19
To bairo Babilonia macana na ca-baipere tʉjʉ yaparoʉ yua,
yʉ ca-apiwʉ tunu ca-wadarijere.
Ʉmʉrecoo macana capaarã majuu seeto na ca-wada bate joorije ca-baurijere yʉ ca-apiwʉ.
¡Aleluya!
¡Diore mani ĩi wariñuu bajato!
Rooro majuu mani ca-tamuoboriquere mani ca-netoobojaʉ ãmi mani Ʉpaʉ Dio.
Caroaʉ majuu ãmi.
Nipetirãre ca-rotii ãmi cʉ̃a.
2 Caroaro cariape cá-ácʉ ãmi Dio,
caroorije cá-ánare to bairo nare popiyeyei.
Caʉmʉa mena cá-áti epe paio ya maca macanare seeto na popiyeyegʉmi yua.
Ti maca macana caroorije majuu na cá-átiere tʉjʉri na cõoña bejei áami Dio.
To bairo na cõoña bejei yua,
popiye na ca-tamuoro na átigʉmi Dio caroorije na cá-átie wapa.
Cʉ̃ ca-boorijere ca-apiʉjarãre na ca-jĩa reecõa átinucurije wapa to bairona na popiyeyegʉmi Dio,
ca-ĩi wada baujawã ʉmʉrecóo macana maca.
3 To bairo ĩi,
oco bairo ca-ĩi baujawã tunu:
¡Aleluya!
¡Ñuu majuucõa!
Ti maca ca-pairi maca ʉ̃ʉgaro bai.
To bairona ti maca bujeri bujecõa aninucugaro to canacã rʉmʉ yua,
ca-ĩi wada baujawã naa,
ʉmʉrecóo macana.
4 To bairo na ca-ĩiro cabʉcʉrã ca-rotirã veinticuatro majuu ca-ãna rʉpopatuaripʉ ejacumuri Diore cʉ̃ cá-áti nʉcʉbʉgowã.
Ricati ca-baurã cuatro majuu to bairona cá-ámá na quena.
Dio cʉ̃ ca-ruiri paʉ tʉ cʉ̃ cá-áti nʉcʉbʉgowã:
—¡Dio cʉ̃ cá-átie ñuu majuucõa!
¡Aleluya!
¡Ñuu majuucõa!
ca-ĩi bajawã.
5 To bairo na ca-ĩiro Dio cʉ̃ ca-ruiri paʉpʉ ca-wadarije ca-bʉjʉ butiwʉ:
¡Mani Pacʉ Diore cʉ̃ ĩi wariñuu bajanemoña mʉja quena!
Mʉjaa cʉ̃ yarã,
cʉ̃re ca-nʉcʉbʉgorã,
cʉ̃ ĩi wariñuu bajanemoña.
Mʉjaa caʉparã quena,
cawatoa ca-ãna quena,
mʉja nipetirã cʉ̃ ĩi baja wariñuunemoña,
topʉ Dio tʉ macacʉ cʉ̃ ca-ĩrije ca-bau buti atírajawʉ Dio cʉ̃ ca-ruiri paʉpʉ.
La fiesta de las bodas del Cordero
6 To bairo cʉ̃ ca-ĩi wadaro bero yʉ ca-apiwʉ tunu camaja capaarã na ca-wadarijere.
Seeto ca-bʉjʉwʉ na ca-wadarije na quenare.
Ʉ̃ta poerori capee ca-bʉjʉrore bairo ca-bʉjʉwʉ.
Bʉpoa seeto na ca-parore bairo ca-bauwʉ:
¡Aleluya!
¡Ñuu majuucõa!
Mani Ʉpaʉ Dio ca-tutuaʉ aniri nipetirã netoro ca-roti maji majuʉ ãmi.
Cʉ̃ ca-boorore bairo áti peocõami,
ca-ĩi wadawã yua.
7-8 To bairi boje rʉmʉ,
meere ejacoapa.
Cordero cʉ̃ ca-wamo jiapa rʉmʉ,
meere ejacoapa.
To bairi Cordero nʉmo ca-anipaore ñe unie cõ rʉjaquẽe.
Jutii caroa cabotirijere cõre na ca-jooriquere jaña tʉgamo,
meere.
Caroaro ca-ajiyarijere bairo,
meere jañamo.
Jutii ca-ʉgueri maniere jañamo.
Diore ca-apiʉjarã cʉ̃ yarã ca-ani poa ĩigaro áa Cordero nʉmo ca-anipao to ca-ĩata.
Dio yarã caroaro na ca-aniere majioro bai cabotiri yeje jutiiro.
Caroa majuu ãa na cá-átie,
caroorije mano.
