Los dos monstruos
13
Cabero mar ca-pairi ya petapʉ yʉ ca-ejawʉ paputiropʉ.
Topʉ eja,
yʉ ca-tʉjʉ joowʉ tunu ca-rʉjʉgoʉre.
Riapʉ ca-ãnacʉ cʉ̃ ca-pamʉro yʉ ca-tʉjʉ joowʉ mar macacʉ monstruo ca-wamecʉcʉre.
Cʉ̃ maca siete rʉpoari majuu ca-cʉgowĩ.
Diez majuu ca-jawiaricʉcʉ ca-ãmi.
To canacã jawiapʉrena ca-ajiyari beto ca-pejawʉ,
caʉparã na ca-pejarije unie.
To bairi to canacã rʉpoaripʉna riya pãiropʉre uca tuurique ca-ãmʉ.
Caroorã na ca-wamecʉtie uca tuurique ca-ãmʉ.
2 To bairi yaire bairo ca-bauwĩ monstruo,
yʉ ca-tʉjʉricʉ maca.
Cʉ̃ rʉpori maca bʉco macanʉcʉ macacʉ capaii rʉporire bairije ca-rʉporicʉmi.
Cʉ̃ rijero yai jũaʉ rijerore bairo carijerocʉmi.
To bairi dragón maca cʉ̃ ca-joowĩ monstruore cʉ̃ ye macaje cʉ̃ cá-áti majirije majuure.
Cʉ̃ ca-rotiri paʉ quenare,
pairo cʉ̃ ca-roti majipe quenare cʉ̃ ca-joowĩ dragón monstruore.
To bairo cʉ̃ ca-jooro seeto ca-roti majiwĩ monstruo.
3 Cʉ̃ rʉpoari siete rʉpoari watoare jicã rʉpoa ca-camirocʉmi.
Na ca-jĩaricʉre bairo ca-bauwʉ jicã rʉpoa.
To bairo cʉ̃ ca-baibato quena cʉ̃ camiro pairi camiro ca-yaticoajupa.
To bairi ca-catíwĩ.
To bairi camaja nipetirã cʉ̃ ca-tʉjʉ acʉacoama.
Cʉ̃ tʉjʉ acʉari seeto cʉ̃ ca-ĩi buiorijere ca-apigawã.
4 To bairi dragón ca-wamecʉcʉre cʉ̃ cá-áti nʉcʉbʉgowã.
“Monstruore dragón roti majiriquere cʉ̃ quenare joomi,”
ĩirã dragón're cʉ̃ cá-áti nʉcʉbʉgowã camaja.
Monstruo quenare cʉ̃ cá-áti nʉcʉbʉgowã.
Camaja maca:
—Ni ucʉ̃ cʉ̃re bairo ca-majii mácʉmi.
Ni ucʉ̃ cʉ̃re ca-quẽ netoʉ mácʉmi.
To bairi cʉ̃re ca-apiʉjarã mani ãa,
ca-ĩiwã camaja nipetirã monstruore yua.
5-6 To bairi ati yepa macanare na ca-roti majiwĩ monstruo maca.
Cuarenta y dos canacãʉ muipua majuu rooro cʉ̃ cá-átajere ca-mataquẽmi Dio mai.
To bairi caroorije majuure ca-ĩi wadawĩ.
“Ati yepa macana,
ati ʉmʉrecóo macana quena nipetirã netoro ca-majii yʉ ãa,”
ca-ĩiwĩ.
To bairona,
“Dio ʉmʉrecóopʉ ca-ãcʉ̃ quena,
cʉ̃ tʉ macana quena nipetirã netoro ca-roti majii yʉ ãa,”
ca-ĩiwĩ.
7 Apeye tunu,
camajare na ca-quẽwĩ Diore ca-apiʉjarãre.
Nare quẽ,
na ca-quẽ netowĩ.
Dragón ca-wamecʉcʉ maca to bairo cʉ̃ cá-áti roti joowĩ.
To bairi camaja to canacã maca macanare,
to canacã poa macanare na ca-roti majiwĩ yua.
Rooro cʉ̃ cá-átiere ca-mataquẽmi Dio mai.
8 To bairi nipetirã ati yepa macana cʉ̃ cá-áti nʉcʉbʉgowã cʉ̃re,
monstruore.
Jicãarã cʉ̃ cá-áti nʉcʉbʉgoquẽma paro.
Aperã na ca-jĩaricʉ,
“Cordero” ca-wamecʉcʉ yarã cʉ̃re cá-áti nʉcʉbʉgoquẽma.
Ati ʉmʉrecóo ca-aniparo jʉgoye Cordero cʉ̃ ya pũuropʉ cʉ̃ yarã ca-ano cõo na wamerire cʉ̃ ca-uca tuuricarã cʉ̃ cá-áti nʉcʉbʉgoquẽma monstruore.
Na jeto cʉ̃ cá-áti nʉcʉbʉgoquẽma.
9 Atie yʉ ca-ucariquere buerã yʉ ca-ĩi queti buiorijere caroaro apiʉjaya.
10 Noa presopʉ aperãre na ca-joorã na quena topʉna joo ecoogarãma rooro aperãre na cá-áti jʉgorique wapa.
To bairona camajare ca-jĩarã na quena jĩa ecoogarãma to bairo na ca-jĩarije wapa.
