Yóm hlingón bè yóm ubiha tabag
15
Sotu kdaw bè yó,
tey dê tau gel mtuk bwis ne yó kem dumu tau gemsalà sembung ke Jisas na a hmungol yóm ktoloken.
2 Yó gel slón le ke Jisas yó kem Farisi ne yó kem tau gel tmolok hlau,
mon le,
“Nim Jisas ni,
sónmoen tendo gel hmódó yó kem tau gemsalà,
lelen gel segbót mken bélê le.”
3 Bè yóm kungol Jisas du yóm mon le yó,
yó gónón wen hningónen bélê le,
monen,
4 “Ke wen sotu bélê ye mfun lematu ubiha,
tedu mò kmoen du se ke sotu lana bélê le?
Ngem kà nan na tebel yóm syóm folò syóm ditu bè gónóhen gel hótób kul anì nan e hnebel yóm sotu lana lem blóng le efet bud tonen.
5 Yóm deng ktonen du,
tey kehligalen.
Tódô henmungen hkabal du
6 ne niten mulék ebè gónóen.
Tikóng deng kól ta,
gotu tnabahen yó kem ween kkólen bè yó kem dumuhen sebét,
ne monen mò kul,
‘Hligal tekuy.
Deng bud tonu yóm lana bè yó kem ubihahu.’
7 Tódô tulónu kuy,”
mon Jisas,
“hol lómón yó se yóm kehligal le bè longit ke ton le kehegsel yóm sotu tau gemsalà.
Bong kligal le béléen senta yó kem syóm folò syóm tau là tabag le,
deng tedeng kmò le.”
Yóm hlingón bè yóm filak mgel lana
8 “Ne sotuhen,”
mon Jisas,
“wen sotu libun hemyu sfolò filak blówón alì mebtes.
Mò kmoen du se ke sotu lana du?
Yó nmoen,
hentomen soloken,
ne nunóhen gu tek seelen,
ngangen ne smisif mebel du efet bud tonen.
9 Yóm deng bud ktonen du,
gotu tnabahen yó kem ween kkólen bè yó kem dumuhen sebét,
monen mò kul,
‘Hligal tekuy.
Deng bud tonu yóm lana bè filaku.’
10 Tódô tulónu kuy,”
mon Jisas,
“hol lómón yó se kehligal yó kem hógów Dwata nô bè longit ke hegsel yóm sotu tau gemsalà.”
Yóm hlingón bè yóm ngà htabag
11 Bud wen sotu tulón Jisas kul,
monen,
“Wen sotu tau lewu ngaen logi.
The Prodigal Son (Luk 15:11-32)
12 Monen mò ke maen yóm twoli,
‘Ó Mà,
blayem béléu ne yóm dou ólól bè yó kem kimuhem.’
Tahu se,
nólól mà le yó kem kimuhen.
13 Kogolen bè yó,
fen gotu hbalù yóm ngà són twoli yóm kun kimu,
ne ominen lemwót htabag,
ne gotu niten yó kem filaken.
Tey mayuk yóm benwu gónóhen e solu,
ne tódô hotuhen óyóen mamà du bè yó kem laen muhen yóm filaken.
14 Ngangen mò du efet gotu.
Nan e mbel yóm tey bitil bong lem yóm benwu gónóhen nô yó,
blaem laen bang bud kwahen yóm logi yó koni.
15 Kewóten bè yó ne,
nan e mò nmò bè yóm sotu tau lem yóm benwu yó.
Yó hmoen du yóm tau yó,
gel hemken sdô.
16 Ya tey tô óyóen mken se kun bè yóm kul ken yó kem sdô,
okóm là kô blay le du.
17 Tikóng deng gsel ne,
monen,
“Blaem tum bè le mà,
sal gel glukas ken le yó kem tau gel mò nmò béléen,
kóen nim dou,
fene tô lemnus.
18 Tódóe bud mulék ebè mà dé ni,
ne yó angat monu mò du,
‘Mà,
tey salau bè Dwata,
ne tey salau béléem snéen.
19 Là buden knóón ne ke bud ngaem ou.
Tódô heskélem ou bè yó kem tau gel mò nmò béléem.’ ”
20 Tahu se,
lemwót yóm ngà tehe htabag yó,
ne mulék ebè maen.
Bè yóm hanà tolo klayuken bè gónô le,
maen gna mton du.
Ya tey kkoduhen du.
Ominen tódô mlóy nan e senlong lenkef yóm ngaen,
lelen melek du.
21 Ne yó mon yóm logi mò ke maen,
monen,
‘Ó Mà,
tey salau bè Dwata,
ne tey salau béléem snéen.
Là buden knóón ne ke bud tô ngaem ou.’
22 Okóm yóm maen,
tódô kendel tnabahen yó kem tau mò nmò béléen,
ne monen mò kul,
‘Hetlasik géhél nit ye dou edini yóm nes alì tilob mò lesek nim ngau.
Ma ye do tising mò suu bè tdoken,
ne tlumfaen.
23 Omin ye mangay kut yóm ngà safì mabù mò tnétê ye anì na tekuy hol hligal mken.
24 Abay se nim ngau ni,
lómón ke deng matay,
okóm deng bud mowil.
Deng tehe hlana,
okóm deng bud hton.’
Ne tahu se,
nbut le bè yó ne hligal.
25 Bong yóm ngaen twogu,
tolo nô bè tniba kun.
Bè yóm kuléken,
deng moni ebè gónô ne,
gungolen yóm tey kehligal le tembol ne madal.
26 Yó ne tnabahen yóm sotu tau mò nmò bè maen,
ne snólóken béléen,
monen,
‘Tedu tum alì hnigal le?’
27 Ne mudél yóm tau snólóken yó,
monen,
‘Yóm twolihem deng bud kól.
Htétê maem yóm ngà safì mabù,
hnigalen kkólen,
abay se laen dù tonen hemenen.’
28 Okóm mom lembut yóm logi twogu yó,
ne là dogen motun ta.
Omin maen mnaul elaan nan e nubug anì motun ta.
29 Mom yó monen mò ke maen,
monen,
‘Tenngelem dé,
Mà,
tey deng kegenu tendo mò nmò béléem,
lómón tóe tau hesek.
Ne balù sulék ke deng sen-gilu uu.
Ewenem yó,
balù yóm ngà kambing,
là kô deng nam e htétê du do mò gónóhu mit kem dumuhu hligal.
30 Mom ni he fen gónóhem hmatay yóm ngà safì mabù bè kkól nim ngaem alì hegwós kimuhem bè kem libun hdóyón.’