Alin ju atsucunti ju kꞌachani ju Dios
4
Pus ji quiꞌalakꞌavin ju quitꞌin ixtamalakachan ju quiꞌucxtinꞌan Jesús icjunita.
Chai yuchi iclalhiquilhtapujuyau chai iclalhimapꞌaksiyau ni atꞌailhipꞌitꞌitch tachi ju xaclajunau acsni xaclajunau ta yu cavalh ju miꞌatsucuntiꞌan.
Ta yu kꞌoxich capulhiula ju Dios.
Chai iccꞌatsayau ni chunchach ju naviyatꞌit.
Para va iclacasqꞌuinau ni palai atꞌailhipꞌitꞌit.
2 Ju uxijnan mispꞌayatꞌit ju lhamapꞌaksin ju iclaxtaknitau tachi ju quintamamachakxanitan ju quiꞌucxtinꞌan Jesús.
3 Pus ju ixkꞌachat ju Dios yuchi ni salaka cava ju miꞌatsucuntiꞌan.
Ju chunch va nomputun ni jantu apꞌuxcꞌaꞌutꞌit ju minavinꞌan.
4 Chai ju Dios lacasqꞌuin ni cacꞌatsa pumatamin ju uxijnan ta yu laich capupuxcaulh ju tam ixꞌamachakaꞌ tachi ju lhijunch ni taxacanitan ju miꞌalhunutꞌan ju Dios.
Chai cacꞌatsa ta yu laich caputasuyaꞌ ni vasalh tuꞌuꞌ lhiulayatꞌit ju miꞌamachakaꞌan.
5 Jantiyuꞌ alhipꞌuxcꞌaꞌutꞌit laꞌixtachaput ju amacxcai atalacpastꞌacꞌat tachi ju talai ju lapanacni ju jantu tamispai ju Dios.
6 Para ni jantu chunch ju alatꞌit tachi ju iclajuntau pus lai alakꞌalhiyaꞌitꞌit ju quinchivinti chai lai alactꞌuꞌuyaꞌitꞌit tam milhilakꞌauꞌan.
Pus ju quiꞌucxtinꞌan Dios yuchi ju amamapalani tachi chun ju tanavi ju chunch alactuꞌunti.
Chai ju quitꞌin chunch xaclajunau chai xaclalhimapꞌaksiyauch.
7 Pus tasqꞌuini ni salaka catsucu ni yuchi quintalhitꞌasanitan ju Dios.
Jantiyuꞌ ni va caꞌalactuꞌunuch.
8 Pus ju jantu tuꞌuꞌ lhiulai ju ani lhamapꞌaksin va nomputunch ni jantu tuꞌuꞌ lhiulai ju Dios mas yuchi ju quintaxtaknitanch ju iSpiritu Santu ju tꞌajun laquiꞌalhunutꞌan.
Yuchi ju Dios ju jantu tuꞌuꞌ lhiulacan.
Jantiyuꞌ ju va ixtꞌalapanac ju xcaji.
9 Pus jantu tasqꞌuini ni aclaꞌatsꞌoknuniu ju uxijnan ixlacata ju amapaininti tachi ju lhilakꞌauch ni isꞌakstu ju Dios ju xatamalaniyan ju uxijnan ni alamapꞌainiyaꞌitꞌit.
10 Chai chunchach ju naviniyatꞌit tachi chun ju miꞌalakꞌavinꞌan ju tavilanancha ju xalacatꞌun Macedonia.
Para iclatapaininiyau ji quiꞌalakꞌavin ni palai alamapꞌainitꞌit.
11 Apꞌuxcꞌaꞌutꞌit ju kꞌox atsucunti ju jantu va lacalasat.
Anavitꞌit ju milhichꞌalhcatꞌan miꞌakstuꞌan.
Jantu va atꞌanutꞌit junta jantu mincuentaꞌan.
Apꞌuchꞌalhcꞌatnantꞌit ju mimacaꞌan tachi ju iclalhimapꞌaksitauch.
12 Ju chunch ju yuꞌunch ju jantucaꞌ talhilacaꞌanta ju Cristo catalaktsꞌinan ni soknicꞌa ju miꞌatsucuntiꞌan chai jantu tasqꞌuini ni apumatam catamavayan ni lhaꞌatꞌatꞌit miꞌakstuꞌan tuchꞌi maktꞌasqꞌuiniyatꞌit.
Ju Cristo caminchokoyaꞌ
13 Vachuꞌ ji quiꞌalakꞌavin iclacasqꞌuinau ni amachꞌakxatꞌit ixlacataꞌan ju tanita.
Ju chunch ni jantu alhamakꞌanininaꞌitꞌit tachi ju talai ju aliꞌin ju jantu catitalaktsꞌincha ju Cristo ju lactꞌiyan.
14 Pus lacaꞌiyau ni nilh ju Jesús chai taꞌacxtuchokolh junta ixmacnucanta.
Chai vachuꞌ lacaꞌiyau ni Dios ju caꞌalactꞌalhiminach ju Jesús tachi chun ju ixtalhilacaꞌanta ju yuchi acsni ixtitatꞌajuncaꞌ.
15 Pus iclajunauch ju ani ixchivinti ju quiꞌucxtinꞌan Jesús.
Pus ju quijnanꞌan ju tꞌonaucaꞌ acsni caminchokoyach ju quiꞌucxtinꞌan Jesús jantu lai catiꞌapꞌulhniu ju yuꞌunch ju tanitach.
16 Pus isꞌakstu ju quiꞌucxtinꞌan Jesús ju aquintatꞌasaniyan acsni caminanta ju lactꞌiyan.
Chai cachivinaꞌ ju xakꞌai anquilh.
Chai caskꞌolhcanaꞌ laꞌiskꞌolh ju Dios.
Chai ju tanitach ju ixtalhilacaꞌanta ju Cristo catalokꞌonchokoyach pꞌulhnan.
17 Astan ju quijnanꞌan ju titꞌonaucaꞌ va kꞌaixtamch catꞌalhiꞌancanau lacaꞌataputsꞌi.
Caꞌanauch pakxtoknin ju quiꞌucxtinꞌan ju talaclhman.
Chai catꞌatolhkꞌalhitachauch ju quiꞌucxtinꞌan.
18 Pus alalhimatankꞌoxaxkꞌayatꞌit ju chunch chivinti.