Ma̱lyungwa̱ ma̱ Yesu
4
Yesu waru ushitowun na̱ Ruhu va Akiza,
a̱vu wu uta̱ o Uɗolu wa̱ Urdu.
Reve Ruhu va Akiza tara yi a̱ tyo a̱tsuma̱ o una rana amunga,
Luka 4:1-30
2 uba̱ta̱ u na Mekerenkesu ma̱ lyungusa̱ niyi.
Agba u lyuwa ili a̱tsuma̱ a ranaꞌa shi,
o ukosu reve wu uwwa ambulu.
3 Ɗaɗa Mekerenkesu ma damma niyi,
“Na̱ a̱vu Mawun ma̱ A̱sula̱ ma ɗa,
vu zuwa aatali a nda a̱ ka̱mba̱ opopofu.”
4 A̱vu Yesu usu yi,
“U tu uɗanu a Adanshi a̱ A̱sula̱,
‘Ni ilyalya i ɗa goon vuma a̱a̱ da̱na̱ wuma shi.’ ” a
5 Reve Mekerenkesu ma tara yi a̱ tyo zuva masasan,
ɗaɗa u rocoshi niyi tsugono tsu uvaɗi suru.
6 Reve u damma yi,
“N ta ca wu tsugbain nu utsuru u ndaꞌa suru,
adama a na a zuwa le ta̱ o ukere u va̱.
Waru n ta ca za na n cigai.
7 Suru ili i nda o to oꞌwo a̱za̱ a̱ wu,
na̱ vu ka̱ɗa̱to vu yuwaan mu a̱ga̱nda̱.”
8 Ɗaɗa Yesu usuyi niyi,
“U tu uɗanu,
‘Zagbain A̱sula̱ a̱ wu a ɗa vaa yuwaan a̱ga̱nda̱,
a̱yi a̱ ndeꞌen ɗa vaa yuwaan tsugbashi.’ ” b
9 Reve Mekerenkesu ma tara yi a̱ tyo Urishelima,
a̱vu u zuwa yi ɗe e ncilecile ma̱ A̱a̱ꞌisamapaɗa.
Ɗaɗa u tsu damma yi,
“Na̱ a̱vu Mawun ma̱ A̱sula̱ ma ɗa,
teteruwe e iɗa.
10 Adama a na a ɗana ta̱,
‘A̱sula̱ a ta zuwa nlingata ma̱ yi n tiga̱ wu.
11 Waru e te keɗe wu e ekere e le,
adama ko anana a̱ wu a̱ ta̱ɗa̱tsa̱ a aatali wan.’ ”c
12 Reve Yesu usu yi,
“Adanshi a̱ A̱sula̱ a damma ta̱,
‘She vu lyungwa̱ Zagbain A̱sula̱ a̱ wu wan.’ ” d
13 Ana Mekerenkesu mo kotoi ma̱lyungwa̱ ma̱ yi suru,
reve u lyawa yi neꞌen.
Yesu temei ulinga Ga̱lili
14 Reve Yesu ka̱mba̱ a̱tsuma̱ o ucira u Ruhu va Akiza a̱ tyo Ga̱lili.
Reve alabari a̱ yi a rawa e ilyuci i na i ri lo uka̱nda̱ruwu zuzu.
15 A̱vu u rocosu a̱ a̱ꞌisa̱ e le,
reve u tsura̱ ica e ekere a ama suru.
A ꞌyuwan ta̱ Yesu a Nazara
16 Ana u tyoyi Nazara (lyuci na u kungwai),
ɗaɗa u uwai a̱ a̱a̱ꞌisa̱ ununa u tsu yuwusan o urana wa Ashibi.
Reve u ꞌyon adama u ɗenuna̱.
17 Reve a ca yi Aatagada a Ishaya vumava̱sula̱.
Ɗaɗa u buba̱ruwa̱ niyi,
reve u cina uba̱ta̱ u na a ɗanai,
18 “Ruhu vu Zagbain to oɓolo na̱ a̱mu,
adama a na u ɗangwa mu ta̱,
adama n yuwaan a̱za̱ e iliyali adanshi a Alabari a Saꞌani.
U lyungu mu ta̱ adama n yuwan adanshi a na aa lyawa aza a na a̱ ri a tsugbashi,
nrumba̱ waru ee ene ure,
aza a na ee leꞌeshe waru o oꞌwo fa̱a̱n.
19 Reve waru n yuwan adanshi a aaꞌwan a na Zagbain zuwai a na aa yuwaan ama isaꞌani u yuwan ta̱.” e
20 Reve u kutsulu aatagadaꞌa,
a̱vu u ca za vu ulingaꞌa.
A̱vu u da̱nu,
tsa̱ra̱ u rito.
Reve ama a na a̱ ri pe a̱ a̱a̱ꞌisa̱ꞌa̱ suru a uwa a̱ka̱nla̱ a̱ yi.
21 A̱vu u damma le,
“Anaꞌan adanshi a nda a shiwan ta̱ a atsuvu a̱ ɗu.”
22 Reve a uwwa uyoꞌo,
a yuwusan asalama na adanshi e isaꞌani i na yu uta̱i o una̱ wa̱ yi.
A̱vu a damma,
“A̱yi nda,
a̱yi ɗaɗa mawun ma̱ Isuhu shi?”
23 A̱vu u damma le,
“Amayun,
i ta damma mu udammu u nda,
‘Boci,
ka̱mba̱to aciya̱wu gbaga.’
‘Suru ili i na waru tsu uwwai vu yuwain a Kafarnahum,
vu yuwan yi fo pa a̱ lyuci va̱ wu.’