To bairi Diore mani ĩi wariñuu bajaato.
“Mʉ jeto caroaʉ majuu mʉ ãa,”
Diore mani ĩi wariñuu bajaato,
ca-ĩi wadawã.
9 To bairo ca-wadarije na ca-ĩi wada yaparoro ángel yʉ tʉ ca-ãcʉ̃ maca yʉ ca-ĩiwĩ tunu:
—Mʉre yʉ ca-ĩirore bairo uca tuuya,
Juan,
yʉ ca-ĩiwĩ.
—Wariñuurã áama camaja Cordero cʉ̃ ya boje rʉmʉ ca-ano na ca-pi jooricarã,
yʉ ca-ĩiwĩ.
—Tie mʉre yʉ ca-ĩrije cariape ãa.
Dio maca yʉre ca-queti buiowĩ tiere,
yʉ ca-ĩiwĩ ángel.
10 To bairo cʉ̃ ca-ĩiro cʉ̃ tʉpʉre rʉpopatuari mena ejacumuri,
cʉ̃ ĩi nʉcʉbʉgoʉ yʉ cá-ápʉ́.
To bairo yʉ cá-áto cʉ̃ maca:
—¡To bairo átiqueticõaña!
yʉ ca-ĩiwĩ.
—Mʉre bairona ca-ãcʉ̃ yʉ ãa yʉ quena,
Dio cʉ̃ ca-rotirijere cá-ácʉ.
Mʉ yarãre bairo quenare,
Jesucristo ye queti ca-apiʉjarãre bairo quenare yʉ ãa.
Jicãro cõo mani áti aninucu.
To bairi yʉ tʉpʉre rʉpopatuari mena ejacumuqueticõaña mʉa.
Dio jetore cʉ̃ áti nʉcʉbʉgoya.
Dio manire cʉ̃ ca-iñoorije nipetirijere manire áti iñoonucumi,
camaja Jesú cʉ̃ cá-áti aniere caroaro na majiato ĩi,
yʉ ca-ĩiwĩ ángel.
El jinete del caballo blanco
11 To bairo cʉ̃ ca-ĩiro bero ʉmʉrecóore pãricarore bairo yʉ ca-tʉjʉ joowʉ.
Topʉ yʉ ca-tʉjʉ jooro caballo ca-botii majuu ca-bauwĩ.
Cʉ̃ buire ca-pejawĩ jicãʉ.
CɄ̃ CA-ĨRIJERE BAIRO CÁ-ÁCɄ ca-wamecʉmi cʉ̃ buire ca-pejaʉ.
Ape wame quena,
CARIAPE CA-ĨI BUIOɄ ca-wamecʉmi.
Cʉ̃a caroaro cariape camajare na ca-cõoña beje majiwĩ,
caroaro na cá-átiere o rooro na cá-átiere tʉjʉ majiri.
To bairona cʉ̃ wapanare popiye na ca-tamuoro na cá-ácʉ ca-ãmi.
12 Cʉ̃ capeari peerore bairo ca-ajiyawʉ.
To bairi cʉ̃ rʉpoa buire ca-pejawĩ rupa betori unie,
ca-ajiyari betori ʉparã na ca-pejari betori uniere.
To bairi cʉ̃ riya pãipʉre uca tuurique ca-bau tujawʉ.
Ti wame cʉ̃ riya pãipʉre ca-bau tujarijere cʉ̃ jeto ca-majiwĩ.
Aperã ca-majiquẽma.
13 To bairi cʉ̃ jutiiro ca-jũari jutiiro majuu ca-bauwʉ.
Rií bapapʉre na ca-jãaricarore bairo ca-bauwʉ cʉ̃ jutiiro.
To bairi ape wame quena ca-wamecʉmi:
DIO YE QUETIRE CA-BUIOɄ MAJUU ca-wamecʉmi cʉ̃a.
14 To bairo cʉ̃ cá-aáto,
ʉmʉrecóo macana uwamarã cʉ̃ bero ca-ʉjawã.
Na maca caroa jutii cabotirijere,
ca-ʉgueri maniere ca-jañawã.
Caballoa cabotirã bui ca-pejawã cʉ̃ berore ʉja aána.
15 To bairo na cá-aáto cʉ̃na na ʉpaʉ macare cʉ̃ rijeropʉre ca-buti nʉcawʉ jarerica pãi ca-ori pãi majuu.
To bairi to canacã maca macana cʉ̃re ca-booquẽna cʉ̃ uwibʉjagarãma.
Na quẽ netocõagʉmi ti pãi mena.
To bairi cʉ̃ ca-rotirore bairo na cá-áto na átigʉmi.
