Cielo nuevo y tierra nueva
21
Cabero yʉ ca-tʉjʉ joowʉ tunu.
Cawama ʉmʉrecóo quenare,
cawama yepa quenare yʉ ca-tʉjʉ joowʉ.
Ca-jʉgoye macaje ati ʉmʉrecóo,
ati yepa quena ca-peticoapʉ.
Mar ca-pairi ya quena ca-mamʉ.
Dio nemoo cʉ̃ cá-áti jeeñoorique ca-wajoarique jeto ca-ãmʉ yua.
2 Ca-wajoarique jeto tʉjʉ yaparoʉ yʉ Juan yʉ ca-tʉjʉ joowʉ tunu.
Cawama maca ʉmʉrecóo Dio tʉpʉ ca-rui nutuatí macare yʉ ca-tʉjʉ joowʉ.
Ti maca Nueva Jerusalén ca-wamecʉto caroa maca,
Dio ya maca majuu ca-bauwʉ.
Cãromio wamo jiago cõ manapʉ ca-anipaʉ,
yʉre cʉ̃ tʉjʉ wariñuato ĩo caroa jutii jañacõarico cõ ca-baurore bairona ca-bauwʉ ti maca caroa maca.
3 Cabero tunu baujaro majuu ca-wadarijere yʉ ca-apiwʉ.
Ʉpaʉ cʉ̃ ca-ruiri paʉna oco bairo ca-ĩi wadawʉ:
—¡Apiya!
Yucʉra Dio cʉ̃ yarã mena anicõa aninucugʉmi.
Na aáweoquetigʉmi.
Naa cʉ̃ yarã majuu anicõa anigarãma.
To bairi Dio na mena aniri na Ʉpaʉ anicõa anigʉmi to canacã rʉmʉ yua.
4 To bairi cʉ̃ yarã na ca-otirijere,
na cape ocore na coje reebojagʉmi Dio,
to cõona tʉgooñarique paiqueticõaña na ĩi.
“Caroaro mʉjaare yʉ cotecõa aninucugʉ to canacã rʉmʉ yua,”
na ĩigʉmi Dio nare,
cʉ̃ yarãre.
To bairi bai yajiquetigarãma.
Riaye manigaro.
Tʉgooñarique pairique quena manigaro.
Otirique quena manigaro.
Wijiorique quena manigaro.
Ti yepa macaje ca-ani jʉgobataje manigaro.
Caroa wariñuurique jeto anigaro atopʉre Nueva Jerusalén ca-wame cʉtopʉre Dio mena,
ca-ĩi bau buti ejawʉ.
5 To bairo ca-ĩiro bero ti paʉpʉ ca-ruii Ʉpaʉ maca:
—Apiya mʉjaa,
ca-ĩiwĩ Dio.
—Nipetirije caroa cawama jeto yʉ áa tunu,
ca-ĩiwĩ.
To bairo ĩi yʉ ca-uca tuunemo rotiwĩ:
—Tie mʉ ca-apiejere caroaro cariape queti buiorique ãa.
To bairona baicõa anigaro tie mʉ ca-apieje.
To bairi tiere uca tuuya mʉa,
yʉ ca-ĩiwĩ Dio.
6 To bairo ĩi:
—To cõona ãa,
yʉ ca-ĩiwĩ.
—Yʉa,
nipetirijere cá-átacʉ yʉ ãa.
Nipetirijere ca-majii yʉ ãa.
Nipetirã netoro ca-tutuaʉ yʉ ãa.
Ca-ani jʉgoricʉ yʉ ãa.
To bairona yʉ anicõa aninucugʉ to canacã rʉmʉ.
To bairi camaja seeto ca-boorãre catíriquere na yʉ joonucu.
Wapa mano na yʉ joonucu.
Na ca-jeniro nemoona na yʉ joonucu caroaro catíriquere,
yʉ mena na anicõa aninucuato ĩi yua.
7 To bairi noa caroorijere Sataná cʉ̃ ca-rotirijere cá-átiqueticõa aninucurãre nare yʉ joogʉ caroare.
Na cá-áti nʉcʉbʉgoʉ yʉ anicõagʉ.
Na maca yʉ punaa majuu ca-ãna anigarãma.
8 Aperã maca uwirã yʉ ye quetire ca-apiʉjaquẽna maca asufre mena ca-ʉ̃ri peeropʉ anigarãma.
Yʉre ca-api nʉcʉbʉgoquẽna quena,
caroorije cá-áticõana quena,
aperãre ca-jĩarã quena,
cá-áti epericarãcʉna quena,
cumu ãnajere cá-ána quena,
Dio ca-aniquẽna weericarãre cá-áti nʉcʉbʉgorã quena,
ca-ĩito pairã quena,
nipetirã to bairona ca-bairã peeropʉ aágarãma asufre mena ca-ʉ̃ri peeropʉ na ye wapa.