Dio to bairona popiye na ca-tamuoro na átigʉmi rooro cá-ánare.
To bairi yʉ yarã,
yʉ ca-ĩi queti buiorijere tʉgooñaña.
Tiere tʉgooñari,
tʉgooñarique paiqueticõaña.
Rooro popiye mʉja ca-tamuorije to ca-anibato quena nʉcaña.
Tʉgooñaquẽja.
Jesucristore cʉ̃ apiʉjacõa aninucuña.
Mʉjaare rooro cá-ánare na popiyeyegʉmi Dio.
11 Cabero yʉ ca-tʉjʉwʉ tunu monstruo apeĩre.
Cʉ̃ maca ati yepa pupeapʉ ca-ãnacʉ ca-buti ejawĩ.
To bairi cʉ̃ quena ca-jawiaricʉmi.
Pʉga jawiari,
oveja macʉ jawiarire bairije ca-jawiaricʉmi.
To bairi dragón're bairo ca-wadawĩ.
12 To bairi monstruo mar ca-pairi yapʉ ca-ãnacʉ ca-pamʉ ejaricʉ camajare cʉ̃ ca-roti majirijere bairo ca-rotiwĩ yepa pupeapʉ ca-butiricʉ quena.
Riapʉ ca-butiricʉ mena ãcʉ̃ to bairo cʉ̃ ca-rotiwĩ cʉ̃ quena.
To bairi camaja nipetirã ati yepa macanare na ca-nʉcʉbʉgo rotiwĩ monstruo,
ca-ani jʉgoʉre.
Monstruo riapʉ ca-pamʉ ejaricʉre,
ca-riacoaboricʉ ca-catí majuʉre na cá-áti nʉcʉbʉgo rotiwĩ yepa pupeapʉ ca-ãnacʉ ca-buti ejaricʉ maca.
13 Apeye uniere capee cá-áti iñoowĩ,
camaja na tʉjʉ acʉáto ĩi.
To bairi,
“Peero ʉmʉrecóo macaje to wẽato ati yepapʉre,”
ca-ĩiwĩ.
To bairo cʉ̃ ca-ĩiro,
cʉ̃ ca-ĩricarore bairona ca-baiwʉ.
Peero ca-wẽewʉ yua.
14 To bairije áti iñoori nipetirã ati yepa macanare na ca-ĩitowĩ.
Monstruo ca-ani jʉgoricʉ ria macacʉ cʉ̃ ca-majiorije jʉgori to bairo na cá-áti iñoowĩ.
To bairo na áti iñoo,
ĩitori yua,
“Monstruo ca-pairi ya macacʉre cʉ̃ apiʉjaya,”
na ca-ĩiwĩ camajare.
“Jarerica pãi mena ca-pa ta ecooricʉre ca-tunu catíire cʉ̃ apiʉjaya,”
na ca-ĩiwĩ.
“Cʉ̃re bairo ca-bauʉre weya.
Cʉ̃ weeri cʉ̃ quenare cʉ̃ nʉcʉbʉgoya,”
na ca-ĩi buiowĩ.
To bairo cʉ̃ ca-ĩiro cʉ̃re baiina cʉ̃ ca-weewã.
15 To bairo cʉ̃re na ca-wee yaparoro monstruo yepa pupeapʉ ca-butiricʉ maca na ca-wericʉre catíriquere,
wada majiriquere cʉ̃ ca-joowĩ.
To bairo rooro cʉ̃ cá-átibato quena cʉ̃ ca-mataquẽmi Dio mai.
To bairi na ca-wericʉrena cʉ̃ na ca-jeni nʉcʉbʉgo rotiwĩ monstruo.
Cʉ̃ yarã polisíare na ca-jĩa ree roticõawĩ weericʉre ca-jeni nʉcʉbʉgoquẽnare.
16 To bairi monstruo riapʉ ca-pamʉ ejaricʉ ya wamere ca-uca tuu rotiwĩ cʉ̃ bero macacʉ maca camajare.
Camaja nipetirã na wamo cariape macá nʉgoare o na riya pãiropʉre cʉ̃ wamere ca-uca tuu rotiwĩ.
Cawimarã quenare,
cabʉcʉrã quenare,
ca-niyeru pairã quenare,
ca-bopacoorã quenare,
paa coteri maja quenare,
na ʉparã quenare,
nipetirãre to bairo jeto na ca-uca tuu rotiwĩ.
17 To bairo ria macacʉ ya wamere na wamorire o na riya pãirorire na ca-uca tuu rotiquẽpata na ca-boorije uniere na ca-wapaye rotiquẽmi.
Monstruo ca-pairi ya macacʉ cʉ̃ wame o cʉ̃ número ca-manicõaata na ca-boorije uniere ca-wapaye majiquẽma.
To bairona niyerure na ca-wapatabope quenare ca-joo rotiquẽmi.
18 Caroaro tʉgooñaña.
Monstruo ca-pairi ya macacʉ cʉ̃ ya númerore mʉjaare yʉ queti buiopa:
Seiscientos sesenta y seis ãa cʉ̃ ya número.
Ti número cʉ̃ ya wame ĩigaro ĩi.
To bairi noa caroaro ca-tʉgooña majirã ti númerore tʉgooñari caroaro cʉ̃ ya wamere na tʉgooña majiato.