La caída de Babilonia
18
To bairo ángel yʉre cʉ̃ ca-ĩi queti buioro bero yʉ ca-tʉjʉwʉ tunu.
Ángel ʉmʉrecóopʉ ca-rui acʉ́re cʉ̃ yʉ ca-tʉjʉwʉ.
Seeto ca-ajiya rui amí.
Seeto ca-roti majii ca-ãmi.
To bairi seeto ca-ajiyaʉ ati yepapʉre cʉ̃ ca-rui ejaro ati yepa quena ca-bujuwʉ ángel cʉ̃ ca-ajiyarije jʉgori yua.
2 To bairo ca-bairo ángel maca seeto baujaro oco bairo ca-ĩi wadawĩ:
—Meere yua,
meere na reecõagʉmi Dio Babilonia macanare.
Ti maca ca-pairi maca macanare na reecõagʉmi yua.
To bairi ti macapʉ camaja na ca-mano wãtia Sataná yarã maca ani ejagarãma.
Nipetirã caroorã ani ejagarãma.
Yucaa una quena ani ejagarãma Babiloniapʉre.
3 To canacã maca macana maca Babilonia macana caroorije na cá-áti aniere tʉjʉma.
Caroorije na cá-áti aniere tʉjʉri na quena na rupaʉ macaje caroorijere átiganucuma na quena.
To bairona to canacã maca macana ʉparã Babilonia macana mena caroorije átinucuma na quena.
To bairi to canacã maca macana na ye apeye uniere joori ca-wapatarã pairo wapatama,
ti maca macana na ca-boorijere joorã.
To bairi yucʉra na reecõagʉmi Dio nare Babilonia macanare yua,
ca-ĩiwĩ ángel maca seeto baujaro ca-ĩi wadaʉ.
4 To bairo cʉ̃ ca-ĩiro bero yʉ ca-apiwʉ tunu ʉmʉrecóo macacʉ apeĩ cʉ̃ ca-ĩrijere:
—Adʉja,
yʉ yarã.
Ti maca macana mena aniqueticõaña.
Mʉja quena nare bairo caroorije mʉja átire.
Nare bairo ána nare bairo popiye mʉja quena mʉja tamuoborã tie wapa.
5 Caroorije na cá-átie pairo ãa.
Caroorije na cá-átiere papera pũuropʉ jicã tuti mani ca-ucaata ʉmʉrecóopʉre ejaboro ti tuti.
To bairi yucʉra yua,
Dio maca caroorije na cá-átiere tʉgooñari na cõoña bejei áami.
Na cõoña bejei popiye na ca-tamuoro na átigʉmi yucʉra yua.
6 To bairi mʉjaa ángel maja,
Dio yere ca-paabojarã,
cʉ̃ ca-ĩirore bairo ája.
Popiye na ca-tamuoro na ája Babilonia macanare.
Diore ca-apiʉjarãre rooro nare na cá-átatore bairona na ája.
Netobʉjaro na ája caroorije na cá-átie wapa yua.
7 Ti maca ca-pairi maca macana apeye uniere pairo cʉgoma.
“Dije unie rʉjaquẽto mani cʉgo.
Cawatoa macana mee mani ãa,”
ĩima.
To bairona,
“Ca-roti majirã majuu mani ãa.
Noa manire roti neto majiquẽnama.
To bairona mani ani wariñuucõa aninucugarã to canacã rʉmʉ,”
ĩima.
To bairo rooro na ca-ĩi tʉgooñarije cõo rooro na popiyeyeya.
8 To bairi yoaro mee na ca-riaro na átigʉmi Dio.
To bairo cʉ̃ cá-áto to macana jicãarã Babilonia macana bai yajicoagarãma.
“¡Ayu,
ayu!”
ĩigarãma na yarã.
To bairona aperã ñigo mena bai yajicoagarãma.
Aperã tunu ʉ̃ʉcoagarãma mani Ʉpaʉ Dio ca-tutuaʉ peerore cʉ̃ ca-joorije jʉgori.
To bairona na popiyeyegʉmi Dio roorije na cá-átinucurije tʉjʉri.
9 ’To bairi ati yepa macana ʉparã to bairo Babilonia macana na ca-bairo tʉjʉrã yua,
otigarãma.
