Yesu yuwaan ta̱ vuma vo otoni a̱ lima̱ opocino
5
A̱vu Yesu no ojoro a̱ yi a pasa a̱ ꞌya̱wa̱ upasu u mala u ndeɗe,
ejege a̱ lyuci na a̱ tsu ɗe Garasa.
2 A̱yi a̱ mota̱a̱ pe a̱tsuma̱ a wantsuꞌun,
a̱vu vuma za na ri no otoni a̱ lima̱ u gaꞌashin na̱ a̱yi.
3 Ason a ɗa ba̱ta̱ a̱ nden ma̱ yi.
Babu za na ri nu ucira u na waa gura nla̱ yi,
ko na akani.
4 A̱ tsu nla̱ yi ta̱ ana ne ekere na akani,
amma u tsu kakasa le ta̱.
Babu za na ri nu ucira u na waa gura goloɓo yi.
5 Usana nu ulivu u tsu da̱na̱ ta̱ a agaɗi a̱tsuma̱ a ason a na a yuwain a atali.
Reve u da̱na̱ a yisaali,
na̱ wu paɗi aciya̱yi.
6 Ana u cinkayai Yesu alanga,
a̱vu u suma ni ilaɗi a̱ ta̱wa̱,
a̱vu u kingyo a̱ ma̱ka̱ka̱n ma̱ yi.
7-8 A̱vu Yesu damma otoni a̱ lima̱ꞌa̱,
“Lyawa vuma ndolo.”
Ɗaɗa u ɓoshoi na̱ yisaali a dansa,
“Te ɗa imini ya̱ wu na̱ a̱mu,
Yesu Mawun ma̱ A̱sula̱?
Kucina na̱ A̱sula̱,
vaa ca mu a̱tsuma̱lima̱ shi.”
9 A̱vu we ece yi,
“Cine tsa ɗa aala a̱ wu?”
A̱vu u usu,
“Aala a̱ va̱ a ɗa Oɓolo adama a na tsu ta̱ a̱bunda̱.”
10 A̱vu u pati Yesu lon adama u lyawa le e iɗaꞌa.
11 Uba̱ta̱ u na a̱ da̱na̱i,
ngurusumu n da̱na̱ ta̱ lo na̱ a̱bunda̱,
a zamishi ilyalya za̱la̱ va agaɗi.
12 A̱vu otoni a̱ lima̱ꞌa̱ a pati yi,
a damma,
“Gba̱ra̱ tsu a̱ ꞌya̱wa̱ a̱tsuma̱ a̱ ngurusumu,
adama tsu uwa pe a̱tsuma̱ e le.”
13 A̱vu gba u usu le.
A̱vu otoni a̱ lima̱ o uta̱ a uwa a̱tsuma̱ a̱ ngurusumu.
Aza a̱ da̱na̱i lo suru,
a̱vu a suma a̱ ꞌya̱wa̱ a mala.
A̱vu a̱ riya̱ pe,
a̱vu a̱ kuwa̱ pe.
A̱bunda̱ e le a ta rawa ukpakukupa ure (2,000).
14 Reve aza a na a̱ da̱na̱i a aguɓa a̱ ngurusumuꞌu,
a̱vu a suma,
a̱vu a̱ ꞌya̱wa̱ a ca alabari a̱ lyuci na̱ mulyuci.
A̱vu ama a̱ ta̱wa̱ e ene ili i na i farai.
15 Ana a̱ ta̱wa̱i uba̱ta̱ wa̱ Yesu,
a̱vu a cina lo vuma na da̱na̱i no otoni a̱ lima̱ nden uba̱ta̱ wa̱ yi,
uꞌotowu ni itana nu ugbozu wa̱ yi.
Reve a uwwa wovon.
16 Aza a na e enei ne esu e le,
a̱vu a damma ili i na i cinai za vo otoni a̱ lima̱ꞌa̱ na̱ ngurusumu.
17 A̱vu e teme a patishi Yesu u lyawaa le iɗa i le.
18 Mantsa ma na Yesu da̱na̱i a uwusa a wantsun,
a̱vu za na da̱na̱i no otoni a̱ lima̱ꞌa̱ u pati yi ankuri,
u lyawa yi u ꞌya̱wa̱ oɓolo na̱ a̱yi.
19 Amma u ꞌyuwan ta̱,
a̱vu u damma yi,
“ꞌYa̱wa̱ o uꞌwa u ɗu,
vu ꞌya̱wa̱ ba̱ta̱ a̱ nꞌutsa̱ ma̱ wu waru,
vu ca le alabari e ili i na a̱ A̱sula̱ a yuwaan nuwu.”
20 A̱vu u ka̱ra̱ a casu alabari upasu wi iɗa wa Dikafolia,
ili i saꞌani i na Yesu yuwaan niyi.
Ama suru a yuwan ta̱ asalama ni ili i ndolo.