24 Amayun,
n ta dansaa ɗu,
a tsu tara vumava̱sula̱ ili ya̱ a̱ɓula̱ a̱ lyuci va̱ yi shi.
25 “Waru amayun a ɗa maa dansaa ɗu,
a mantsa ma Iliya a yuwan ta̱ nruna̱ ma̱ a̱bunda̱ a̱tsuma̱ a Israꞌila.
A mantsa ma na a̱ ɓa̱ruyi zuva o roꞌo shi aꞌwan a taꞌatsu na̱ woto ta̱li,
reve ambulu a suɗuwa e iɗaꞌa.
26 Agba a̱ ca̱co Iliya a̱ tyo uba̱ta̱ wu za ro a̱tsuma̱ e le shi,
she uba̱ta̱ wa Sarafatu,
e iɗa ya Sida,
ka na da̱na̱i ma̱runa̱. f
27 Waru a yuwan ta̱ nkutu na̱ a̱bunda̱ a̱tsuma̱ a Israꞌila a mantsa ma Ilisha vumava̱sula̱.
Agba ko za ta̱ a̱ ka̱mba̱to gbaga shi,
she Naꞌaman vuma va Suriya.” g
28 Ana ama a na a̱ ri pe a̱ a̱a̱ꞌisa̱ a uwwai ne,
reve suru nle a uwwa upan lon.
29 Reve a̱ ꞌyon nu upan,
a̱vu o uta̱a̱ yi a̱tsuma̱ a̱ lyuci.
Reve a tara yi a̱ tyo e ncilecile m masasan ma na lo ɗa lyuci le ri usuwu,
adama e keɓe yi e iɗa.
30 Reve wu utula̱i ben e memere me le,
a̱vu u ka̱ra̱ ili ya̱ yi.
Vuma vo otoni a̱ lima̱
31 Reve Yesu ka̱ra̱ a̱ tyo Kafarnahum lyuci ro a̱tsuma̱ e iɗa ya̱ Ga̱lili.
Reve u uwa o rocosu ama o urana wa Ashibi.
Luka 4:31-44
33 A̱tsuma̱ a̱ a̱a̱ꞌisa̱ꞌa̱,
vuma vo otoni a̱ lima̱ da̱na̱ ta̱ pe,
reve u saala na̱ yisaali lon,
34 “Eyee!
Te imini ya̱ wu na̱ a̱tsu,
Yesu za va Nazara?
Vu ta̱wa̱ ta̱ adama vu una tsu?
N reve wu ta̱,
a̱vu ɗa Akiza a̱ A̱sula̱.”
35 Reve Yesu ɓara yi,
u damma,
“Ɓa̱ru una̱ wa̱ wu,
reve vu kakasa na̱ a̱yi!”
Ana otoni a̱ lima̱ꞌa̱ a varu niyi e memere me le,
reve wu kasa na̱ a̱yi,
u yuwan na̱ a̱yi ili shi.
36 Reve amaꞌa a uwa asalama,
reve a dammulai va̱ni le,
“Cuꞌun va adanshi e ne a ɗa tsunda?
Nu ucira nu ukadu u ɗa u ɓarai otoni a̱ lima̱,
reve o uta̱.”
37 Reve alabari a̱ yi a rawa uba̱ta̱ suru upasu wi iɗaꞌa.
A̱ ka̱mba̱toi a̱na̱wa̱le Simo gbaga
38 Reve u ꞌyon wu uta̱ a̱ a̱a̱ꞌisa̱ꞌa̱,
a̱vu u uwa o uꞌwa wa̱ Simo.
Agba a̱na̱wa̱le Simo a̱ shi a uwwa uyoꞌo shi,
u shi ta̱ a uwwusa uta̱nu lon.
Reve a damma Yesu adama a̱ yi.
39 Reve u rawa wi isawan zuzu na̱ a̱yi,
ɗaɗa u ɓarai ubanakuꞌun,
reve ubanakun u lyawa yi.
Reve u ꞌyoshin u yuwaan le a̱ga̱nda̱.
40 Urana a̱ ma̱riya̱a̱,
ɗaɗa mmaci ma̱ a̱za̱ o ubanakun n ta̱wa̱i ne ele uba̱ta̱ wa̱ Yesu.
A̱ da̱na̱ ta̱ na̱ banakun icuꞌun icuꞌun.
Reve wu juꞌwa̱n le,
ɗaɗa a̱ ka̱mba̱i gbagba.
41 Waru otoni a̱ lima̱ a kakasa ta̱ na ama na̱ a̱bunda̱ a yisaali,
“A̱vu ɗa Mawun ma̱ A̱sula̱!”
A̱vu u ɓara le,
u lyawa a yuwan adanshi shi,
adama a na e reve ta̱ a̱yi ɗa Kristi Zamawawaꞌa.
Yesu ꞌya̱wa̱ ta̱ alajiya
42 Ana usana u tawai,
reve u ka̱ra̱ a̱ tyo uba̱ta̱ u na vuma ri shi.
Reve ama a uwa izami ya̱ yi,
ɗaɗa a̱ ta̱wa̱i uba̱ta̱ wa̱ yi.
Reve a̱ shi a ciga a zuwa yi u da̱nu ne ele.
43 A̱vu gba u damma le,
“N ciga n ꞌyuwan n yuwaan ilyuci i ro alajiya a Alabari a Saꞌani o tsugono tsa̱ A̱sula̱ fo.
Adama o ndolo a ɗa a̱ lyungu numu.”
44 Ɗaɗa u lyuwai elime na alajiya a̱ a̱ꞌisa̱ a̱tsuma̱ a Yahuda.h