Babilonia macana mena rooro cá-átana maca na ca-yajirijere tʉjʉrã otigarãma.
“¡Ayu,
ayu!”
ĩi otigarãma.
Babilonia na ca-ĩri maca ca-ʉ̃rore tʉjʉ joorã seeto tʉgooñarique paigarãma ati yepa macana ʉparã.
10 Uwirã ti maca tʉacã aáquetigarãma.
Jõopʉna ti maca ãnatore tʉjʉ joocõa anigarãma.
Tʉjʉ joo,
“¡Ayu,
ayu!”
ĩigarãma.
“Ti maca Babilonia ca-pairi maca ca-anibato quena maa yucʉra.
Yoaro mee yajicoapʉ.
Yaji majuucoapʉ to macana rooro na cá-átie jʉgori yua,”
ĩigarãma ati yepa macana ʉparã maca.
11 ’To bairona ati yepa macana apeyere joori ca-niyeru wapatarã otigarãma na quena.
Tʉgooñarique paigarãma na quena.
“Noa jã yere ca-wapayeparã maama yucʉra,”
ĩi otigarãma.
“Mani ye capee apeye uniere manire wapaye majiquẽema yucʉra,”
ĩi otigarãma.
12 “Oro uniere,
plata uniere,
ʉ̃ta rupaacãre caroa ca-ajiyarije uniere,
cabotiri rupaacã uniere,
jutii cabotirijere,
jutii ca-jʉmerijere,
jutii caroaro ca-põrerijeacãre,
jutii ca-jũarijere,
yucʉ caroa ca-jʉti ñuurijere,
marfil na ca-ĩrije mena caroa na cá-átajere,
yucʉ caroaʉ mena na cá-átajere,
bronce mena caroa na cá-átajere,
comee mena caroa na cá-átajere,
mármol na ca-ĩrije mena caroa na cá-átajere ca-wapayeparã maama.
Mani apeyere ca-jeeparã maama,”
ĩigarãma.
13 “Ʉgariquere ca-jãa ajurije,
canela na ca-ĩrije,
bia uniere,
caroa jʉti ñuurije uniere,
ʉco uniere,
vino ʉje ocore,
ʉje olivo na ca-ĩrije macajere,
poca caroa macajere,
trigore,
wecʉare,
ovejare,
caballoare,
caballoa tʉ̃garica coorire,
camaja ca-paabojarãre noa na wapayequetigarãma yucʉra yua,”
ĩigarãma.
14 To bairo ĩi,
oco bairo ĩigarãma tunu,
apeyere joori ca-niyeru wapatabatana tunu:
“¡Ayu,
ayu!
Yucʉra Babilonia macana ãnana yajicoama.
Na ca-boo netorije quena yajicoapa.
Nipetirije caroa unie yajicoapa.
Na ye pairo ca-wapacʉtie yajicoapa.
Yucʉra tʉjʉ bʉga majiña mano tie yua,”
ĩigarãma apeyere joori ca-niyeru wapatabatana maca.
15 ’To bairi pairo ca-wapatabatana maca Babilonia macana Dio nare cʉ̃ ca-popiyeyero uwibana ti maca tʉacã aáquetigarãma.
Jõopʉna ãnaa ti maca ãnatore tʉjʉ joocõagarãma.
To bairo tʉjʉ joorã oti awajagarãma,
seeto tʉgooñarique paibana.
16 To bairo tʉgooñarique paibana,
“¡Ayu,
ayu!”
ĩigarãma.
“Ti maca caroa maca ca-anibapʉ.
Cãromio caroao wamagacõa átacore bairo caroaro tʉjoo ñuuri maca ca-baubapʉ ti maca ãnato.
Cãromio caroa jutii,
ca-jʉmerije,
ca-jũarije ca-jañaore bairo ca-baubapʉ.
Cãromio caroa ca-baurije mena oro unie,
ʉ̃ta rupaacã caroa ca-ajiyarije unie mena,
cabotirije rupaacã unie mena áti wamagacõarico cõ ca-baurore bairo ca-baubapʉ ti maca ãnato.
Caroa maca majuu ca-anibapʉ.
17 Yucʉra maa yua.
Nemoopʉna yajicoapʉ ti maca ãnato.
Nipetirije ti maca macana na ye ãnaje apeye unie yaji peticoapʉ.
