi u kuwa̱ shi.
Nlavu n ɗa waa yuwusan.”
A̱vu amaꞌa a yuwaan yi izoꞌoshi yu ulamu.
25 Amma ana o lo nle o uta̱ a alanga,
a̱vu u ka̱ra̱ a̱ tyo uba̱ta̱ u na usheliꞌi u ri nven.
Reve u reme yi ukere,
ɗaɗa usheliꞌi u ꞌyoyin.
26 Alabariꞌi a baza ta̱ uba̱ta̱ suru a̱tsuma̱ e iɗaꞌa.
Yesu yuwaan ta̱ nrumba̱ n re opocino
27 Ana Yesu lyawai uba̱ta̱ꞌa̱,
a̱yi a̱tsuma̱ a mmalu,
a̱vu nrumba̱ n re n toni yi.
A̱vu a saala,
“Mawun ma̱ Da̱wuda,
ka̱lyuwa̱ iliyali i tsu!”
28 Ana Yesu uwai o uꞌwa u ro,
a̱vu nrumba̱ n reꞌe n ta̱wa̱ uba̱ta̱ wa̱ yi.
Reve we ece le,
“I usu ta̱ n ta gura zuwa ɗu ye ene ure?”
A̱vu a̱ usu,
“Ee,
Zagbain.”
29 A̱vu u juꞌwa̱n esu e le reve u damma,
“Adama o ucawu wo okolo a̱ ɗu,
ne ɗa woo oꞌwo.”
30 Reve amaꞌa a gura ene.
Agba u rono le ta̱ atsuvu lon,
adansa,
“She i damma vuma ro adama a nda wan.”
31 Agba ana o uta̱i a̱vu a̱ ka̱ra̱ a bazasa alabariꞌi uba̱ta̱ suru a̱tsuma̱ e iɗaꞌa.
Yesu ca ta̱ vuma na tsu gura yuwan adanshi shi lafiya
32 Ele a̱ ma̱ka̱ra̱a̱,
a̱vu ama a̱ ta̱wa̱a̱ na̱ vuma ro uba̱ta̱ wa̱ Yesu.
Otoni a̱ lima̱ a na a̱ da̱na̱i pe a̱tsuma̱ a vumaꞌa a putsaa yi ta̱ a na waa yuwan adanshi.
33 Ana Yesu loyi otoni a̱ lima̱ꞌa̱,
a̱yi za na shi tsu gura yuwan adanshi shi,
a̱vu u fara adanshi.
A̱vu oɓolo a amaꞌa a uwa asalama reve a damma,
“Koto tse ene cuꞌun vi ili i nda a̱tsuma̱ a Israꞌila shi.”
34 Reve Afarishi a damma,
“Mogono mo otoni a̱ lima̱ ma ɗa ma ca niyi ucira u na u loyi otoni a̱ lima̱ꞌa̱.”
Yesu ene ta̱ iliyali ya ama
35 Yesu tonishi ta̱ a burusa ilyuci na̱ mulyuci suru.
U ritosu ta̱ a̱ a̱ꞌisa̱,
u yuwan ta̱ alajiya a Alabari a Saꞌani adama o tsugono tsa̱ A̱sula̱,
a̱vu u ca ama a na a̱ ri ubanakun na̱ mɓa̱la̱ icuꞌun icuꞌun lafiya.
36 Ana we enei oɓolo a amaꞌa,
reve we ene le iliyali lon,
adama a na a̱ da̱na̱ ta̱ udamu waru babu ikambi,
gashi ikyon i na i ri babu za va aguɓa.
37 A̱vu u damma ojoro a̱ yi,
“Ugasa u ta̱ a̱bunda̱,
agba a̱za̱ o ugasaꞌa waꞌa ɗa a̱ ri.
38 Adama o ndolo i pati za vu uɗuma̱ꞌa̱ u lyungu a̱za̱ o ulinga adama tsa̱ra̱ a yuwaan yi ulinga.”