To bairo tamuori pʉgani ca-bai yajiricarãre bairo yajinemogarãma,
ca-ĩiwĩ Dio.
La nueva Jerusalén
9 Cabero ángel yʉ tʉpʉ ca-ejawĩ tunu.
Rooro tamuorije ca-jañari jotʉri ca-cʉgorã siete mena macacʉ jicãʉ ca-ãmi.
Yʉ tʉpʉ ejaʉ:
—Adʉja,
yʉ ca-ĩiwĩ.
—Mʉre yʉ iñoogʉ Cordero cʉ̃ nʉmo ca-anipao cõ ca-ani maca.
Cʉ̃ nʉmo ca-anipao ĩi Jesúre ca-nʉcʉbʉgorã ca-ani poa ĩigʉ ca-ĩiñupi.
10 To bairo yʉ ĩi,
Espíritu Santo cʉ̃ ca-majiorije jʉgori yʉ ca-ne aámi ʉ̃taʉpʉre.
Pairicʉ,
ca-ʉmʉaricʉ buipʉre yʉ ca-ne aámi.
To bairi topʉ yʉre ne aá,
yʉ ca-iñoojowĩ caroa macare.
Dio tʉpʉ ca-rui nutuatí macare yʉ ca-iñoojowĩ Dio ya maca macare,
pairi maca,
Jerusalén ca-wamecʉti maca majuure.
11 Ti maca Dio cʉ̃ ca-aji baterije mena ca-ajiyawʉ.
Ʉ̃ta rupaacã ca-wapa pacarije caroa ca-ajiyari rupaacãre bairo ca-ajiyawʉ.
Jaspe ca-wamecʉti rupaacã ca-ajiyarore bairo ca-bauwʉ.
Vidrio cabotirijere bairo caroaro ca-bauwʉ ti maca.
12 To bairi ti macare ʉ̃ta rupaa mena na ca-wee amojorerica janiro ca-ãmʉ.
Ʉmʉaro majuu bia ejooricaro ca-ãmʉ.
Tʉbʉro majuu ca-ãmʉ na ca-biarique quena.
To bairi joperi doce majuu ca-ãmʉ.
Ti joperi ca-ano cõona ca-ãma ángel maja.
To bairi ti joperi buire uca tuurique ca-ãmʉ.
Israel macana doce poari macana na wameri uca tuurique ca-ãmʉ joperi buire.
13 To bairi ti maca tʉjaro na ca-jania amojorerica janiropʉre to canacã nʉgoa tʉpʉrena itia jope jeto ca-jopericʉpʉ ti janiropʉre.
Ti joperi ca-ano canacãʉna ca-ãma ángel maja.
Muipu cʉ̃ ca-piya atí puri macare itia jope,
cʉ̃ ca-roca jãa atí puri macare itia jope,
ca-jõcʉ nʉgoa tʉ itia jope,
ape nʉgoa tʉ quenare itia jope ca-ãmʉ ti janiropʉre.
14 To bairi ti maca ʉ̃ta rupaa mena na ca-wee amojorerica janiro pʉtopʉre ca-ãmʉ ʉ̃ta pãiri,
doce majuu capaca pãiri.
Na ca-wee cũu jʉgorica pãiri ca-ãmʉ,
ti janiro caroaro to tʉjʉnucuato ĩirã.
To bairi ti pãiri buire uca tuurique ca-ãmʉ.
Apóstol maja,
Cordero yarã doce majuu na wameri ca-ãmʉ uca tuurique ti pãiri buire.
15 To bairi cʉ̃a ángel yʉre ca-queti buioʉ maca cõoñaricʉ ca-cʉgowĩ.
Oro ca-ajiyaricʉ ca-ãmʉ.
Tii mena ti macare cõoñagʉ ca-baiwĩ.
Ti maca joperi quenare,
ti maca ʉ̃ta mena na wee amojorerica janiro quenare cõoñagʉ ca-baiwĩ.
16 To bairi tiire ne aá,
ti macare ca-cõoñawĩ yua.
To bairo cʉ̃ ca-cõoñaro to canacã nʉgoa jicãro cõo jeto ca-ãmʉ ti maca.
To bairi dos mil doscientos kilómetros cõo yoaro ca-ãmʉ to canacã nʉgoapʉna.
To bairona dos mil doscientos kilómetros ʉmʉaro majuu ca-ãmʉ ti maca.