Caroa unie yaji peticoapʉ,”
ĩigarãma na apeyere joori ca-wapatabatana maca.
’To bairi ria ca-pairi ya macaje cumua ca-pairica macaje ʉparã ti maca ãnatore tʉjʉ joogarãma.
Na mena macana quena ca-pairi yapʉ jee cá-aáteñarã to bairona ti maca ãnatore tʉjʉ joogarãma.
18 Ti maca ãnato ca-ʉ̃ʉ bujerijere tʉjʉ joorã seeto tʉgooñarique paigarãma.
Tʉgooñarique pairã oco bairo ĩi awajagarãma:
“¡Di maca ati macare bairi maca caroa maca majuu ca-mamʉ!”
ĩigarãma.
19 ’To bairo ĩirã yua,
na rʉpoari buire jita ma peogarãma,
seeto tʉgooñarique paibana.
Oti awajagarãma seeto,
“¡Ayu,
ayu!”
ĩi oti awajagarãma.
“Mania ria ca-pairi yapʉ ca-apeye jee aáteñarã mani nipetirã pairo mani ca-wapatanucubapʉ,
ti maca macanare nunirã.
Yucʉra maa ti maca caroa maca ãnato.
Yoaro mee yajicoajupa yua,”
ĩigarãma riapʉ ca-apeye jee atínucubatana maca.
20 ’Yucʉra yua,
mʉjaa ʉmʉrecóo macana wariñuuña.
Diore ca-apiʉjarã quena,
mʉjaa apóstol maja quena,
mʉjaa Dio ye quetire ca-buiorã quena,
mʉjaa nipetirã Dio yarã wariñuuña.
Meere popiye na ca-tamuoro na átigʉmi mani Pacʉ Dio nare,
Babilonia macanare.
Rooro mʉjaare cá-átanare to bairo na átigʉmi Dio na ye wapa.
To bairi wariñuuña mʉjaa.
21 Cabero tunu ángel jicãʉ ca-tutuaʉ ca-buia ejawĩ.
Cʉ̃ maca ʉ̃ta cui ca-tʉbʉri cui majuure ca-ne mʉgowĩ.
Trigore na ca-wãiari cui unore ca-ne mʉgowĩ.
Ti cui ca-nʉcʉri cui majuure ne mʉgoʉ ca-roca ñua joowĩ ria ca-pairi yapʉre yua.
Roca ñua joori:
—To bairona baigaro Babilonia na ca-ĩri maca,
ca-ĩiwĩ.
—Ti maca ca-pairi maca to bairona baigaro.
Yaji majuucõagaro ti maca.
Camaja dope bairo áti bʉga majiquetigarãma ti macare,
ca-ĩiwĩ.
22 —To bairi,
meere apiya manigaro ti maca macana na ca-bajarije yua.
Harpare na ca-bʉga pʉtẽ bajarije quena,
tõroa mena na cá-áti bajarije,
putirique mena na cá-áti bajarije noo cõopʉ apiya manigaro ti macapʉre.
To bairona paari maja apeye uniere caroa ca-quenoorã manigarãma.
To bairona ca-bʉjʉrije trigore na ca-wãiarije quena bʉjʉquetigaro tie quena.
23 To bairona jĩa bujurique quena ʉ̃ʉ buju batequetigaro.
To bairona cawamarã ca-wamo jiarã na ca-wadarije apiya manigaro.
Ame tʉjʉri wadapenirique caroa wariñuurique mena apiya manigaro ti macapʉre yua.
To cõona camaja manigarãma ti macapʉre.
To macana na apeyere joori ca-niyeru wapataricarã maca pairo ca-niyerucʉna anibapa.
Ca-roti majirãre bairo anibapa.
Caroorije cá-átinucurã ãma naa.
To bairi ca-baje majiri maja anibana ati yepa macanare na ĩitoma.
To bairi Dio maca ti maca macanare to bairona na reegʉmi yua.
24 ’Caroorije majuu áama ti maca macana.
Diore ca-apiʉjarãre,
Dio ye quetire ca-buiorã quenare,
“Na jĩa reecõaña,”
ĩinucuma na yarãre ti macapʉre.
To bairona jĩa rotinucuma nipetiropʉre.
To bairi na quenare na reecõagʉmi Dio ti maca macanare tunu.