—¡Ma yua!

¡Aánaja mʉjaa ti yepapʉre!

Rooro popiye tamuorique siete wame majuure mʉja jotʉri ca-jañarijere topʉ jite reerãja.

Ti yepa macana caroorã buipʉre jite reerãja Dio nare cʉ̃ ca-popiyeyepere,

na ca-ĩiwĩ ti wiipʉ ca-wadaʉ ángel majare baujaro wadari.

2 To bairo cʉ̃ ca-ĩiro apii yua,

jicãʉ na mena macacʉ ca-rui amí ati yepapʉre.

Rui atí,

cʉ̃ jotʉ macaje ca-punirijere ca-jite reecõa joowĩ yepapʉre.

To bairo cʉ̃ cá-áto camaja ati yepa macana maca rooro ca-tamuowã.

Na ca-camii boarijere ca-peniwã rooro majuu to bairo cʉ̃ cá-átie jʉgori.

Monstruo cʉ̃ ya wamere na riya pãiroripʉre ca-uca tuu rotiricarã ca-peniwã.

Cʉ̃re bairo ca-bauʉ na ca-wericʉre ca-ĩi nʉcʉbʉgoricarã to bairona ca-baiwã na quena rooro majuu.

3 To bairo ángel cá-aá jʉgoʉ cʉ̃ cá-aáto bero apeĩ ca-rui amí tunu ati yepapʉre.

Rui atí,

cʉ̃ jotʉ macaje popiye tamuoriquere ca-jite reecõa joowĩ cʉ̃ quena.

Mar ca-pairi yapʉre ca-jite ree ñuawĩ.

To bairo cʉ̃ cá-áto mar oco maca rií majuu camajocʉ na ca-jĩaricʉ ye riíre bairo ca-jeeñacoapʉ yua.

To bairo ca-bairo ti ya ria macana nipetirã ca-riacoama,

wai jãana yua.

4 To bairo ángel cabero macacʉ cʉ̃ cá-aáto bero apeĩ tunu ca-rui amí ati yepapʉre,

pʉgarã bero macacʉ majuu.

Rui atí,

cʉ̃ jotʉ macajere popiye tamuoriquere ca-jite reecõa joowĩ.

Riaripʉ quenare,

ca-oco butiri operi quenare ca-jite reecõa joowĩ.

To bairo cʉ̃ cá-áto to canacã riapʉna,

to canacã operipʉna ca-oco butiri operi rií majuu ca-jeeñacoapʉ yua.

5-6 To bairi ocore rií ca-jeeñaro tʉjʉʉ cʉ̃a ángel tiere ca-jeeñooricʉ maca oco bairo ca-ĩiwĩ:

—Mʉa Dio,

caroaʉ to canacã rʉmʉ ca-catícõa aninucuʉ mʉ ãa.

Mʉ cá-átie caroaro cariape jeto ãa.

To bairi camaja popiye na ca-tamuoro na mʉ ápʉ́ na ye wapa.

Mʉre ca-apiʉjarãre na ca-jĩa reewã.

Mʉ ye quetire ca-buioricarã quenare na ca-jĩawã.

Nare na ca-jĩaro ca-rií reewã.

To bairo rooro na cá-átiere tʉjʉʉ yua,

meere popiye na ca-tamuoro na mʉ ápʉ́.

To bairi rií jetore etigarãma yucʉra yua,

na ca-jĩarique wapa.

To bairi caroaro cariape cá-ácʉ mʉ ãa,

cʉ̃ ca-ĩiwĩ ángel ocore rií ca-jeeñooricʉ Diore.

7 To bairo cʉ̃ ca-ĩiro yʉ ca-apiwʉ jicãʉ cʉ̃re cʉ̃ ca-yʉʉ wadaro tunu.

Joe buje mʉgorica cajawopʉ cʉ̃ ca-wadarije ca-bauwʉ:

—To bairona mʉ bai,

jã Ʉpaʉ Dio.

Nipetirã netoro cá-áti majii mʉ ãa.

To bairi caroaro cariapena ãa na mʉ ca-popiyeyerije caroorije cá-ánare,

cʉ̃ ca-wadarije ca-bauwʉ.

8-9 To bairo bai yua,

ángel maja itiarã ati yepapʉre na cá-aáto bero apeĩ cá-amí tunu.

Itiarã bero macacʉ ca-rui amí.

Rui atí,

cʉ̃ jotʉ macajere ca-punirijere ca-jite batecõa joowĩ tunu muipure.