17 Cabero tunu ti maca ʉ̃ta mena na ca-wee amojorerica janiro quenare ca-cõoñawĩ ángel.
Camaja na ca-cõoñarore bairona ca-cõoñawĩ.
To bairi sesenta y cuatro metro ʉmʉaro majuu ca-ãmʉ ti maca na ca-wee amojorerica janiro maca.
18 To bairi jaspe na ca-ĩrije caroa ʉ̃ta rupaa mena na cá-átaje ca-ãmʉ na ca-wee amojorerica janiro.
To bairi ti maca oro majuu ca-ajiyarije mena na cá-átaje ca-ãmʉ.
Ʉgueri mano caroa eñorore bairo ca-ajiyawʉ.
19-20 To bairi ti maca na ca-wee amojorerica janiro ca-pʉto macaje,
na ca-wee cũu jʉgorica pãiri maca caroa ʉ̃ta pãiri majuu ca-ãmʉ.
Doce pãiri majuu ca-ãmʉ.
Jicã pãi jaspe ca-wamecʉtie ʉ̃ta pãi caroa pãi ca-ãmʉ.
Ape pãi safiro ca-wamecʉtie ʉ̃ta pãi ca-ãmʉ.
Ape pãi ágata,
ape pãi esmeralda,
ape pãi ónice,
ape pãi cornalina,
ape pãi crisólito,
ape pãi berilo,
ape pãi topacio,
ape pãi crisoprasa,
ape pãi jacinto,
ape pãi amatista ca-wamecʉtie caroa ʉ̃ta pãiri ca-ãmʉ,
ti maca na ca-wee amojorerica janiro ca-pʉto macá pãiri,
na ca-wee cũu jʉgorica pãiri.
21 To bairi ti maca macaje joperi perla ca-wamecʉti rupaa mena,
caroaro cabotiri rupaa mena na cá-átaje ca-ãmʉ.
To canacã joperipʉrena jicã jeto ca-ãmʉ perla.
To bairi ti maca recomaca cá-aáti wãa oro majuu mena na cá-áta wãa ca-ãmʉ.
Ʉgueri mano caroa eñorore bairo ca-ajiyawʉ ti maca recomaca cá-aáti wã.
22 To bairi ti macapʉre ti wiire Dio wii unore yʉ ca-tʉjʉquẽpʉ.
Ca-mamʉ Dio wii,
templo na ca-ĩri wii.
Ti maca nipetiropʉ Diore cʉ̃ cá-áti nʉcʉbʉgowã ti maca macana maca.
Dio ca-tutuaʉ,
cʉ̃ Macʉ Cordero ca-wamecʉcʉ quenare na cá-áti nʉcʉbʉgowã camaja ti maca nipetiropʉ.
To bairi ti maca nipetiro Dio ya paʉ majuu,
templo ca-ãmʉ.
Dio cʉ̃ ca-anopʉ ca-ãmʉ ti maca.
23 To bairi ti maca ñe unie ca-rʉjaquẽpʉ ca-jĩa bujupe.
Dio ye cʉ̃ ca-aji baterije mena caroaro ca-bujuwʉ.
Cordero cʉ̃ ca-ajiyarije mena quena caroaro majuu ca-bujuwʉ.
To bairi muipu ʉmʉreco macacʉ quena,
muipu ñami macacʉ quena na ca-manibato quena ñe unie ca-rʉjaquẽpʉ ca-jĩa bujurije ti macapʉre.
24 To bairi to canacã poa macana camaja na ca-ani paʉripʉ ti maca ca-bujurije jʉgori na cá-átipere caroaro áti majicõagarãma.
To bairi ati yepa macana caʉparã ti macapʉre ejagarãma,
Diore cʉ̃ áti nʉcʉbʉgorã ejarã.
25 Ti maca macaje joperire biaquetigarãma.
Pãrica joperi jeto anicõa aninucugaro to canacã rʉmʉ.
Ti macapʉre ñami manigaro.
26 To bairi camaja to canacã poa macana ti macapʉre ejagarãma,
Diore cʉ̃ áti nʉcʉbʉgorã ejarã yua.
27 Dije unie caroorije ti macapʉre jãaquetigaro.
Caroorije cá-ána quenare na jãa rotiquetigʉmi Dio.
Ca-ĩito pairã quenare na jãa rotiquetigʉmi.
To bairi Cordero cʉ̃ yarã na wamerire cʉ̃ ca-uca tuurica pũuropʉ na wamerire cʉ̃ ca-uca tuuricarã jetore na jãa rotigʉmi Dio ti macapʉre.