—Adʉja yʉ mena,

yʉ ca-ĩiwĩ.

—Mʉre yʉ iñoogʉ mai atio caʉmʉare rooro cá-áti epe paiore Dio cõre cʉ̃ ca-popiyeyepere.

Ria ca-pairi ya tʉ Babilonia na ca-ĩri maca majuupʉ ca-ruio popiye cõ ca-tamuopere mʉ yʉ iñoogʉ.

Cõ popiyeyegʉmi Dio cõ ye wapa yua,

yʉ ca-ĩiwĩ ángel maca.

2 Ĩi yua,

yʉ ca-ĩiwĩ tunu:

—Ati yepa macana ʉparã cõ mena caroorije cá-ámá.

Caroorã ca-roore na cá-áti eperore bairo na quena atio yere apeye uniere,

to bairo cõ ca-queti buiorije quenare ca-boo netowã.

To bairi rooro majuu cá-ámá ati yepa macana quena.

Ca-eti cumu pairã rooro na ca-eti cumu mecʉnucurore bairona rooro majuu cá-ámá na quena,

cõ ca-rotirore bairona,

yʉ ca-ĩiwĩ ángel.

3 To bairo ĩi,

yʉ ca-ne aámi camaja na ca-manopʉ.

Espíritu Santo cʉ̃ ca-majiorije jʉgori yʉ ca-ne aámi.

To bairo yʉre cʉ̃ ca-ne aáto yua,

cõ yʉ ca-tʉjʉwʉ cãromiore.

Cõ maca monstruo ca-jũaʉ buire ca-ruiwõ.

Caroori wamere ca-uca tuu ecooricʉ buire ca-ruiwõ.

Siete majuu ca-rʉpoaricʉcʉ,

tunu diez majuu ca-jawiaricʉcʉ buire ca-ruiwõ.

4 To bairi jutii ca-jʉmerije,

jutii ca-jũarije ca-jañawõ.

Oro ca-ajiyarije mena ca-wamoorico ca-ãmo.

Ʉ̃ta rupaacãre caroa ca-ajiyarije unie quenare ca-bʉjawõ.

Cabotiri rupaacã quenare ca-bʉjawõ.

Capee ca-wapa pacarije jeto ca-bʉjawõ.

To bairi etirica rʉʉ oro ca-ajiyari rʉʉ ca-newõ.

Ti rʉʉ cõ ca-neri rʉʉ maca ca-jiracoapʉ caroorije.

Ti rʉʉ macaje caroorije nipetirije rooro cõ cá-átie,

rooro cõ cá-áti eperije quenare majioro ca-baiwʉ.

To bairi ti rʉpʉ ca-jañaro caroorije ca-baurore bairo ca-bauwʉ caroorije cõ cá-átinucurije.

5 To bairi cõ riya pãipʉre uca tuurique ca-ãmʉ.

Ca-majiriori wame ca-ãmʉ tie uca tuurique.

Oco bairo ca-ĩiwʉ:

“Atio itia wame ca-wamecʉco ãmo.

BABILONIA ca-pairi maca wamecʉmo.

CAROORÃ ROMIRI PACO quena wamecʉmo.

CAROORIJE CA-ĨI JɄGO MAJIO ÁCO quena wamecʉmo,”

itia wame majuu uca tuurique ca-ãmʉ cõ riya pãiropʉre.

6 Ca-eti cumu paiore bairo ca-mecʉo ca-ãmo cõa.

Cõ mena macanare Dio yarã,

Jesúre ca-apiʉja janagaquẽnare ca-jĩa ree rotiwõ capaarãre.

To bairo majuuna na jĩa ree roticõari na ca-rií reero ca-tʉjʉ wariñuucõawõ ca-mecʉo maca.

To bairi yʉ maca to bairo ca-jĩa roti paiore cõ tʉjʉʉ yʉ ca-tʉjʉ acʉacoapʉ yua.

7 To bairo yʉ ca-tʉjʉ acʉacoato ángel maca:

—¿Nope ĩi cõre mʉ tʉjʉ acʉatí?

Tʉjʉ acʉaqueticõaña.

Caroaro mʉ yʉ queti buiogʉ ca-majiriori wame cõ ca-bairi wamere.

To bairona cõ ca-ruiricʉ,

monstruo siete majuu ca-rʉpoaricʉcʉ,

diez majuu ca-jawiaricʉcʉ cʉ̃ ca-bairi wame quenare mʉ yʉ queti buiogʉ,

yʉ ca-ĩiwĩ ángel.

8 Oco bairo yʉ ca-ĩiwĩ tunu:

—Cʉ̃a,

monstruo ca-ãmi tirʉmʉpʉre.

Yucʉacãre bauquẽemi.

Ape rʉmʉ ca-anopʉ ca-ʉ̃cʉari opepʉ ca-ãnacʉ buti atígʉmi tunu.

Ti rʉmʉ ca-ano Dio maca cʉ̃ rocacõagʉmi ca-ʉ̃ʉ yati majiquẽtopʉ yua.

To bairo cʉ̃ ca-yajiparo jʉgoye Diore ca-apiʉjaquẽna maca cʉ̃ ca-aniecʉtiere tʉjʉ acʉari cʉ̃ apiʉjagarãma monstruore.

Dio yarã ca-ano cõo na wamerire ati yepa ca-aniparo jʉgoye cʉ̃ ca-uca tuurica pũuropʉ ca-uca tuu ecooquetana maca monstruo cʉ̃ cá-áti aniere tʉjʉ acʉari cʉ̃ apiʉjagarãma yua,

yʉ ca-ĩi queti buiowĩ ángel.

