Los ángeles con las siete últimas plagas
15
Cabero yʉ ca-tʉjʉ joowʉ tunu ʉmʉrecóopʉre ca-bai iñoorije ape wamere.
Ángel maja aperã tunu siete majuu ca-buia nʉcawã.
Na maca to canacãʉpʉna ca-cʉgo peticõawã jicã jotʉri.
To bairi tie jotʉripʉ ca-jañawʉ rooro popiye tamuorique.
Ati yepa macanare Dio cʉ̃ ca-popiyeye tʉjape ca-ãmʉ.
2 To bairi yʉ ca-tʉjʉwʉ tunu ʉtabʉcʉrá pairi ra quenare.
Ti ra maca cabotiri ra vidriore bairo ca-baurije ca-bauwʉ.
Peero ca-ʉ̃ʉ ajuyarore bairo ca-bauwʉ.
To bairi ca-tʉjʉnucuwã camaja ti ra tʉjaro boeacã.
Na maca ca-ãma Dio yarã,
monstruo caroorije cʉ̃ ca-rotiriquere ca-apiʉjaquetana.
Cʉ̃re bairo ca-bauʉ na ca-wericʉre cʉ̃re ca-jeni nʉcʉbʉgoquetana ca-ãma,
cʉ̃ wamere na riya pãiropʉre buire ca-uca tuu rotiquetana.
To bairi caroorijere cá-áti ʉjagaquẽna ca-ãma.
To bairi ti ra tʉjaro boeacãpʉre ca-tʉjʉnucuwã.
Tʉjʉnucu,
Dio ye bajariquere harpas ca-wamecʉtiere cʉgori ca-tʉjʉnucuwã.
3 To bairi tie harpas mena ca-bajawã.
Moisé,
Dio cʉ̃ ca-rotirijere cá-ácʉ ãnacʉ yere ca-bajawã.
Cordero ca-wamecʉcʉ ye quenare ca-bajawã.
Oco bairo ca-ĩi bajawã:
Dio,
nipetirijere ca-rotii mʉ ãa.
Mʉ cá-átie caroa jeto ãa.
Caroaro,
cariape jeto ãa mʉ cá-átie nipetirije.
Camaja nipetirãre ca-rotii mʉ ãa,
ca-ĩi bajawã.
4 Jicãʉ maca mʉre ca-wada canamu majirã manama.
Mani Ʉpaʉ,
nipetiro macana mʉre ĩi nʉcʉbʉgogarãma.
Nipetiri maca macana,
“Jicãʉna mʉ ãa Caʉpaʉ majuu,”
mʉre ĩi nʉcʉbʉgogarãma.
Mʉ jeto ca-ñuʉ mʉ ãa.
Nipetirã caroaro,
cariape mʉ cá-átiere ca-tʉjʉyupa.
To bairi nipetiri maca macana mʉ tʉpʉre tʉjʉ ejagarãma.
Mʉ tʉpʉre tʉjʉ eja,
rʉpopatuapʉ ejacumuri,
“Jicãʉna mʉ ãa Caʉpaʉ majuu,”
mʉre ĩi nʉcʉbʉgogarãma,
ca-ĩi bajawã ti ra tʉjaro boeacã ca-tʉjʉnucurã Dio yarã.
5 To bairo na ca-baja yaparoro yʉ ca-tʉjʉwʉ tunu.
Dio wii jope ca-pã nʉcacoapʉ.
To bairi ti jope tʉ tʉjʉ joo,
ti arʉapʉre yʉ ca-tʉjʉ joowʉ.
Ʉ̃ta pãi Dio cʉ̃ ca-rotiriquere cʉ̃ ca-uca tuurica pãire na ca-cũrica arʉa ca-ãmʉ,
santuario na ca-ĩiro.
6 To bairo topʉ yʉ ca-tʉjʉ jooro tunu ángel maja siete majuu ca-buti amá ti wiipʉre yua.
Rooro popiye tamuorique ca-jañari jotʉrire ca-jeeparã ca-ãma siete wameri majuure Dio camajare cʉ̃ ca-popiyeyepere.
Jutii cabotirijere ca-jañawã.
Ca-ʉgueri maniere ca-jañawã ca-ajiya bujubʉjarijere.
Na cotiapʉre ca-ajiyari ajerire ca-jia tuu wã.
7 To bairi ti wiipʉre na ca-buti ató yua,
ricati ca-baurã cuatro majuu na mena macacʉ jicãʉ na ca-joowĩ jicã jotʉrire to canacãʉpʉrena.
Ca-ajiyari jotʉrire oro mena na ca-ĩrije na cá-áta jotʉrire na ca-joowĩ popiye tamuorique ca-jirari rʉrire.
Dio,
to canacã rʉmʉ ca-anicõa aninucuʉ maca camaja ca-ñuuquẽnare ca-punirijere cʉ̃ ca-joorijere na ca-joowĩ.
¡Ayu!
Rooro majuu tamuogarãma caroorã maca tie jʉgori.
8 To bairo ángel maja tie riayere ca-jee aána na cá-aáto Dio wii peero bujeri mena ca-buje jiracoapʉ.
Dio caroaʉ,
ca-roti maji majuʉ topʉ cʉ̃ ca-anie jʉgori to bairo ca-buje jiracoapʉ.
To bairo tie ca-bairo to macana nipetirã ti wiipʉre ca-jãa majiquẽma.
Riaye siete wameri majuu ca-petiparo jʉgoye noa ca-jãa majiquẽma ti wiipʉre yua.