Jayiru ꞌya̱wa̱ ta̱ uba̱ta̱ wa̱ Yesu
21 Mantsa ma na Yesu ka̱mba̱i a̱ ꞌya̱wa̱ upasu u ndeɗe,
a̱vu ama o ɓoloto a̱bunda̱ uba̱ta̱ wa̱ yi,
a̱yi lo zuzu na̱ malaꞌa.
22 A̱tsuma̱ a azagbagbain a̱ a̱a̱ꞌisa̱ꞌa̱,
za na a̱ tsu ɗe Jayiru,
u ta̱wa̱ ta̱ we ene yi.
A̱vu u kingyo a̱ ma̱ka̱ka̱n ma̱ yi,
23 a patishi yi lon,
adansa,
“Usheli u keꞌen u va̱ u ciga ma̱kuwa̱a̱.
N ciga ta̱ vu ta̱wa̱ vu kuruwa̱ yi ukere,
adama u ka̱mba̱ gbaga.”
24 Reve u ꞌya̱wa̱ oɓolo na̱ a̱yi,
reve ama a̱ a̱bunda̱ o toni yi a gbagbalasa yi.
Ka na oo ocosu mpasa
25 A̱tsuma̱ o oɓoloꞌo,
ka ro na yuwain aꞌwan kupa ne ejere o ocosu mpasa shi ta̱ pe.
26 Wu uwwa ta̱ awuya lon e ekere a̱ a̱za̱ a̱ a̱guma̱,
waru wu una ta̱ ili i na u ri na̱ a̱yi suru,
amma u jebe yi shi,
she ili i na i ꞌya̱wa̱i elime.
27 Ana wu uwwai adama e Yesu,
a̱vu u ta̱wa̱ nu ucina̱ wa̱ yi a̱tsuma̱ o oɓoloꞌo,
a̱vu u juꞌwa̱n utugu wa̱ yi.
28 U jiyan ta̱ o ookolo a̱ yi,
“Na̱ n juꞌwa̱n utugu wa̱ yi goon,
n ta̱ ka̱mba̱ gbaga.”
29 Babu usa̱n wocosu wu mpasa ma̱ yi n lyawai,
a̱vu u reve u tsura̱ ta̱ lafiya lipu va̱ yi.
30 A̱vu Yesu reveshi ucira wu uta̱ ta̱ a̱ lipu va̱ yi.
Ɗaɗa u vadalai a̱tsuma̱ o oɓoloꞌo,
a̱vu we ece,
“Zane ɗa juꞌwa̱n numu utugu?”
31 Reve ojoro a̱ yi a̱ usu yi,
“Ve ene oɓolo a gbagbalasa wu,
a̱vu ve ece,
‘Zane ɗa juꞌwa̱n nuwu utugu?’ ”
32 A̱vu u ka̱ra̱ a vadalasa adama we ene za na yuwain ulinga u ndolo.
33 A̱vu kaꞌa,
ana u revei ili i na i yuwan niyi,
a̱vu u ta̱wa̱ u kingyo a̱ ma̱ka̱ka̱n ma̱ yi na̱ wovon na̱ mejeꞌen ma̱ lipu.
A̱vu u damma yi amayun suru.
34 A̱vu u damma yi,
“Usheli,
ucawu wo okolo a̱ wu u ka̱mba̱to wu ta̱ gbaga.
Wala na̱ ma̱za̱nga̱,
babu ubanakun.”
Yesu ꞌya̱sa̱in usheli wa Jayiru
35 A̱yi pe a̱tsuma̱ a adanshi,
a̱vu ozo o ro a̱ ta̱wa̱ ɗe o uꞌwa wu zagbain va̱ a̱a̱ꞌisa̱ a damma,
“Usheli wa̱ wu u kuwa̱ ta̱.
Cine vaa damaton yi waru?”
36 Agba Yesu polo atsuvu e ili i na aa dansa shi.
A̱vu u damma zagbaiꞌin,
“She vu uwwa wovon wan,
vu ca okolo goon.”
37 U lyawa nanza toni yi shi,
she Bituru,
na̱ Yakubu,
na̱ Yahaya mawun ma̱ a̱na̱wu ma Yakubu.
38 Ana a rawai o uꞌwaꞌa,
a̱vu wu uwwa a yuwusan elemu,
e mesun,
a yisaali babu ukotu.
39 Ana u uwai,
a̱vu u damma le,
“Nye i zuwai i ri a yisaali babu ukotu?
Usheliꞌi u ri ukwa̱ shi,
nlavu n ɗa waa yuwusan.”
40 A̱vu a yuwaan yi izoꞌoshi yu ulamu.
Ana wu uta̱a̱ nle a alanga suru,
a̱vu u tara nsha̱wu mu usheliꞌi oɓolo no ojoro a̱ yi,
aza a na a̱ da̱na̱i oɓolo na̱ a̱yi,
a uwa uba̱ta̱ u na mawuꞌun u da̱na̱i.
41 A̱vu u reme ukere wa̱ yi,
u damma yi,
“Talita kumi.”
Ili i na waa dansa ɗa nda,
“Mesheli,
n ta dansaa wu,
ꞌyon.”