9 ’Caroaro apiʉja majiña mai mʉ yʉ ca-ĩi queti buiopere.

Ca-majiriorijere mʉ yʉ queti buiogʉ.

Apiya.

Monstruore cʉ̃ tʉjʉya.

Siete majuu ca-rʉpoaricʉcʉ ãmi.

To bairona ca-roo,

monstruo bui ca-ruio ya macapʉ Babilonia ca-wamecʉti macapʉ siete buurori majuu ãa.

10 To bairona ti buurori caʉparã siete majuure majioro bai.

Ʉparã na ca-bairi wamere mʉ yʉ buiopa.

Ʉparã mena macana jicã wamo canacãʉ majuu ca-ree ecooricarã ãma.

Apeĩ rotinucumi mai.

Apeĩ seis bero macacʉ maca bauquẽemi mai.

Cʉ̃ maca caʉpaʉ jãabacʉ quena yoaro aniquetigʉmi cʉ̃ quena.

To bairi yoaro roti majiquetigʉmi ati yepa macanare yua.

11 To bairona cʉ̃a monstruo,

meere yucʉacã ca-ejaricʉ cʉ̃ jʉgoye macanare bairo ca-ãcʉ̃ anigʉmi.

Ʉparã siete bero rotigʉmi cʉ̃ quena.

To bairo rotibacʉ quena yoaro roti aniquetigʉmi.

To cõopʉ cʉ̃re rocagʉmi Dio yua.

12 ’Apeye tunu cʉ̃re,

monstruo diez majuu ca-jawiari cʉcʉre tʉgooñaña.

Cʉ̃ jawiari majioro bai aperã ʉparãre.

Diez majuu anigarãma ʉparã.

Ca-jãaquẽma mai na ca-rotipere.

Ape rʉmʉpʉ ʉparã anigarãma.

To bairi ʉparã jãarã monstruo mena na roti majigarãma camajare ati yepa macanare.

Rotibana quena yoaroacã mee roti anigarãma.

Jicã yʉteacã jeto roti anigarãma.

13 To bairi naa maca ʉparã jicãrore bairo tʉgooñagarãma.

Monstruo cʉ̃ ca-rotirijere rotinemogarãma camajare.

“Jã maca mʉ ẽoro ca-ãna maca jã rotinemogarã,”

cʉ̃ ĩigarãma monstruore.

14 To bairo bairã yua,

“Jitá,

cʉ̃ mani quẽto Cordero ca-wamecʉcʉre,”

ame ĩigarãma.

To bairo corderore cʉ̃re na ca-quẽgabato quena Cordero maca na quẽ netogʉmi yua.

Cordero maca nipetirã netoro ca-roti majii ãmi.

Maca ʉparã quenare nipetirãre ca-rotii ãmi.

To bairi na quẽ neto majigʉmi.

To bairi cʉ̃ mena macana cʉ̃ ca-bejericarã anigarãma.

Aperã nare na ca-popiyeyebato quena Corderore cʉ̃ apiʉja janaquetigarãma,

yʉ ca-ĩi queti buiowĩ ángel.

15 To bairo yʉ ĩi queti buio,

yʉ ca-ĩi queti buionemowĩ tunu:

—Apeye tunu ria ca-pairi yare mʉ tʉjʉwʉ.

Ca-roo cõ ca-ruiro tʉ macá ya riare mʉ tʉjʉwʉ.

Ti ya ria ca-pairi ya majuu ãa.

Ti ya buio majioro bai ati yepa macanare.

Camaja to canacã maca macana,

to canacã poa majuu ãma cõ ca-rotirijere ca-apiʉjarã paarãacã.

16 Cabero yua,

diez majuu ʉparã maca monstruo mena to canacãʉpʉna cõre teebʉjagarãma ca-roore.

Cõre teerã cõ rocagarãma.

Capee apeye uniere ca-cʉgobatacore,

caroaro ca-juti jañabatacore apeye unie máco cõ átigarãma.

To bairo cõ áti yaparorã,

cõ rupaʉ riire ʉga ree peogarãma.

To bairo ʉga yapirã ca-rʉjarijere peeropʉ joe ree peogarãma yua.

17 To bairo cõre na ca-reepere Dio maca na yeripʉ na wadajãgʉmi.

Yʉ ca-boorore bairo na áparo ĩi,

to bairo na wadajãgʉmi Dio.

Cʉ̃ maca jicãrore bairona na tʉgooñaato ĩi,

na rotigʉmi Dio na yeripʉre.

“Camajare mʉ ca-rotirijere jã rotinemogarã.

Mʉ ẽoro ca-ãna maca jã rotinemogarã,”

monstruore na ca-ĩiparore bairo boomi Dio.

To bairona na wadajãgʉmi Dio,

cʉ̃ ye queti buio jʉgoyeyeriquere bairo na cá-átiparore bairo ĩi yua.

18 To bairi cãromiore cõ mʉ tʉjʉwʉ ca-roore.

Camajare rooro cá-áti jʉ́go ãmo cõa.

To bairo caroorije camajare cõ cá-áti jʉgorore bairona áama cõ ya maca Babilonia ca-wamecʉti maca ca-pairi maca macana,

na quena.

Ti maca macana caroorije áti jʉ́goma ati yepa macana nipetirãre.

To bairi ʉparã to canacã maca macana caroorije na cá-áti jʉgorore bairona áti rotinemonucugarãma na yarã quenare.

To bairije yʉ ca-ĩi queti buiowĩ ángel yʉ ca-tʉjʉ acʉaro yua.