Ʉmʉreco macacʉpʉre jejaro ca-jite bate peocõa joowĩ.

To bairo cʉ̃ cá-áto seeto majuu ca-ajiwĩ muipu.

To bairo cʉ̃ ca-ajiro camaja maca ca-ʉ̃ʉ waroawã na ajeri.

Ʉ̃ʉ waroa yua,

rooro cʉ̃ ca-ĩi tuti macawã Diore.

Riayere ca-joo majiire rooro cʉ̃ ca-ĩi tuti macawã camaja ca-ʉ̃ʉ waroarã maca.

To bairo na caroorije wapa Dio seeto nare cʉ̃ ca-popiyeyebato quena ca-tʉgooñarique paiquẽma caroorije na cá-átinucurijere.

“Dio,

nipetirijere ca-roti majii mʉ ãa.

To bairi mʉ ca-tʉjoorije macare jã átigarã,”

cʉ̃ ca-ĩi jeniquẽma.

“Ca-ñuuquẽcʉ ãmi Dio,”

ĩrique macare ca-ĩiwã,

Diore cʉ̃ ĩi tuti macarã yua.

10 Cabero ángel apeĩ bapari canacãʉ bero macacʉ ca-rui amí tunu ati yepapʉre.

Rui atí,

cʉ̃ jotʉ macaje popiye tamuoriquere ca-jite reecõa joowĩ cʉ̃ quena.

Monstruo cʉ̃ ca-ruiri paʉpʉre ca-jite ree peocõa joowĩ.

To bairo cʉ̃ cá-áto monstruo cʉ̃ ca-rotiri paʉri nipetiropʉ cʉ̃ ca-rotirã na ca-ani paʉri ca-naitĩacoapʉ.

To bairo ca-bairo camaja seeto ca-tamuowã.

“¡Agʉ,

agʉ!”

ca-ĩiwã.

To bairo tʉgooñarique pai netobana na rijerori ca-baque biawã.

11 Na ca-camii boarije jʉgori seeto ca-wijiowã.

To bairo na caroorije wapa Dio seeto majuu nare cʉ̃ ca-popiyeyebato quena ca-tʉgooñarique paiquẽma caroorije na cá-átinucurijere.

Caroorijere cá-áti janagaquẽma.

“Ca-ñuuquẽcʉ ãmi Dio,”

ĩrique macare ca-ĩiwã Dio ʉmʉrecóo macacʉre,

cʉ̃ ĩi tuti macarã yua.

12 To bairo ángel cʉ̃ cá-áto bero apeĩ ca-rui amí tunu ati yepapʉre,

jicã wamo canacãʉ bero macacʉ majuu.

Rui atí,

cʉ̃ jotʉ macaje popiye tamuoriquere ca-jite ree ñuawĩ Eufrates na ca-ĩri yapʉ ca-pairi yapʉ.

To bairo cʉ̃ cá-áto ti ya ria ca-pairi ya anibato quena ca-bopo peticoapʉ yua.

To bairi ca-oco mano ti ya peñaricaro ca-ñuubʉjawʉ.

I nʉgoa macana ʉparã na uwamarã mena ti ya riare caroaro na ca-neto aá majiparore bairo ĩi,

to bairo cá-ámí ángel ti ya riare.

Muipu cʉ̃ ca-wamʉ ató maca macana ti ya riare caroaro na ca-peña aá majiparore bairo ĩi,

to bairo cá-ámí ángel.

13-14 Cabero yʉ ca-tʉjʉwʉ tunu Sataná yarã wãtia itiarãre.

Jicãʉ dragón're cʉ̃ rijeropʉre ca-buti amí wãti jicãʉ.

Apeĩ monstruore cʉ̃ rijeropʉre ca-buti amí cʉ̃ quenare.

Apeĩ monstruo cabero macacʉ ca-ĩito paii macare cʉ̃ rijeropʉre ca-buti amí cʉ̃ quenare.

Tʉbʉroare bairo ca-bauwã wãtia na rijeroripʉ ca-buti atána.

Apeye uniere camaja na ca-tʉjʉ acʉari wame cá-áti iñooparã ca-ãma.

To bairi to canacã maca macana ʉparãre na jee neori nare ca-quẽ rotiparã ca-ãma.

To bairi maca ʉparã uwamarã mena na ca-jee neowã,

Diore mani quẽrã ĩirã,

to bairo na ca-jʉgo ĩiwã.

