Los mil años
20
Cabero yʉ ca-tʉjʉ joowʉ tunu ángel apeĩ ʉmʉrecóopʉ ca-rui acʉ́re.
Llavere ca-cʉgowĩ,
pãricarore,
ope ca-ʉ̃cʉari opere pãaricaro.
Come wẽere cadena ca-pairi wẽe quenare ca-cʉgowĩ.
2-3 To bairi ati yepapʉre rui eja,
dragón're cʉ̃ ca-ñeewĩ.
Pinore bairo ca-ãcʉ̃ ca-rʉjʉgoʉre diablo,
wãtia ʉpaʉ o Sataná ca-wamecʉcʉre cʉ̃ ca-ñeewĩ.
To bairo cʉ̃ ñei yua,
ti wẽe come wẽe mena cʉ̃ ca-jia tuuwĩ.
Cʉ̃ jia tu,
ti opepʉ ca-ʉ̃cʉari opepʉ cʉ̃ ca-tʉ̃ga ne roca jãacõa joowĩ.
To bairo cʉ̃ tʉ̃ga ne roca jãa yaparoʉ ti opere ca-bia tucõawĩ llave mena.
To bairi mil canacã cʉmari majuu pãrique manigaro.
Mil canacã cʉmari camajare na cʉ̃ ĩitoqueticõato ĩi,
to bairo ca-biawĩ ti opere ángel.
Mil canacã cʉmari bero to cõona,
ti opepʉre cʉ̃ buti rotigʉmi tunu dragón're.
Cʉ̃re cʉ̃ ca-buti rotibato quena,
yoaro caroorijere áti teñaquetigʉmi dragón yua.
4 Cabero yʉ ca-tʉjʉ joowʉ tunu ruiriquere ca-roti majirã na ca-ruirijere.
Topʉ ca-ruirã quenare na yʉ ca-tʉjʉ joowʉ.
Na maca camajare Dio cʉ̃ ca-beje rotirã ca-ãma.
To bairi tunu aperã quenare na yʉ ca-tʉjʉ joowʉ ca-bai yajiricarã ca-tunu catírãre.
Jesúre ca-apiʉjarã,
Dio ye quetire ca-apiʉjarã ca-ãma.
Ati yepapʉ ãnaa mai monstruore cʉ̃ cá-áti nʉcʉbʉgoquẽjuparã.
Cʉ̃re bairo ca-bauʉ camaja na ca-wericʉ quenare cá-áti nʉcʉbʉgoquẽjuparã.
Na riya pãiroripʉre,
na wamoripʉre cʉ̃ ya wamere ca-uca tuu rotiquẽjuparã.
To bairona cʉ̃ ca-booquẽjuparã.
To bairo na ca-bairo yua,
ati yepa macana maca na ca-jĩa reewã.
Na rʉpoarire ca-pajure reecõañuparã.
To bairo ána nare ca-jĩa reewã.
To bairo na ca-jĩabato quena Dio maca nare ca-tunu catíoyupi.
To bairo cʉ̃ cá-áto Jesucristo mena ca-rotirã anigarãma mil canacã cʉmari majuu yua.
5 Naa,
Dio cʉ̃ ca-tunu catío jʉgoricarã ca-ãma.
Aperãre ca-bai yajiricarãre Dio na ca-tunu catíoquẽmi mai.
Mil canacã cʉmari bero nare tunu catíogʉmi Dio aperã macare.
6 To bairo Dio cʉ̃ ca-tunu catío jʉgoricarã maca wariñuu anigarãma seeto.
Dio yarã majuu ãma caroarã.
Ca-bai yajiricarã anibana quena pʉgani yajiquetigarãma.
Peeropʉ na reequetigʉmi Dio.
Diore,
cʉ̃ Macʉ Jesucristo quenare áti nʉcʉbʉgori sacerdote majare bairo maca anigarãma,
Dio yere buiobojarã.
To bairi Jesucristo mena ca-rotirã anigarãma mil canacã cʉmari majuu yua.
7 To bairi mil canacã cʉmari ca-petiro ángel pãricarore ca-cʉgoʉ,
Sataná macare preso joorica opepʉ ca-ãnacʉre cʉ̃ buugʉmi yua.
8 To bairi Sataná maca buti ejaʉ ati yepa macanare na ĩitogʉmi tunu.
To canacã paʉ camaja na ca-ani paʉripʉ na ĩito teñagʉmi.
