5
Jantu tasqꞌuini ji quiꞌalakꞌavin ni actilalhiꞌatsꞌoknuniu tavananch tucan ju caminchokoyaꞌ ju Cristo u ta yu cajunaꞌ ju acsnich avilhchan.
2 Jantu tasqꞌuini ni tuꞌuꞌ aclajunau ni uxijnan miꞌakstuꞌan kꞌoxich cꞌatsꞌayatꞌit ni jantu xamatiꞌ cꞌatsai tavanan tucan ju lai camilh.
Pus ju yuchi vatsꞌalhti caminaꞌ acsni jantu xamatiꞌ najun ni lai camilh.
Capuminaꞌ tachi ju tam akꞌalhonaꞌ ju min acsni jantu xamatiꞌ najun ni lai camilh.
3 Acsni calacnoncanach ni va lhikꞌachach ju ani chai matich ju talhanti pus ju acsnich va tam pantsꞌiquis caminach ju ixmakꞌalhkꞌajnatꞌan chai jantu lai xamatiꞌ catitakꞌalhtaxtulh.
Pus chunch catapasayaꞌ tachi ju tapasai laꞌisꞌatsucunti ju tam chakoꞌulh ni chin ju ixꞌamaklakꞌavanti.
Va tam pantsꞌiquis chin ju ixmakꞌalhkꞌajnat chai jantu lai catitakꞌalhtaxtulh laꞌixmakꞌalhkꞌajnat.
4 Para ju uxijnan ji quiꞌalakꞌavin jantu tꞌonatꞌit ju lacaꞌatatsꞌisni.
Ju uxijnan cꞌatsꞌayatꞌit ni caminchokoyaꞌ ju Cristo.
Chai yuchi jantu lai va sek catilhichilh tachi ju tam akꞌalhonaꞌ ju min acsni jantu xamatiꞌ najun ni lai camilh.
5 Pus ju uxijnan cꞌatsꞌayatꞌit ni caminchokoyaꞌ ju Cristo ni lhilacꞌapꞌintꞌatꞌit ju yuchi.
Chai apꞌinaꞌitꞌit ju lactꞌiyan junta si atuncunuꞌ junita.
Ju quijnanꞌan ju lhilacaꞌanauch ju Cristo jantu tꞌonau lacaꞌatatsꞌisni nin lai caꞌau junta jonkꞌalhita putsꞌista.
6 Pus tasqꞌuini ni calacpucujvich.
Chai skala catsucu.
Jantu chun calau tachi ju aliꞌin ju lana jantu tuꞌuꞌ tanavi cuenta.
7 Pus chani ju tapasai laquiꞌatsucuntiꞌan ju ani lacamunutpaꞌ.
Pus tsꞌis ju laclhtatacan chai tsꞌis ju lactꞌakꞌapꞌacan.
Pus vana va chun laꞌixmacni Dios.
Ju tatꞌajun lacaꞌatatsꞌisni ni jantucaꞌ tamispai ju Cristo pus tachi ju va talhtatanan laꞌisꞌatsucuntiꞌan chai tachi ju va tatꞌakꞌapꞌanita ju ixtacꞌatsanꞌan.
8 Para ju quijnanꞌan ju tꞌonau lacaꞌatuncunuꞌ tasqꞌuini ni caꞌacꞌatsanauch.
Pus chani calau ni jantu aquintatꞌalalhajayan ju macxcai.
Tasqꞌuini ni calhistacchokocau.
Chai lai chunch calau acsni pꞌas calhilaksiyau ju Jesús chai camapainininau.
Chai chunch cajunau tachi ju tam taropa ju lakchꞌi ju tsasnat ixcujuꞌ ni jantu lai catitanunilh ju flecha.
Tasqꞌuini ni calhistacchokocau.
Chai lai chunch calau acsni calhistꞌacꞌau ju quintacꞌatsanꞌan acsni calhilaksiyau ixchivinti Dios ni aktsꞌiya aquintamakꞌalhtaxtuyan.
Chai chunch cajunau tachi ju tam taropa ju aktanui ju tsasnat ixꞌaktanut ni jantu lai tapasani ju flecha.
9 Pus lai calhilaksiyau ju Dios ni aquintamakꞌalhtaxtuyan ni jantu quintalhilhcaꞌulanin ju Dios ni va camakꞌalhkꞌajnankꞌalhiyau.
Para quintalhilhcaꞌulanin ni catakꞌalhtaxtuyau va ixlacaꞌatalh quiꞌucxtinꞌan Jesucristo.
10 Pus ju yuchi nilh ju quilacataꞌan.
Ju chunch mas tꞌonaucaꞌ ju ani lacamunutpaꞌ u mas caniyau para aktsꞌiya astan catsucutachauch ju lactꞌiyan junta vilhcha ju yuchi.