To bairo na ca-bairo ti paʉ na ca-quẽgari paʉ ca-ano ati yepa ca-ani tʉjari paʉ majuu anigaro yua.

Dio nipetirã netoro ca-roti majii majuu cʉ̃re ca-bai netoo nʉcarãre cʉ̃ ca-reeri paʉ majuu anigaro yua.

15 Caroaro apiñañaja mʉjaa.

Oco bairo ĩmi Jesú manire:

“Yʉ tunu atígʉ.

Mʉja ca-ĩi tʉgooña majiquẽtopʉ nemoo yʉ tunu atígʉ.

‘Ti paʉ majuu ca-ano ca-jee rutii ejagʉmi,’

mʉja ca-ĩi majiquẽtore bairona yʉ tunu ejagʉ mʉja tʉpʉ.

‘Ti paʉ ejagʉmi,’

ca-ĩi majiña mani paʉ yʉ ejagʉ yua.

To bairi caroare ája.

Wariñuugarãma yʉ ca-tunu ejaparore caroaro ca-ani yuurã maca.

Caroorije cá-átiquẽna wariñuugarãma.

Aperã caroorije cá-ána maca bobogarãma.

Ca-jutii manare bairo bobogarãma naa yʉ ca-tunu ejaro,”

ĩmi Jesú.

16 To bairo yua,

wãtia Sataná yarã maca na ca-jee neowã ca-quẽparãre.

To canacã maca macana ʉparãre na uwamarã mena na ca-jee neowã.

“Armagedón” hebreo ye mena ca-wame cʉtopʉre na ca-jee neowã yua.

17 To bairi yua,

cʉ̃a ángel Eufrates na ca-ĩri yare oco ca-bopo petiro cá-átacʉ bero macacʉ cá-amí apeĩ tunu ati yepa buipʉre.

Seis bero macacʉ majuu ca-ãmi.

Ca-ani tʉjaʉ majuu ca-ãmi cʉ̃a.

To bairi ati yepa buipʉre eja,

jõ buipʉ cʉ̃ jotʉ macajere ca-punirijere ca-jite reecõa joowĩ cʉ̃ quena.

Wino buire ca-jite reecõa joowĩ.

To bairo cʉ̃ cá-áto baujaro ca-wadarijere yʉ ca-apiwʉ.

Dio wiipʉ ca-bauwʉ.

Ti wii pupeapʉ Dio cʉ̃ ca-ruiro majuupʉ ca-wada wiojorajawʉ,

jicãʉ cʉ̃ ca-wadarije:

—To cõona to petiato ati ʉmʉrecóo,

ca-ĩi wada wiojorajawʉ.

18 To bairo to ca-ĩi wada wiojo yaparoro bero to cõona bʉpo cʉ̃ ca-yaberije ca-yabewʉ.

Seeto ca-bʉjʉwʉ.

Bʉpo quena seeto ca-pawĩ.

Ati yepa quena seeto ca-wãrewʉ.

Ca-jʉgoye ca-wãrerique netoro ca-wãrewʉ seeto.

19 To bairo ca-wãrerije jʉgori ti maca “Babilonia” na ca-ĩri maca ca-wati nʉcacoapʉ.

Itia yepa majuu ca-wati nʉcacoapʉ.

To bairi to canacã poa macana na ya macari macá wiiri quena ca-pua wẽe peticoapʉ.

To bairona Dio maca Babilonia macana caroorije na cá-áto tʉgooña,

na ca-cõoña bejewĩ.

Na cõoña bejei popiye seeto majuu na ca-tamuoro na cá-ámí na ye wapa.

Ca-punijiniire bairo na ca-popiyeyewĩ Dio.

20 To bairi tunu yucʉ poari to canacã poapʉna ca-rua peticoapʉ.

Ʉ̃ta yucʉ quena ca-yajicoapʉ yepa ca-wãrero.

21 To bairi ʉmʉrecóopʉ oco weta rupaa,

ca-joori rupaa ca-wẽe rui apʉ́.

To canacã rupaa cuarenta kilo cõo ca-nʉcʉwʉ.

To bairo rooro wẽe rui ató camajare ca-tãpo reecõawʉ.

To bairo ca-bairo tʉjʉʉ camaja ca-rʉjarã maca caroorije cʉ̃ ca-ĩi tuti macawã Diore.

Ca-uwiobʉjawʉ tie ca-wẽe ruirije yua.