Gog,
Magog ca-wamecʉti macari macana quenare na ĩito teñagʉmi.
Camaja capaarã majuu neñari na amequẽato ĩi,
na ĩitogʉmi Sataná.
To bairi capaarã majuu camaja poari cõona,
cõoña peo majiña mano na ĩitogʉmi yua.
9 To bairo nare cʉ̃ ca-ĩitoro cʉ̃ ca-ĩi rotirore bairo átigarãma.
To bairi nipetiropʉ ca-ãnana neñapogarãma,
Dio yarãre quẽgarã.
To bairi Dio yarã na ca-ani macare ca-rupa beto tʉjʉnucuri na camotagarãma.
Ti maca Dio cʉ̃ ca-mairi maca macanare na camotagarãma.
To bairo na cá-átibato quena yua,
peero ʉmʉrecóo macaje na wẽe ree peagaro.
To bairi ca-quẽgabatana maca ʉ̃ʉ peticoagarãma yua.
10 To bairo na ca-bairo Dio maca diablo Satanáre wãtia ʉpaʉre ati yepa macanare ca-ĩitoricʉ majuu cʉ̃ rocacõa joogʉmi asufre mena ca-ʉ̃ri peeropʉ ca-pairi peero majuu.
Monstruo,
cʉ̃ bero macacʉ ca-ĩito paii mena,
na cʉ̃ ca-ree jooricaropʉ cʉ̃ rocacõa joogʉmi Sataná quenare.
To bairi topʉ ãnaa ʉmʉreco quenare,
ñami quenare seeto wijiocõa aninucugarãma to canacã rʉmʉ,
ti peeropʉre ãnaa yua.
El juicio ante el gran trono blanco
11 Cabero yʉ ca-tʉjʉ joowʉ tunu ruiricaro pairi cumuro,
caʉpaʉ cʉ̃ ca-ruirica cumuro,
cabotiri cumurore.
Topʉ ca-ruii quenare cʉ̃ yʉ ca-tʉjʉwʉ.
To bairo yʉ ca-tʉjʉro ʉmʉrecóo ca-peticoapʉ.
Yepa quena ca-peticoapʉ.
Cabero ca-baunemoquẽpʉ yua.
12 To bairo ca-bairo ca-bai yajiricarã ca-tunu catíricarãre na yʉ ca-tʉjʉwʉ.
Caʉparã quenare,
cawatoa ca-ãna quenare na yʉ ca-tʉjʉwʉ nipetirãre.
Caʉpaʉ cʉ̃ ca-ruiro riape ca-tʉjʉnucuwã.
To bairo na ca-tʉjʉnucuro cʉ̃a,
Caʉpaʉ maca ca-pãawĩ cʉ̃ papera pũurire.
To bairi ape pũuro quenare ca-pãawĩ.
Ti pũuro cabero macá pũuro maca Dio yarã na wamerire cʉ̃ ca-uca tuurica pũuro ca-ãmʉ.
To bairi camaja nipetirã ca-bai yajiricarã ca-tunu catíricarãre na ca-cõoña bejewĩ Dio rooro na cá-átaje,
caroaro na cá-átaje quenare,
ti pũuripʉre cʉ̃ ca-uca tuuriquere tʉjʉri.
13 To bairi mar ca-pairi yapʉ ca-yajiricarã ca-tunu catíwã.
Ati yepapʉ ca-yajiricarã quena ca-tunu catíwã.
To canacã yʉtea macana ati yepapʉ ca-anibatana ca-tunu catíwã.
To bairo na ca-tunu catíro,
cʉ̃ Caʉpaʉ maca na quenare na ca-cõoña bejewĩ rooro na cá-átaje,
caroaro na cá-átaje quenare,
cʉ̃ ca-uca tuuriquere tʉjʉri.
14 Caroorije cá-átana maca asufre mena ca-ʉ̃ri peeropʉ na ca-reecõa joowĩ pairi peero majuupʉre.
To bairi Dio cʉ̃ ca-booquẽna maca ti peeropʉ ca-yajinemowã.
Pʉganipʉ ca-bai yajiricarãre bairo ca-yajiwã.
Rooro majuu ca-baiwã yua.
15 To bairi noa Dio yarã cʉ̃ mena ca-anicõa aniparã na wamere cʉ̃ ca-uca tuurica pũuropʉre na ya wame uca tuurique ca-mamata na ca-reecõa joowĩ ti peeropʉ yua.