11 Pus ni cꞌatsꞌayatꞌit ni caminchokoyaꞌ ju Cristo chai ni cꞌatsꞌayatꞌit ni apꞌinaꞌitꞌit ju lactꞌiyan pus yuchi palai alhitꞌailhipꞌitꞌit tachi ju aktsꞌiya layatꞌit acsni lamakꞌankꞌachꞌayatꞌit chai laꞌaktꞌaiꞌuyatꞌit ni lai palai alhilacꞌapꞌitꞌit ju Cristo.
Ju Pablo amapꞌaksinin
12 Chai iclatapaininiyau ji quiꞌalakꞌavin ni atꞌalhonitꞌit ju tachꞌalhcatnaniyan ju uxijnan.
Pus ju yuꞌunch miꞌucxtinꞌan tajunita laꞌixmacni ju quiꞌucxtinꞌan Jesús chai yuꞌunch ju tamapꞌaksiyan.
13 Vasalh tuꞌuꞌ alhiulatꞌit ju yuꞌunch chai amapꞌainitꞌit va ixlacaꞌatalh ixlhichꞌalhcatꞌan.
Tun tꞌilaxcꞌaꞌitꞌit ju pumatamin ju uxijnan.
14 Vachuꞌ iclalhimapꞌaksiyau ni amapꞌaksiyaꞌitꞌit ju jantu tachꞌalhcatnamputun.
Chai ju yuꞌunch ju va tatalhanan aꞌunitꞌit ni jantu na va catatalhanalh.
Aꞌaktꞌaiꞌutꞌit ju na xcai tasastꞌucꞌa ju macxcai acsni tuꞌuꞌ mapastꞌacꞌanican.
Jantu jeks aꞌunitꞌit xamatiꞌ.
15 Alaktsꞌintꞌitch.
Tun xamatiꞌ camapuspꞌitlh ju macxcai.
Alai va tachi alanavinitꞌit ju kꞌox ju milhiꞌuxijnanꞌan.
Chai vachuꞌ va tachi anavinitꞌit ju kꞌox tachi chun ju lapanacni.
16 Va tachi akꞌachꞌantꞌit.
17 Jantu tavanan amamactꞌatꞌit ju ixtꞌachivininca ju Dios.
18 Aꞌunitꞌit lakꞌailaktsꞌiuch ju Dios mas va tuchi camilh lamiꞌatsucuntiꞌan ni lacasqꞌuin ju Dios ni chunchach ju anaviyaꞌitꞌit uxijnan ju lhilacꞌapꞌinatꞌit ju Cristo Jesús.
19 Jantu asastꞌuctꞌit ju tuchi naviputun ju Spiritu Santu lamiꞌalhunutꞌan.
20 Jantu alacmajkꞌantꞌit ju ixchivinti Dios ju catajunan apumatam.
21 Para alaktsꞌintꞌanutꞌit tachi chun ju taxtokni u kꞌox u jantu.
Chai alacꞌaꞌitꞌit ju kꞌox laꞌixlhichux miꞌalhunutꞌan.
22 Para lana amacꞌaꞌuntꞌit tachi chun ju macxcai.
23 Chai yuchi ju Dios ju cataꞌaktaijuyan ni jantu calacꞌanaꞌ ju miꞌalhunutꞌan.
Chai ictapainini ju yuchi ni isꞌakstu salaka catanaviniyan chux ju miꞌatsucuntiꞌan.
Chai catalhistacniyan ju mintacꞌatsanꞌan chai ju mintacuvinꞌan chai ju milacatunaꞌan.
Ju chunch matich cajunaꞌ ju mintalakꞌalhinꞌan acsni tavanan caminchokoyach ju quiꞌucxtinꞌan Jesucristo.
24 Chai iccꞌatsai ni chunch ju caꞌuctaxtuyaꞌ lamiꞌatsucuntiꞌan ni lai lhilaksican ju Dios.
Yuchach ju tatꞌasanin chai yuchach ju catanavinikꞌoyan chux tuchi icsqꞌuinita.
Amacꞌaminin ju Pablo
25 Quiꞌalakꞌavin va tachi atꞌachꞌivinintꞌit ju Dios ju quilacata quincꞌan.
26 Amacꞌamitꞌit chux ju quiꞌalakꞌavinꞌan lacaꞌamapaininti.
27 Iclalhimapꞌaksiyau ni amakꞌasmatꞌayaꞌitꞌit tachi chun ju quiꞌalakꞌavinꞌan junima alhiqui.
Ju quiꞌucxtinꞌan Jesús cacꞌatsayaꞌ ni jantu chun alayaꞌitꞌit.
28 Pus ictapainini ju quiꞌucxtinꞌan Jesucristo ni catanaviniyan lamapainin ju uxijnan.