Tutuaro majuu na rotigʉmi.
Cʉ̃re ca-bai netoo nʉcarãre na reegʉmi.
Camaja ʉje oco jeegarã na ca-cʉta waarore bairo tutuaro na átigʉmi,
cʉ̃re ca-apiʉjaquẽnare na popiyeyei.
To bairi Dio nipetirã netoro cá-áti majii aniri cʉ̃ ca-rotirore bairo na átigʉmi.
16 Apeye tunu caballo bui ca-peja aácʉ cʉ̃ ʉjepʉtopʉ uca tuurique ca-ãmʉ,
cʉ̃ jutiiropʉ quenare.
Oco bairo ca-bau tujawʉ:
NIPETIRÃRE CA-ROTII,
ɄPARÃ QUENARE CA-ROTII ca-ĩi tujawʉ cʉ̃ ʉjepʉtopʉre,
cʉ̃ jutiiropʉ quenare uca tuurique ca-anie.
17 Cabero yʉ ca-tʉjʉ joowʉ ángel apeĩre muipu cʉ̃ ca-ajiyarije tʉ ca-tʉjʉnucuʉre.
Cʉ̃ maca baujaro majuu ca-pi joowĩ.
Yucaare na ca-pi joowĩ,
na neñaato ĩi.
—Ʉgarã ajá,
na ca-ĩiwĩ.
Dio cʉ̃ ca-reeparã na rupaʉri ãnajere na ʉgaato ĩi,
nare ca-pi joowĩ ángel yucaare.
—Capee anigaro na rupaʉri ãnaje.
18 Caʉparã rupaʉri ãnajere mʉja ʉgagarã.
To bairona uwamarãre ca-rotirã quenare,
seeto ca-quẽ majibatana quenare,
caballoa quenare,
na bui ca-peja aána quenare,
nipetirã camaja na rupaʉri ãnajere mʉja ʉgagarã.
To bairi ca-paabojari maja quenare,
na majuuna ca-paariquecʉna quenare,
cawamarã,
cabʉcʉrã,
ca-majirã quenare,
nipetirã na rupaʉri ãnajere mʉja ʉgagarã.
Capee anigaro mʉja ca-ʉgape yua,
na ca-ĩiwĩ ángel yucaare.
19 To bairo cʉ̃ ca-ĩiro yʉ ca-tʉjʉ joowʉ tunu ati yepapʉre.
Atore neñaporã ca-baiwã camaja.
Monstruo quena,
ati yepa macana ʉparã quena,
na uwamarã quena neñaporã ca-ãma.
“Caballo bui ca-peja aácʉre cʉ̃ mena macana quenare na mani jĩa reecõarã,”
ĩirã,
neñaporã ca-ãma.
20 To bairo na ca-neñaporo yua,
caballo bui ca-peja aácʉ maca pʉgarãre na ca-ñeewĩ.
Monstruo quenare,
cʉ̃ bero macacʉ ca-ĩito paii quenare na ca-ñeewĩ yua.
Ca-ĩito paii cabero macacʉ maca camaja na ca-tʉjʉ acʉarijere cá-áti iñooricʉ ca-ãmi.
Monstruo cʉ̃ jʉgoye macacʉ cʉ̃ ca-majio joorije jʉgori to bairo ca-tʉjʉya maniere cá-áti iñooricʉ ca-ãmi.
To bairo na áti iñoori camajare na ca-ĩitoyupi.
Monstruo ya wamere na riya pãiroripʉre ca-uca tuu rotiricarãre ca-ĩitoricʉ ca-ãmi.
Cʉ̃re bairo ca-bauʉ na ca-wericʉre cá-áti nʉcʉbʉgorãre na ca-ĩitoricʉ ca-ãmi.
To bairi yua monstruore,
monstruo bero macacʉ ca-ĩito paiire na pʉgarãpʉrena na ca-ñeewĩ caballo bui ca-peja aácʉ maca.
Na ñei yua,
ca-catírãrena na ca-reecõa joowĩ asufre mena ca-ʉ̃ri peeropʉ,
pairi peero majuu.
21 To bairo na reecõa joʉ yua,
aperãre na mena ca-neñapobatanare na ca-jĩa reecõawĩ.
Cʉ̃ ya pãi mena,
jarerica pãi mena na ca-jĩa peocõawĩ.
Cʉ̃ rijeropʉre ca-buti nʉcari pãi mena na ca-jĩawĩ caballo bui ca-peja aácʉ maca.
To bairo cʉ̃ ca-jĩaro bero na rupaʉri ãnajere yucaa maca ca-ʉga yapicoama rooro majuu yua.